ދިވެހީންނަކީ ވަސީލަތްތައް މަދު، އިމްޕޯޓަށް ބަރޯސާ ވެފައިވާ ބައެކެވެ. އެހެންކަމުން އުމުރާނީ އިޤުތިޞާދީ އަދި އިޖުތިމާއީ ތަރައްޤީގައި ކުރިއެރުންތައް ހޯދުމުގައި ދަތިތައް ކުރިމަތިވެފައި ވެއެވެ. ޚާއްސަކޮށް ދުނިޔޭގެ އިނޤުތިޞާދަށް އަންނަ ލޮޅުންތަކާއި ބަލިމަޑުކަމާއި ޤުދުރަތީ ކާރިސާތަކުގައި ޤައުމުގެ އެންމެ ބޮޑު ބަލިފަޔަކަށް ވެފައި އޮންނަނީވެސް މިކަމެވެ.
ރާއްޖޭގެ ސިއްޙީދާއިރާއަކީ ސަރަހައްދީ ނިސްބަތުން ކުރިއަރާފައިވާ ދާއިރާއެކެވެ. އެހެން ނަމަވެސް މިދާއިރާއަށް ބޭނުންވާ ހަމަހުރިހާ އެއްޗަކީ ރާއްޖެއިން ބޭރުން އިމްޕޯޓު ކުރެވޭ ތަކެއްޗެވެ، ބޭހާއި މެޝިނަރީތަކާއި އެންމެ ކުޑަމިނުން އެނދުތަކުގައި އަޅާ ބެޑްޝީޓާއި ބާލީހުއުރަ ފަދަ ތަކެއްޗަކީވެސް ރާއްޖެއިން ބޭރުން އެތެރެކުރެވޭ ތަކެއްޗެވެ.
ކޯވިޑް 19ގެ އާލަމީ ވަބާ އާއި އެކު ޤައުމުތަކަށް އެންމެ ބޭ ނުންވެފައިވަނީ ވެންޓިލޭޓަރެވެ. އެތައް ލައްކަބަޔަކު ދުނިޔެ ދޫކޮށް އެދަނީ، ވެންޓިލޭޓަރުފަދަ ލައިފްސަޕޯޓު މެޝިންތައް ނެތިގެންނެވެ. ރާއްޖެއަށް އޮތް ބިރަކީވެސް މިއެވެ.
ރާއްޖޭގެ ސިއްޙީޚިދުމަތްދޭ ހުރިހާ މަރުކަޒެއްގައި ބޭނުން ކުރެވޭނެ އަދަދަށް ރާއްޖެ އަކު ވެންޓިލޭޓަރެއް ނެތެވެ. ވެރިކަންކުރާ ގުރޭޓާމާލެ އޭރިއާގައި ހުރި ސަރުކާރުގެ ތިން ހޮސްޕިޓަލުގައިވެސް ފުދޭވަރަށް ވެންޓިލޭޓަރެއް ނެތެވެ. އެއާއި އެކު ސަރަހައްދީ ހަސްފަތާލުތަކާއި އަތޮޅު ހޮސްޕިޓަލުތަކުގެ ހާލަތު އެއަށްވުރެ މާދެރައެވެ. އެހެން ކަމުން ކުއްލި ހާލަތުގައި ބޭނުން ކުރެވޭނެ ވެންޓީލޭޓަރަށް ސިއްޙީ ޚިދުމަތްތެރިން ވަނީ ނުހަނު ބޭނުން ވެފައެވެ.
އެގޮތުން އައްޑޫސިޓީ މީދޫ އަށް އުފަން އުމުރުން 25 އަހަރުގެ އަހުމަދު މުއީދު މިވަނީ، ކުއްލި ހާލަތުގައި ބޭނުން ކުރެވޭނެ ވެންޓިލޭޓަރ އެއް އީޖާދު ކޮށްފައެވެ. މިކަމުންވެސް އެނގިގެން ދިޔައީ ޝައްކެއްވެސް ނެތް ގޮތުގައި ދިވެހީންގެ ތެރޭގައި ހުނަރުވެރި ޒުވާނުން އެބަތިއްބެވެ. އެންމެ ހަފްތާއެއްހާ ދުވަހުގެ މަސައްކަތުން ވެންޓިލޭޓަރެއް ޑިޒައިން ކޮށް އޭނާ ވަނީ ޓެސްޓުވެސް ކޮށްފައެވެ. ޓެސްޓު ވަރަށް ކާމިޔާބެވެ. މުއީދު ދެކޭ ގޮތުގައި މިވަގުތަކީ ޤައުމަށް އުފެއްދުންތެރިކަމުގެ ވިސްނުން ހުރި މަސައްކަތްތެރީންގެ ބޭނުން ޖެހިފައިވާ ވަގުތެކެވެ. އަދި މިއީ އުފެއްދުންތެރިކަން ކުރިއަށް ނެރެގެން އަމިއްލައަށް ބޭނުންވާ މުހިއްމުތަކެތި އުފެއްދޭތޯ މަސައްކަތް ކުރަންވީ ވަގުތު ކަމަށް އޭނާ ބުންޏެވެ.
ކުއްލި ހާލަތުގައި ބޭނުން ކުރެވޭނެ ވެންޓިލޭޓަރާއި، ބޭހޭ ގޮތުން ޕީއެސްއެމް އާއި ވާހަކަ ދައްކަމުން މުއީދު ބުނީ އެނާ ފުރަތަމަ ވެންޓިލޭޓަރެއް އުފެއްދުމުގެ ހިޔާލު އައީ، ގޭގައި ހުރެގެން މުޖްތަމަޢުއަށް ފައިދާ ހުރި ކަމެއް ކުރުމުގަ ވިސްނުމުގައި ކަމަށެވެ. އެގޮތުން ދިވެހި ސިފައިން ވެންޓިލޭޓަރ އެއް އިޖާދު ކުރިކަން ފާހަގަކޮށް މުއީދު ބުނީ އޭނާވެސް މިކަމާއި ބެހޭ ގޮތުން ދިރާސާތައް ކުރި ކަމަށެވެ. އޭނާ ބުނިގޮތުގައި ރާއްޖޭއަށް ވެންޓިލޭޓަރު ފަދަ މުހިންމު ވަސީލަތެއް މިދުވަސް ވަރު ގެނައުންވެސް އުނދަގޫވެފައި އަގުބޮޑު އެއްޗެއް ގޮތުގައި ފާހަގަވީއިރު، އޭނާއަށް ވިސްނުނު ގޮތުގައި އެހެން މީހުންވެސް އުފައްދާ އެއްޗެއް ކަމަށްވާނަމަ މިއީ ވެސް އުފެއްދިދާނެ އެއްޗެއްގެ ގޮތުގައެވެ.
އައިޓީ ދައިރާގައި ހަރާކާތްތެރިވާ އަދި އަމިއްލަ މަސައްކަތެއް ކުރާ މުއީދު ވެންޓިލޭޓަރު ތައްޔާރު ކޮށްފައިވާ ގޮތް ޕީއެސްއެމް އާއި ވަނީ ހިއްސާ ކޮށްފައެވެ. އޭނާ ބުނި ގޮތުގައި ވެންޓިލޭޓަރު ފްރޭމް ހަދާފައި ވަނީ ކަބަޑު ފިލާ ބޭނުން ކޮށްގެނެވެ. އޭނާ ކިޔައިދިން ގޮތުގައި ވެންޓިލޭޓަރުގައި ބޭނުން ކުރަނީ، އެމްބޫބޭގް އެކެވެ. އާންމު ހާލަތުގައި އެންމްބޫބޭގަކީ ނޭވާލުމުގެ ދަތިކަން ހުރި ފަރާތްތަކަށް ނޭވާލުމުގައި އެހީތެރިވެ ދިނުމަށް ބޭނުން ކުރާއެއްޗެކެވެ. އެމްބޫބޭގް ބޭނުން ކުރަން ޖެހޭނީ އަތުން ފިއްތައިގެންނެވެ. މުއީދުގެ މިއީޖާދުގައި މިކަން މިވަނީ އޮޓޯމޭޓް ކޮށްފައެވެ. އެގޮތުން ކާރުގެ ބިއްލޫރި ތިރި ކުރުމަށް ބޭނުން ކުރާ މޯޓަރެއްގެ އެހީގައި އެމްބޫބޭގަށް ފިއްތާލެވޭ ގޮތަށް ވަނީ ފަރުމާ ކޮށްފައެވެ.
މުއީދު ބުނި ގޮތުގައި، އޭނާގެ މިޑިޒައިން ހިފައިގެން ގޮސް ހުޅުމީދޫ ހެލްތު ސެންޓަރުގައި ކުރި ޓެސްޓު ތަކުގެ ނަތީޖާ ވަރަށް ކާމިޔާބެވެ. އޭނާ ބުނި ގޮތުގައި އޭނާ މިހާރު ކުރަމުންދާ މަސައްކަތަކީ ވެންޓިލޭޓަރު ބައެއް ސާމާނީ ވަކިވަރަކަށް ބޭނުން ކުރުމުން ބަދަލު ކުރަން ޖެހޭ އެއްޗެކަށް ވުމުން، ހުސްވުމުގެ ކުރީން އެލާމެއް އަޅާ ގޮތަށް ފަރުމާ ކުރުން ކަމުގައެވެ.
އޭނާ ކިޔައިދިން ގޮތުގައި ބައެއް ފަހަރު ތަކެތި ހޯދުން އެހާ ފަސޭހައެއް ނޫނެވެ. އެހެނަސް ބުރަ މަސައްކަތުން ރަށުން ބޭނުންވާ ސާމާނު ލިބެއެވެ. އޭނާ ބުނި ގޮތުގައި އޭނާ މިހާރު ގެންނަ ބަދަލުތައް ކާމިޔާބު ވެއްޖެ ނަމަ އޭނާ އުފެއްދި ވެންޓިލޭޓަރު ކަމާއި ބެހޭ ފަރާތްތަކާއި ހަމައަށް ގެންދާނެއެވެ.