އައްޑޫސިޓީގެ ކައުންސިލުގެ އެއް ގޮނޑި އަދި އަންހެނުންގެ ތަރައްޤީ އަށް މަސައްކަތް ކުރާ ކޮމެޓީގެ 2 ގޮނޑި އެމްޑީޕީން ކަށަވަރުކޮށްފިއެވެ.
ލޯކަލް ކައުންސިލް އިންތިހާބުގެ އައްޑޫސިޓީ ކައުންސިލް އަދި އަންހެނުންގެ ތަރައްޤީ އަށް މަސައްކަތް ކުރާ ކޮމެޓީގެ މެންބަރުންގެ ނަން ތަރުތީބުކޮށް ގުރުލުން މިއަދު މިވަނީ ބާއްވާފައެވެ. އައްޑޫގައި ބޭއްވި މިގުރުލުމުގައި އިލެކްޝަންސް ކޮމިޝަންގެ ފަރާތުން އެކޮމިޝަނުގެ ނައީބް ރައީސް އަހުމަދު އަކްރަމް ވަނީ ބައިވެރިވެ ވަޑައިގެންފައެވެ.
އައްޑޫސިޓީން ކައުންސިލުގެ ގޮނޑި ކަށަވަރު ކޮށްފައިވަނީ ހިތަދޫ ބޭރުމަތި ދާއިރާއަށް ކުރިމަތިލެއްވި ހަމައެކަނި ކެންޑިޑޭޓް ކަމަށްވާ އެމްޑީޕީ ކެންޑިޑޭޓް، ސ. ހިތަދޫ / މުޝްތަރީގެ، މަރިޔަމް ސައިދާއެވެ. މިއީ އަންހެނުންނަށް ހާއްސަ ކުރެވިފައިވާ ގޮނޑިއެކެވެ. މީގެ އިތުރުން މަރަދޫ ދައިރާގެ އަންހެނުންގެ ތަރައްޤީ އަށް މަސައްކަތް ކުރާ ކޮމެޓީ ގޮނޑިވެސް އެމްޑީޕީގެ ކެންޑިޑޭޓް ސ. މަރަދޫ / ސަބާޙީ މަންޒިލް ނުސްރަތު ރަޝީދު ވަނީ ހޮވިފައެވެ. އަދި އެއާއި އެކު ފޭދޫގެ އަންހެނުންގެ ކޮމެޓީގެ ގޮނޑިވެސް އެމްޑީޕީން ވަނީ ކާމިޔާބު ކޮށްފައެވެ. އެގޮނޑި ކާމިޔާބު ކޮށްފައިވަނީ ސ. ފޭދޫ / މުބޭލީ ވިލާ ހައްވާ ޒާހިރާއެވެ.
އައްޑޫސިޓީގެ ކައުންސިލް އިންތިހާބަށް ޖުމްލަ 36 ކެނޑިޑޭޓަކު ވާދަކުރެއެވެ. އަދި އަންހެނުންގެ ތަރައްޤީ އަށް މަސައްކަތް ކުރާ ކޮމެޓީގެ އިންތިހާބަށް 17 ކެނޑިޑޭޓުން ވާދަކުރާއިރު، މިދެއި އިންތިހާބަށް މުޅި ޖުމްލަ 53 ކެނޑިޑޭޓުން އައްޑޫއިން ކުރިމަތިލާފައި ވެއެވެ. މީގެ ތެރެއިން މިސިޓީގެ މޭޔަރ ކަމަށް 3 ބޭފުޅަކު ވާދަކުރައްވައެވެ.
މިރަސްމީއްޔާތުގައި ވާހަކަފުޅު ދައްކަވަމުން ކޮމިޝަންގެ ނައީބް ރައީސް އަކްރަމް ވަނީ އަދިވެސް ބޭނުންވާ މިންވަރަށް އޮފިޝަލުން ނުލިބޭ ކަން ފާހަގަ ކުރައްވާފައެވެ. އަދި ކޮމިޝަނަށް މިހާރުވެސް ހާހެއްހައި އޮފިޝަލުން ބޭނުންވާއިރު، ހަމައެކަނި އައްޑޫސިޓީންވެސް 60 އޮފިޝަލުން ބޭނުންވާ ކަން އޭނާ ފާހަގަ ކުރެއްވިއެވެ.