އައްޑޫ އިންޓަރނޭޝަނަލް އެއަރޕޯޓް ހިންގާ ގަން ރޭގަނޑު ބަންދުކުރާ ގޮތަށް ހަމަޖައްސައިފިއެވެ.
މުޅި ދުނިޔެއަށް މިހާރު ފެތުރެމުންދާ ކޯވިޑް-19 އިން ރައްކާތެރިވުމުގެ ގޮތުން އަޅާ ފިޔަވަޅެއްގެ ގޮތުން ގަމަށް އަރާ ފައިބާ އުސޫލަށް އިއްޔެއިން ފެށިގެން ބަދަލު ގެނެސްފައިވާ ކަމަށް އައްޑޫ އިންޓަރނޭޝނަލް އެއަރޕޯޓުންވަނީ ހާމަކޮށްފައެވެ. އެގޮތުން އިއްޔެއިން ފެށިގެން އާންމުކޮށް ގަމަށް އަރާ ފޭބޭނެ ގަޑިއަކީ ހެނދުނު 06:00 އިން އިރުއޮއްސި ހަޔަކަށް ކަމަށް އެ އެއަރޕޯޓުންވަނީ ހާމަކޮށްފައެވެ.
މިގޮތަށް ހަމަޖެއްސުމުން ރޭގަނޑު ފުރުމަށް ފުލައިޓެއް ޝެޑިއުލް ކުރެވިފައިވާނަމަ ޗެކިން ފެށުމުގެ 30 މިނެޓް ކުރިން އެއަރޕޯޓު ހުޅުވުމަށްފަހު ފްލައިޓް ފުރާތާ 30 މިނެޓް ފަހުން އަނެއްކާވެސް އެއަރޕޯޓު ބަންދު ކުރެވޭނެ ކަމަށް އެއަރޕޯޓުން މަޢުލޫމާތުދެއެވެ.
ގަން ރޭގަނޑު ބަނދުކުރި ނަމަވެސް ގަމުގައި ވަޒީފާ އަދާކުރާ ފަރާތްތަކާއި، އެހެންގޮތްގޮތުން ގަމުގަ އުޅޭ ފަރާތްތަކުން ފާސް ދެއްކުމުން ގަމަށް އެރޭނެ އެއިންތިޒާމް ހަމަޖެހޭނެ ކަމަށް އައްޑޫ އިންޓަނޭޝަނަލް އެއާޕޯޓުން މަޢުލޫމާތުދެއެވެ.
ކޯވިޑް 19 އާ ގުޅިގެން ރާއްޖެގެ އެކި ހިސާބުތަކުގައި ކަރަންޓީން ފެސިލިޓީތައް ހަމަޖައްސަމުންދާއިރު އައްޑޫ ސިޓީން މީހަކު ކަރަންޓީން ކުރަންޖެހިއްޖެ ހާލަތުގައި ކަރަންޓީނު ފެސިލިޓީ އެއް ގޮތުގައި ގަމުގައި ހުންނަ ދޫގަސް މިހާރުވަނީ ހަމަޖައްސާފައެވެ.