މިހާރު ރާއްޖެއަށް ކުރަމުންދާ ވިއްސާރާގައި އެސިޓީގެ ފޭދޫ 544 ގެއަކަށް ފެނުގެ އަސަރު ކޮށްފައިވާ ކަމަށް އައްޑޫސިޓީ ކައުންސިލުން ވިދާޅުވެއްޖެއެވެ.
މިވިއްސާރާގައި މިހާތަނަށް އައްޑޫސިޓީ ފޭދޫގެ 544 ގެއަކަށާއި، މަރަދޫ ފޭދޫގެ 44ގެއަކަށް އަދި މަރަދޫގެ 20ގެއަކަށް، ހިތަދޫގެ 28 ގެއަކަށް ފެނުގެ އަސަރު ކޮށްފައިވާ ކަމަށް އައްޑޫސިޓީ ކައުންސިލުން ވަނީ ހާމަކުރައްވާފައެވެ.
މިކަމާގުޅިގެން ޕީއެސްއެމް ނިއުސްއަށް މަޢުލޫމާތު ދެއްވަމުން އައްޑޫ ސިޓީގެ މޭޔަރ ޢަބްދުﷲ ޞާދިޤް ވިދާޅުވީ، މިއީ މިފަހުން ފޭދޫގެ މިހާގިނަ ގޭގެއަށް ވިއްސާރައިގައި ގެއްލުންވި ފަހަރު ކަމަށެވެ. މޭޔަރ ވިދާޅުވި ގޮތުގައި ފޭދުއަށް މިހާ ބޮޑަށް ގެއްލުންވި ސަބަބު ބެލި ބެލުމުގައި، ރަށުން ފެން ބޭރު ކުރުމަށް އަޅާފައިވާ ހޮޅިތަށް ބެދިފައިވާ ކަން ފާހަގަ ކުރެވުނުކަމަށެވެ. މި ހޮޅިތަށް ބެދެން މެދުވެރިވީ ކީއްވެގެންތޯ ބަލަމުންދާކަމަށްވެސް އޭނާ ވިދާޅުވިއެވެ.
ހޮޅިތަކުގެ ތެރެއިން ވެލި ގޯނިތަކެއް ފެނިފައިވާތީ މިއީ ބަޔަކު ގަސްތުގައި ކޮށްފައިވާކަމެއްތޯ ބެލުމުގެ މަސައްކަތް ކުރަމުންދާކަމަށްވެސް މޭޔަރު ވިދާޅުވިއެވެ. މިކަމާއި ގުޅޭ ގޮތުން ޤައުމީ ސަލާމަތާއި ބެހޭ ކޮމެޓީއާ މަޝްވަރާ ކުރެވުނު ކަމަށާ، ގެއްލުންވި ގޭގެއަށް ދާއިމީ އެހީތެރިކަމެއް ފޯރުކޮށްދެވޭނޭ ގޮތްތަކާއި، ރަށްރަށުގެ ފެންހިންދާ ނިޒާމުގެ މަސައްކަތް ހަރުދަނާކުރުމާމެދު މަޝްވަރާ ކުރެވުނު ކަމަށްވެސް މޭޔަރު ވިދާޅުވިއެވެ.