ކޯވިޑް-19ގެ ޙާލަތާއި ގުޅިގެން އައްޑޫ ސިޓީގައި އަޅާފައިވަނީ ހަރުކަށި ފިޔަވަޅުތަކެއް ނޫން ކަމަށާ، އެ އީ ރައްޔިތުން ބަލިމަޑުކަމުން ރައްކާތެރިކުރުމަށް އެޅި ހަރުދަނާ ފިޔަވަޅުތަކެއްކަމަށް އައްޑޫސިޓީގެ މޭޔަރ ޢަބްދުﷲ ސޯދިޤް ވިދާޅުވެއްޖެއެވެ.
އައްޑޫ ސިޓީގެ އިމަޖެންސީ އޮޕަރޭޝަންސް ސެންޓަރުގެ މަސައްކަތާއި ގުޅޭ ގޮތުން ނޫސްވެރިންނަށް މައުލޫމާތު ދެއްވަމުން މޭޔަރ ސޯދިޤް ވިދާޅުވީ، އައްޑޫ ސިޓީން މިހާތަނަށް ކޯވިޑް-19އަށް މީހަކު ޕޮޒިޓިވް ވެފައި ނުވި ނަމަވެސް މިހާތަނަށް 42 މީހެއްގެ ސާމްޕަލް ނަގާފައިވާކަމަށެވެ. އަދި އައްޑޫ ސިޓީގައި މިވަގުތު އަޅާފައިވަނީ ހަރުކަށި ފިޔަވަޅުތަކެއް ނޫންކަމަށާ އެއީ ހަރުދަނާ ފިޔަވަޅުތަކެއް ކަމަށް މޭޔަރ ވިދާޅުވިއެވެ.
" އަޅުގަނޑު ޤަބޫލެއް ނުކުރަން މިހާރު އެޅިފައި ހުރި ފިޔަވަޅުތަށް ހަރުކަށި ކަމަށް. ރައްޔިތުންގެ ހައްގުގައި ކޯވިޑް-19 އައްޑޫއަށް ފެތުރުނަ ނުދިނުމައްޓަކައި، ކޮމިއުނިޓީ ސްޕްރެޑެއް ހުއްޓުވުމަށްޓަކާއި އެޅެން ހުރި ފިޔަވަޅުތަށް މިއީ. މިފިޔަވަޅުތަށް ބްރީޗް ކުރާ މީހުން އެބަތިބި. ހަވީރު ފިނި ބުރަށް ނިކުންނަ މީހުން އެބަތިބި. އެހެންވީމަ އަޅުގަނޑުމެން މިކަމަށް ސަމާލުވާން އެބަޖެހޭ. " މޭޔަރ ފާހަގަ ކުރެއްވިއެވެ.
އައްޑޫއަށް މިހާތަނަށް އައިސްފައިވާ މީހުންގެ ތަފާސްހިސާބުތަށް ހިއްސާ ކުރައްވާ މޭޔަރ ވިދާޅުވީ، އެކި ގޮތްގޮތުން މިދިޔަ މަހުގެ 15 އިން ފެށިގެން މިހާތަނަށް 655 މީހުން އައްޑޫ އަށް އެތެރެވެފައިވާ ކަމަށެވެ. މީގެ ތެރޭގައި ރިސޯޓުތަކުގެ މުވައްޒަފުންނާއި، ކަރަންޓީނު ފެސިލިޓީ ތަކުގައި ތިބި މީހުން ހިމެނެއެވެ.
" ޖުމްލަ 655 މީހަކު ރިސޯޓުތަކުން އައްޑުއަށް އައި. އެމީހުން ދަތުރުކޮށްފައި ވަނީ ލޯންޗު އަދި ފްލައިޓުން. 4 ފްލައިޓުން 267 މީހަކު ދަތުރު ކުރި، އަދި 20 ލޯންޗަކުން 351 މީހަކާއި، މެޑިކަލް އަދި ކާގޯ ފްލައިޓުން 37 މީހަކު ދަތުރު ކުރި" މޭޔަރ ސޯދިޤް ވިދާޅުވިއެވެ.
އައްޑޫ އިމަޖެންސީ ޓާސްކްފޯސް ކޯޗެއާ ކުރައްވާ މޭޔަރ ސޯދިޤް ވިދާޅުވީ، މިއެންމެންނަކީވެސް ކަރަންޓީނުގެ މުއްދަތުގެ 14 ދުވަސް ހަމަ ކޮށްގެން އައްޑޫ ސިޓީއަށް އައި މީހުން ކަމަށެވެ. މީގެ އިތުރުން މާލެއާއި ރާއްޖޭގެ އެކި ރައްރަށުގައި ތާށިވެފައި ތިބެގެން 477 ފަރާތަކުން އެމަޖެންސީ އޮޕަރޭޝަންސް ސެންޓަރުގައި މިހާތަނަށް ރަޖިސްޓްރީ ކޮށްފައިވާ ކަމަށްވެސް މޭޔަރ ވިދާޅުވިއެވެ.
އައްޑޫސިޓީއިން އެންމެ ފަހުން 18 ސާމްޕަލެއް ވަނީ ނަގާފައެވެ. އެއީ ނިއުލަން ނަމަކަށް ކިޔާ ބޯޓުން ނެގި 11 ސާމްޕަލާއި، ކޮންޓެކްޓް ޓްރޭސިންގް ގެތެރެއިން ޕްރައިމަރީ އަދި ސެކަންޑަރީ ކޮންޓެކްކްޓު ގޮތުގައި ފާހަގަ ފާހަގަ ވެފައިވާ ސިފައިންގެ ފަސް މީހެއްގެ ސާމްޕަލެވެ.