ނާވިލު ނުވަތަ 'ނޮވެލް' ލިޔަން ދަސްކޮށްދިނުމުގެ މަސައްކަތު ބައްދަލުވުމެއް އައްޑޫސިޓީގައި ބާއްވައިފިއެވެ.
ދިވެހި ބަހުގެ އެކަޑަމީއިން އިންތިޒާމު ކޮށްގެން ހިތަދޫ ސްކޫލުގައި ކުރިއަށް ގެންދިޔަ މިމަސައްކަތު ބައްދަލުވުން ކުރިއަށް ގެންގޮސްފައިވަނީ އެއްދުވަހުގެ މުއްދަތަށެވެ. ނާވިލު ލިއުމުގެ މަސައްކަތު ބައްދަލުވުމެއް ދިވެހި ބަހުގެ އެކަޑަމީއިން ކުރިއަށް ގެންދިއުމުގެ މަޤްސަދަކީ، ލިއުންތެރިކަކަމުގެ ފަންނު ފުޅާކޮށް، ވާހަކަ ލިއުމުގެ ފަންނު ތަރައްޤީ ކުރުން ކަމުގައި އެކަޑަމީއިން ބުނެއެވެ.
މުޅިއަކު 35 މީހުން ބައިވެރިވި މި މަސައްކަތު ބައްދަލުވުން ނިންމުމުގެ ރަސްމީއްޔާތު ޝަރަފުވެރިކޮށްދެއްވީ މިނިސްޓަރ އޮފް އާޓްސް ކަލްޗަރ އެންޑް ހެރިޓޭޖް ޔުމްނާ މައުމޫންއެވެ. ރަސްމީއްޔާތުގައި ވާހަކަފުޅު ދައްކަވަމުން އެކަމަނާ ވިދާޅުވީ، ބަހުން ތަފާތު ލިޔެކިއުން އިތުރު ކުރުމަކީ ކޮންމެހެން ކުރަން ޖެހޭ ކަމެއް ކަމަށެވެ. އަދި އެކަމަށްޓަކައި ޓީވީ ރޭޑިއޯ ޕްރޮގްރާމް ދިވެހި ބަހުން އުފައްދާ މިންވަރު އިތުރުކުރަންޖެހޭ ކަން މިނިސްޓަރ ފާހަގަ ކުރެއްވިއެވެ.
މިމަސައްކަތު ބައްދަލުވުމާއި ގުޅޭ ގޮތުން ދިވެހި ބަހުގެ އެކަޑަމީގެ ރައީސް އަޝްރަފު ޢަލީ ވިދާޅުވީ، މިއީ ނާވިލު ލިއުމާ ގުޅޭ ގޮތުން އެކަޑަމީން ބޭއްވި ދެވަނަ ވޯކްޝޮޕް ކަމަށާއި، މީގެ ކުރީން މާލެގައި ބޭއްވި ވޯކްޝޮޕަށް ވުރެ، މިފަހަރުގެ ވޯކްޝޮޕަށް ލިބުނު ތަރްޙީބު ބޮޑުވެފައި، ލިއުންތެރިންގެ ޚިޔާލު މުއްސަނދި ކަމަށެވެ.
ހިތަދޫ ސްކޫލުގައި ކުރިއަށް ދިޔަ މިމަސައްކަތު ބައްދަލުވުމުގައި ނާވިލު ލިއުމާ ގުޅޭ ގޮތުން ބައިވެރިންނަށް މައުލޫމާތު ދެއްވީ، މިދައިރާގެ ފަންނީ ބޭފުޅެއް ކަމަށްވާ އިޝާ އަބްދުލްޢަޒީޒްއެވެ.