ޕްރޮފެސަރ ހަސަން އުގައިލްގެ، އުގައިލް ފައުންޑޭޝަން ތައްޔާރުކުރި ޑެލިވަރީ ނިޒާމު އައްޑޫ ސިޓީގައި ބޭނުންކުރަން ފަށައިފިއެވެ.
އުގައިލް ފައުންޑޭޝަންގެ ޑެލިވަރީ ބޮޓް 'ލިންކިޓް' އަކީ ވައިބާ ބޮޓެކެވެ. މިނިޒާމުގެ ތެރެއިން ގޭގައި ތިބެގެން ވައިބާ ބޮޓު މެދުވެރިކޮށް ފިހާރަތަކުން އޯޑަރުކޮށް ޑެލިވަރީގެ ޙިދުމަތް ލިބިގެންދާނެއެވެ. އެގޮތުން މިނިޒާމުގެ ތެރެއިން ފިހާރަތަކުން އޯޑަރު ކުރުމާއި، ފިހާރައިގައި މިވަގުތު ހުރީ ކޮން ސާމާނެއްތޯ ބެލުމާއި، އޯޑަރު ކުރި ތަކެއްޗަށް ލާރި ދެއްކުމާއި، އަދި އޯޑަރު ޓްރެކް ކުރެވޭނެ ކަމަށް އުގައިލް ފައުންޑޭޝަނުންބުނެއެވެ.
މިބޮޓު ލޯންޗުކުރައްވަމުން، އުގައިލް ވިދާޅުވީ މިވަގުތު ކާބޯތަކެއްޗާއި، ޒަރޫރީ މުދާ ހޯދުމަށް އޯޑަރު ކުރެވޭނެ ރަނގަޅު ނިޒާމެއް ޤާއިމުވެފައި އޮތުން މުހިންމު ކަމަށެވެ. އެގޮތުން ވައިބާއަކީ ގިނަ ދިވެހިން ބޭނުން ކުރާ އެއްޗެއްކަން އުގައިލް ފާހަގަކުރެއްވިއެވެ. އެހެންކަމުން ވައިބާ މެދުވެރިކޮށް މުދާތައް އޯޑަރުކުރެވޭނެ ނިޒާމެއް ޤާއިމު ކުރެވިގެން ދިއުމަކީ ވަރަށް ބޮޑު ފަސޭހައެއް ލިބިގެންދާނެކަމެއް ކަމަށް ޤަބޫލުކުރައްވާކަމަށް އުގައިލް ވިދާޅުވިއެވެ.
ލިންކިޓް ބޭނުން ކުރަން ފުރަތަމަ ފެށީ އައްޑޫގައެވެ. އައްޑޫގައި ލިންކިޓް ލޯންޗު ކުރަމުން މޭޔަރ އަބްދުﷲ ސޯދިޤް ދެއްވި މެސެޖުގައި ވިދާޅުވީ، މިހާރު ވިޔަފާރި ކުރުމުގައި ދިމާވާ އެންމެ ބޮޑު ދަތިތަކަމަކީ، ފިހާރަތަކުން ފޯނަށް ޖަވާބު ނުދެވުމާއި، އޯޑަރު ލިބުމުގައި ލަސްވުމާއި، އަދި ގުޅައިގެން އޯޑަރު ކުރަން ބަލާއިރު ބޭނުންވާ ސާމާނު ނެތުން ކަމަށެވެ. އެހެން ކަމުން އުގައިލް ފައުންޑޭޝަނާއި ގުޅިގެން އައްޑޫގައި މިނިޒާމު ތައާރަފް ވެގެން ދިއުމުން ބޮޑެތި ފަސޭހަތަކެއް ލިބިގެން ދާނެ ކަމަށް މޭޔަރ ވިދާޅުވިއެވެ.
އައްޑޫގައި ވިޔަފާރިތަކަށް މިނިޒާމު ބޭނުން ކުރުމާއި ގުޅޭ ގޮތުން ސެޝަންތަކެއް ސިޓީކައުންސިލު މެދުވެރިކޮށް އުގައިލް ފައުންޑޭޝަނުން ނަގައިދިނެވެ. މިސެޝަންތަކުގައި، މިހާރު ޑެލިވަރީ ކުރުމަށް ރަޖިސްޓްރީ ކުރެވިފައިވާ ހުރިހާ ވިޔަފާރިތަކަށްކަށް ވެސް ބައިވެރިވެވޭނެކަމަށް ސިޓީ ކައުންސިލުން ބުނެއެވެ.
އުގައިލް ފައުންޑޭޝަންގެ މިބޮޓު އައްޑޫގައި ބޭނުން ކުރަން ފަށާފައިވާއިރު، ކުރިއަށް އޮތްތަނުގައި ގއ. ވިލިނގިލި، ޅ. ހިންނަވަރު އަދި ހުޅުމާލޭގައި މިބޮޓު ތައާރަފު ކުރުމުގެ މަސައްކަތް ކުރަމުންދާ ކަމަށް އުގައިލް ފައުންޑޭޝަނުން ބުނެއެވެ.