މާލޭ ސަރަހައްދުން ބޭރުގައި ކުރާ ފުރަތަމަ މައިބަދައިގެ އޮޕަރޭޝަން އައްޑޫ އިކުއަޓޯރިއަލް ހޮސްޕިޓަލުގައި ކުރުމަށް ތައްޔާރު ވެފައިވާ ކަމަށް އެހޮސްޕިޓަލުން ބުނެފިއެވެ.
މިއޮޕަރޭޝަން ކުރުމަށް މިހާރު އައިޖީއެމް ހޮސްޕިޓަލުގެ ޚާއްސަ ޓީމެއް އައްޑޫ ސިޓީއަށް މިވަނީ ގޮސްފައެވެ. މިޓީމުގައި އައިޖީއެމްއެޗުގެ ކަށީގެ ޚާއްސަ ޑޮކްޓަރު ޑރ. ޔޫސުފް ޝާންވެސް ހިމެނެއެވެ. މިއޮޕަރޭޝަން ކުރުމަށް ހަމަޖެހިފައިވަނީ މާދަމާގެ ވަގުތެއްގައެވެ.
އައިޖީއެމް ހޮސްޕިޓަލުން ވިދާޅުވީ، މިއީ އައްޑޫ އިކުއަޓޯރިއަލް ހޮސްޕިޓަލުގައި ކުރެވޭ މައިބަދައިގެ ފުރަތަމަ އޮޕަރޭޝަން ކަމަށެވެ.
އައްޑޫ އިކުއެޓޯރިއަލް ހޮސްޕިޓަލުގައި މައިބަދައިގެ އޮޕަރޭޝަނެއް ކުރުމަށް ތައްޔާރު ވެފައިވާ އިރު، މިދިޔަ ހަފްތާގެ ބުރާސްފަތި ދުވަހު އެ ހޮސްޕިޓަލުގައި ވަނީ އުކުޅުވަޅު ހުޅު ބިންދައިގެން ގޮސްފައިވާ 82 އަހަރުގެ މީހެއްގެ އޮޕަރޭޝަން ކާމިޔާބު ކަމާއެކު ކޮށްފައެވެ. މިއީ އެ ހޮސްޕިޓަލުގައި މިފަދަ ބޮޑު އޮޕަރޭޝަނެއް އެ ހޮސްޕިޓަލުގައި ކުރި ފުރަތަމަ ފަހަރެވެ.
އައްޑޫ އިކުއެޓޯރިއަލް ހޮސްޕިޓަލަކީ ޓާޝަރީ ފެންވަރަށް ތައްޔާރު ކޮށްފައިވާ 100 އެނދުގެ ހޮސްޕިޓަލެކެވެ. މިހޮސްޕިޓަލުން ޚިދުމަތްދޭން ފަށާފައިވަނީ މިމަހުގެ ދެވަނަ ދުވަހުއެވެ.