އައްޑުއަށް އަލަށް ގެނައި ދެ ޖަނަރޭޓަރު ބަހައްޓައި ކަރަންޓް ނެޓްވޯކާއި ގުޅާލައިފިއެވެ.
އައްޑޫ ސިޓީއަށް އަލަށް ގެނައި ދެ ޖަނަރޭޓަރު އައްޑޫގެ ކަރަންޓު ނެޓްވޯކާއި ގުޅާލައި އަޕްގްރޭޑް ކުރުމުގެ މަސައްކަތް ކޮށްފައި ވަނީ ހޮނިހިރު ދުވަހުގައެވެ.
ފެނަކައިގެ ސަރަހައްދީ އިންޖީނުގެއިން އައްޑޫގެ ސިނާޢީ ރަށެއް ކަމަށްވާ ގަމާއި އެކު، ފޭދޫ، މަރަދޫ-ފޭދޫ، މަރަދޫ އަދި ހިތަދޫ އަށް ކަރަންޓުގެ ޚިދުމަތްދޭ މައި އިންޖީނުގެއެވެ. އެކުންފުނިން ކުރިއަށް އޮތް ރޯދަ މަހަށް ކަރަންޓު ވިއުގާ އަޕްގްރޭޑް ކުރުމުގެ މަސައްކަތް ފަށާފައިވާއިރު، ހޮނިހިރު ދުވަހު ވަނީ ގުޅިފައިވާ ރަށްތަކުން 7 ގަޑިއިރަށް ކަރަންޓްގެ ޚިދުމަތް މެދުކަނޑާލައި އެމަސައްކަތްކޮށް ނިންމާފައެވެ.
އެގޮތުން މިއަދު ކަރަންޓް ނެޓްވޯކާއި ގުޅާލާފައި ވަނީ އަލަށް ގެނައި 2 މެގަވޯޓުގެ ދެ ޖަނަރޭޓަރެވެ. އެގޮތުން ޖުމްލަ މި ހަތަރު ޖަނަރޭޓަރުން ކަރަންޓު ދޭން ފެށުމާއި އެކު 6 މެގަވޯޓު މިހާރު ހުރި ކެޕޭސިޓީ އަށް އިތުރުވެގެންދާނެ ކަމަށް އެކުންފުނިން ބުނެއެވެ. މީގެ އިތުރުން ނެޓްވޯކް އަޕްގްރޭޑް ކުރުމުގެ މަސައްކަތްތަށް ވެސް އެފަރާތުން މިއަދު ކުރިއަށް ގެންދިއައެވެ. އެގޮތުން ކަރަންޓު ވިއުގާއަށް ބޭނުންވާ ޕެނަލްބޯޑު ހަރުކޮށް ކަރަންޓު ކޭބާލް ވަޅުލުމުގެ މަސައްކަތްވެސް ވަނީ ނިންމާލާފައެވެ.
ފެނަކައިން މައުލޫމާތު ދިން ގޮތުގައި ދުވަހުން ދުވަހަށް އައްޑޫގައި ކަރަންޓު ބޭނުން ކުރާ މިންވަރު ދަނީ އިތުރު ވަމުންނެވެ. އެގޮތުން މިހާރު ހުރި ކެޕޭސިޓީން ކުރިއަށް އޮތް ރޯދަމަހުވެސް ހިފަހައްޓާ ނުލެވޭނެ ކަމަށް އެކުންފުނިން ބުނެއެވެ. އެހެން ކަމުން މިހާރު އިތުރު ކުރެވޭ 6 މެގަވޯޓުގެ ސަބަބުން ރޯދަމަހަށް އެއްވެސް މައްސަލަ ދިމާނުވެ ކަރަންޓު ދެވޭނެ ކަމަށް ފެނަކައިން ބުނެއެވެ.
ފެނަކައިން މިހާރު ޚިދުމަތްދޭ ސަރަހައްދީ އިންޖީނުގެ އަކީ 2000 ވަނަ އަހަރު ޖަޕާނު ސަރުކާރުގެ އެހީގައި އަޅާފައިވާ އިންޖީނުގެއެކެވެ. އަދި އައްޑޫގައި މިހާރު ބޭނުން ކުރަމުންދާ ކަރަންޓު ނެޓްވޯކަށް 20 އަހަރަށް ވުރެ ގިނަ ދުވަސް ވެދާނެ ކަމަށް އެކުންފުނިން ބުނެއެވެ.
އައްޑޫގެ ކަރަންޓު މައްސަލަ ހައްލު ކުުރުމަށް 20ގެމަވޯޓުގެ ކަރަންޓު ނެޓްވޯކެއް އެޅުމަށް ޗައިނާގެ ޑޮންގްފަންގް ކުންފުންޏާއި މިދިޔަ އަހަަރު ވަނީ ހަވާލު ކޮށްފައެވެ. މިމަޝްރޫގެ ދަށުން އައު އިންޖީނުގެއެއް އަޅައި އައްޑޫގެ ކަރަންޓު ނެޓްވޯކް ޒަމާނީ ފެންވަރަށް ބަދަލު ކުރެވި ކަރަންޓު ކެޕޭސިޓީ 36 މެގަވޯޓަށް އިތުރު ކުރެވިގެންދާނެއެވެ.