އިނގިރޭސި ފަތުރުވެރިއެއް ކަމަށްވާ "ގާއި މޮރޭ" 25ވަނަ ފަހަރަށް އައްޑޫ ސިޓީއަށް ޒިޔާރަތްކުރުމާއެކު ރައްޔިތުންގެ ފަރާތުން ހޫނު މަރުހަބާއެއް ކިޔައިފިއެވެ.
މިފަތުރުވެރިއާއަށް މަރުޙަބާ ކިއުމަށް ހިތަދޫގެ ގެސްޓު ހައުސްއެއްކަމަށްވާ "ޕެބަލްސް އިން" ކުރިމަތީ ވަނީ ޚާއްސަ ރަސްމީއްޔާތެއް ބާއްވާފައެވެ. އޭނާ އައްޑޫ ސިޓީއަށް ދިއުމުން މަރުޙަބާ ދެންނެވީ އެސިޓީގެ މޭޔަރު ޢަބްދުﷲ ޞާދިޤެވެ. ބޮޑުބެރުގެ ޙަރަކާތްތަކާއެކު އޭނާއަށް މަރުޙަބާ ކިޔުގެ ޙަރަކާތް އިންތިޒާމުކުރުމުގައި މޯލްޑިވްސް މާކެޓިން އެންޑް ޕަބްލިކް ރިލެޝަންސް ކޯޕަރޭޝަން (އެމްއެމްޕީއާރްސީ)އިން ބައިވެރިވިއެވެ.
އެމްއެމްޕީއާރުސީން ވަނީ ގާއި މޮރޭއަށް ޝުކުރުއަދާކޮށް ހަނދާނީ ހަދިޔާއެއް ދީފައެވެ. އައްޑޫސިޓީ ކައުންސިލުންވެސްވަނީ އޭނާއަށް މަރުޙަބާކިޔައި ހަނދާނީ ހަދިޔާއެއް ދީފައެވެ.
ފަތުރުވެރިޔާ ގާއި މޮރޭވަނީ އޭނާއަށް އައްޑޫސިޓީން ހޫނު މަރުޙަބާއެއް ކިއުމަކީ ލިބުނު ވަރަށްބޮޑު އުފަލެއްކަން ފާހަގަކޮށް އައްޑޫ ސިޓީގެ ރައްޔިތުންނަށް ޝުކުރު އަދާ ކޮށްފައެވެ. 25 އަހަރުވަންދެން ކޮންމެ އަހަރަކު ރާއްޖެއަށް ކުރާ ދަތުރުތަކުގައި ފާހަގަކުރެވުނު އެންމެ މުހިންމުކަމަކީ ރާއްޖެއަށް އަންނަމުންދާ ތަރައްޤީގެ ބަދަލުތައްކަން އޭނާ ފާހަގަކުރިއެވެ.
ގާއި މޮރޭ، އައްޑުއަށް އެންމެ ފުރަތަމަ އައިސްފައިވަނީ 1996ވަނަ އަހަރުއެވެ.