ހިތަދޫ ރީޖަނަލް ހޮސްޕިޓަލުން ދެމުން އައި ހުރިހާ ޚިދުމަތެއް އައްޑޫ އިކުއިޓޯރިއަލް ހޮސްޕިޓަލަށް ބަދަލުކޮށްފައިވާ ކަމަށް އައްޑޫ އިކުއިޓޯރިއަލް ހޮސްޕިޓަލުން ބުނެފިއެވެ.
އައްޑޫ އިކުއިޓޯރިއަލް ހޮސްޕިޓަލުން ހުރިހާ ޚިދުމަތެއް އެއްކޮށް ދޭން ފެށުމާއި ގުޅޭ ގޮތުން ޕީއެސްއެމް އަށް މައުލޫމާތު ދެއްވަމުން އެހޮސްޕިޓަލުގެ މެނޭޖަރ ޝަރަފުއްސާދާތު ވިދާޅުވީ، އާ ހޮސްޕިޓަލުގެ ޚިދުމަތް އެންމެ ފުރަތަމަ ދޭން ފެށީ ފިޒިއޮތެރަޕީ ޑިޕާޓްމެންޓުގެ ޚިދުމަތާއެކު މިދިޔަ އަހަރު ކަމަށެވެ. އެއާއެކު މަޑު މަޑުން އެކި ޚިދުމަތްތައް ހޮސްޕިޓަލަށް ދިޔައީ ބަދަލު ކުރަމުން ކަމަށެވެ.
އިކުއިޓޯރިއަލް ހޮސްޕިޓަލަށް އެންމެފަހުން މިއަދު ބަދަލުކޮށްފައިވަނީ އިމަޖެންސީ ފަރުވާގެ ޚިދުމަތާއި، އައިސީޔޫ އާއި އިންޕޭޝަންޓު ޚިދުމަތެވެ. އަދި މިހަފްތާ ތެރޭގައި ޑައިލިސިސް ޚިދުމަތްވެސް އާހޮސްޕިޓަލަށް ވަނީ ބަދަލުކޮށްފައެވެ. މިއާއި އެކު ހިތަދޫ ރީޖަނަލް ހޮސްޕިޓަލުން ދެމުން އައި ހުރިހާ ޚިދުމަތެއް ރަސްމީކޮށް ވަނީ ހުއްޓާލާފައި ކަމަށް ސާދާތު ވިދާޅުވިއެވެ. އަދި މިހާރު ހޮސްޕިޓަލުން ފަށަންތައްޔާރު ވެ ނުފެށި ހުރި ހަމައެކަނި ޚިދުމަތް ކަމަށްވާ އެމްއާރްއައިގެ ޚިދުމަތް ވީހާވެސް އަވަހަށް ފެށުމުގެ މަސައްކަތް ކުރަމުންދާ ކަމަށް ސާދާތު ވިދާޅުވިއެވެ.
އައްޑޫ އިކުއިޓޯރިއަލް ހޮސްޕިޓަލުން ކޮންސަލްޓޭޝަން ޚިދުމަތް ފަށާފައި ވަނީ މިއަހަރު ޖެނުއަރީ މަހުގެ 15 ވަނަ ދުވަހުއެވެ. އެ ހޮސްޕިޓަލުން މައުލޫމާތު ދިން ގޮތުގައި އާ ހޮސްޕިޓަލުން މިހާރު 24 ގަޑި އިރު ޚިދުމަތް ލިބޭނެއެވެ. އެގޮތުން ހެނދުނު 9:00 އިން ހަވީރު 4:00 އަށް ސްޕެޝަލިސްޓުންގެ ޚިދުމަތް ލިބޭއިރު، އޯޕީޑީން ޖެނެރަލް ކޮންސަލްޓޭޝަންގެ ޚިދުމަތް 24 ގަޑިއިރު ދެމުންދާނެއެވެ.
އައްޑޫ އިކުއިޓޯރިއަލް ހޮސްޕިޓަލުގެ ޚިދުމަތް ދޭން ފެށުމާއެކު، ހިތަދޫ ރީޖަނަލް ހޮސްޕިޓަލް އުވާލުމަށް ރައީސް އޮފީހުން ހެލްތު މިނިސްޓްރީ އަށް ވަނީ އަންގާފައެވެ.