ސަރުކާރުން ކުރިއަށް ގެންދާ އައްޑޫގެ މަގުތަކުގައި ތާރު އެޅުމުގެ މަޝްރޫޢު އެޕްރީލް މަހުގެ ތެރޭގައި ފެށޭނެކަމުގައި އައްޑޫސިޓީ ކައުންސިލުން ވިދާޅުވެއްޖެއެވެ.
ޕީއެސްއެމް އިން ދެންނެވި ސުވާލަކަށް ޖަވާބު ދެއްވަމުން އައްޑޫސިޓީ ކައުންސިލުގެ އެސިސްޓެންޓް ޑިރެކްޓަރ މުހައްމަދު ލުތުފީ ވިދާޅުވީ، ސަރުކާރުގެ ފަރާތުން ޖީކޭ ޑިވެލޮޕްމެންޓާއި ހަވާލު ކޮށްގެން ކުރިއަށް ގެންދާ އައްޑޫގެ މަގުތަކުގައި ތާރު އެޅުމުގެ މަޝްރޫޢުގެ، އީއައިއޭ ހެދުމުގެ މަސައްކަތް މިހާރު ހަވާލު ކުރެވިފައިވާ ކަމަށެވެ. އަދި އީއައިއޭ މަސައްކަތް ކުރުމަށް މަހެއްހާ ދުވަހު ތެރޭގައި ނިންމައި އޭޕްރީލް މަހުގެ ތެރޭގައި މަޝްރޫއުގެ އަމަލީ މަސައްކަތް ފެށޭ ވަރު ވާނެ ކަމަށް އޭނާ ވިދާޅުވިއެވެ.
އައްޑޫސިޓީ ކައުންސިލުން މައުލޫމާތު ދެއްވި ގޮތުގައި މިމަސައްކަތުގެ އީއައޭ ހެދުމަށް ހަވާލު ކޮށްފައިވަނީ، ސީޑީއީ ކޮންސަލްޓިންގް އާއިއެވެ. މިމަޝްރޫއުގެ ދަށުން ހިތަދޫ ، މަރަދޫ، މަރަދޫފޭދޫ އަދި ފޭދޫގެ މަގުތަކުގައި ތާރު އެޅުމުގެ މަސައްކަތް ކުރެވިގެންދާނެއެވެ.
މިއީ ސަރުކާރުން 134 މިލިއަން ރުފިޔާ ޙަރަދު ކޮށްގެން ކުރިއަށް ގެންދާ މަޝްރޫއެކެވެ. އަދި މިމަސައްކަތަށް ބޭނުންވާ ސާމާނު އައްޑޫ އަށް ގެނެވިފައިވާ ކަމަށް ސިޓީ ކައުންސިލުން މައުލޫމާތު ދެއްވައެވެ. މިމަޝްރޫއަކީ ދޮޅު އަހަރު ދުވަހުން ނިންމުމަށް ހަވާލު ކުރެވިފައިވާ މަޝްރޫއެކެވެ.
މިމަޝްރޫޢުގެ އިތުރުން އައްޑޫސިޓީގެ 25 ކިލޯ މިޓަރގެ މަގު ހެދުމާއި 228 ހެކްޓަރުގެ ބިން ހިއްކުމުގެ މަސައްކަތުގެ ޑިޒައިން އަދި ކޮންސްޓްރަކްޝަން ކޮންސަލްޓެންސީ އެލް އެންޑް ޓީ އިންފްރާސްޓްރަކްޗަރ އިންޖިނިއަރިންގ ލިމިޓެޑް އާއި އެލްއީއޭ އެސޯސިއޭޓްސް ސައުތު އޭޝިއާ ޕްރައިވެޓް ލިމިޓެޑް އާއި ވަނީ ހަވާލުކުރައްވާފައެވެ.