އައްޑޫގެ އާންމުން ފިހާރަތަކަށް ގޮސް ވިޔަފާރިކުރެވޭ ގަޑިތަކަށް ބަދަލު ގެނެސް ގުޅިފައިވާ ރައްތަކުގައި ވެސް އެއްރަށުން އަނެއް ރަށަށް ނުދެވޭ ގޮތަށް ނިންމައިފިއެވެ.
މިކަމާއި ގުޅިގެން އައްޑޫގައި އިކުއިޓޯރިއަލް ހޮސްޕިޓަލުގެ ކޮންފަރެންސް ހޯލުގައި ބޭއްވި ނޫސްވެރިންގެ ބައްދަލުވުމުގައި އައްޑޫސިޓީ މޭޔަރ އަބްދުﷲ ސޯދިޤް ވިދާޅުވީ އެޗްޕީއޭއިން މާލެ ސަރަހައްދު ފިޔަވައި ރާއްޖޭގެ އެހެން ހުރިހާ ސަރަހައްދަކަށް ޚާއްސަ ފިޔަވަޅު ތަކެއް އަޅާފައިވާ ކަމަށެވެ. އަދި މިފިޔަވަޅުތަކުގައި އާންމު އިޖްތިމާޢީ އެއްވުން އެއްވެސް ތަނެއްގައި ބޭއްވުން މަނާ ކޮށްފައިވާތީވެ، ވިޔަފާރި ގަޑިތަކަށް ބަދަލު ގެނެސްފައިވާ ކަމަށެވެ.
ކޯވިޑް-19އާއި ގުޅިގެން އައްޑޫގައި ހަދާފައިވާ ޓާސްކްފޯސްގެ ކޯޗެއާ މޭޔަރ ސޯދިޤް ވިދާޅުވީ، ހުރިހާ ފިހާރައެއްވެސް ދެން ހުޅުވިފައި ހުންނާނީ ހެނދުނު 9:00 އިން ހަވީރު 5:00 އަކާއި ހަމައަށެވެ. އަދި ކަންމަތީ ފިހާރަތަކާއި ކާބޯތަކެތީގެ ވިޔަފާރި ކުރާ ފަރާތްތަކުން އޭގެ ފަހުން 10:00 ޖެހުމާއި ހަމައަށް ޑެލިވަރީ ކުރެވޭނެ ކަމަށް މޭޔަރ ވިދާޅުވިއެވެ. އަދި މިކަމުގައި ކޮންމެ ރަށެއްގައި ވެސް ޤާއިމު ކުރެވިފައިވާ ސޯޝަލް ސަޕޯޓު ޑެސްކުން އެރަށެއްގެ ރައްޔިތުންނަށް އެހީތެރިވާނެ ކަމަށް މޭޔަރ ވިދާޅުވިއެވެ. މީގެ އިތުރުން ކެފޭ ރެސްޓޯރެންޓްތައް އެއްކޮށް ބަންދުކޮށް ޓޭކްއަވޭ ޑެލިވަރީ ކުރެވޭނެ ކަމަށާއި، ގާޑިއާތައްވެސް މިއުސޫލުން ކުރިއަށް ގެންދެވޭނެ ކަމަށް މޭޔަރ ވިދާޅުވިއެވެ.
ކޯވިޑް 19 އިން ރައްކާތެރިވުމަށް އަޅާ ފިޔަވަޅެއްގެ ގޮތުން ޒަރޫރީ ހާލަތެއްގައި މެނުވީ ރާއްޖޭގެ އެއްރަށުން އަނެއް ރަށަށް އަރާ ފޭބުންވެސް ސަރުކާރުންވަނީ މަނާކޮށްފައެވެ. މިކަމާއި ގުޅިގެން ޓާސްކްފޯސް އިން އައްޑޫގައި އަމަލު ކުރާނެ އުސޫލެއް ކަނޑައަޅާފައިވާ ކަން މޭޔަރ ފާހަގަ ކުރެއްވިއެވެ. އައްޑޫސިޓީއަކީ ގުޅިފައިވާ ރައްތަކެއް ހުރި އަތޮޅެއް ކަމުން، މިސިޓީގެ ގުޅިފައިވާ ރަށްތައް ގުޅިފައިވަނީ ކޯޒްވޭއަކުންނެވެ. އެހެން ކަމުން މިހާރު ހިތަދޫ އާއި މަރަދޫ ދެމެދު ހުރަސް ނުކުރެވޭއިރު މަރަދޫ-ފޭދޫ އިން ފޭދޫ އަށް ވެސް ހުރަސް ނުކުރެވޭ ގޮތަށްވަނީ ހަމަޖައްސާފައެވެ. މީގެ އިތުރުން އައްޑޫ ސިތީގެ ގަން ވެސް އާންމުންނަށްވަނީ ބަންދުކޮށްފައެވެ.
މިގޮތަށް ހަމަޖެއްސިނަމަވެސް ސިއްޙީ ހިދުމަތްދޭ ތަންތަނާއި އަދި ފާމަސީތައް އިސްތިސްނާވާނެ ކަމަށް މޭޔަރ ވިދާޅުވިއެވެ. މިހާލަތުގައި ޞިއްޚީ ޚިދުމަތެއް ބޭނުންވެއްޖެ ނަމަ އެރަށެއްގެ ޞިއްޚީ މަރުކަޒަށް ދެއްކޭނެ ކަމަށާއި، އެތަނަކުން އައްޑޫ އިކުއިޓޯރިއަލް ހޮސްޕިޓަލަށް ދެއްކުމަށް ނިންމައިފި ނަމަ ގުޅިފައިވާ ރަށްތަކުން އަދި ވަކިން އޮންނަ ހުޅުމީދޫންވެސް އެހޮސްޕިޓަލަށް ގެންދިއުމުގެ އިންތިޒާމު ހަމަޖެހޭނެ ކަމަށް މޭޔަރ ވިދާޅުވިއެވެ.
ކޯވިޑް 19ގެ ކޭސްތައް މާލެއިން ފެނި މިބަލި ކޮމިއުނިޓީ ސްޕްރެޑަކަށް ގޮސްފައިވާއިރު މިކަމުން ރައްކާތެރިވުމުގެ ގޮތުން ސަރުކާރުން ގެންދަނީ ހަރުދަނާ ފިޔަވަޅުތަކެއް އަޅުއްވަމުންނެވެ. ކޯވިޑް 19އާ ގުޅިގެން އައްޑޫސިޓީ ހިތަދޫ ނޫމަސްވާދީ ވަނީ މޮނިޓަރިން ހާލަތަށް ގެނެސްފައެވެ.