އެންޓި ކޮރަޕްޝަން ކޮމިޝަންގައި ބަލަމުންދާ ސަރުކާރުގެ ބައެއް ކުންފުނިތަކުގެ މައްސަލަތައް ވަކިގޮތަކަށް ނުނިމި ލަސްވަމުންދާތީ، ރައްޔިތުން މަޖްލީހުގެ އެސްއޯއީ ކޮމިޓީއަށް އެންޓި ކޮރަޕްޝަން ކޮމިޓީގެ ވެރިން ހާޒިރުކުރުމަށް ނިންމައިފިއެވެ.
މިއަދު ބޭއްވި ސްޓޭޓް އޯންޑު އެންޓަރޕްރައިސަސް، އެސްއޯއީ ކޮމިޓީގެ ބައްދަލުވުމުގައި މެމްބަރުންވަނީ އެންޓި ކޮރަޕްޝަން ކޮމިޝަން، އޭސީސީން ބަލަމުންދާ ސަރުކާރުގެ ބައެއް ކުންފުނިތަކުގެ މައްސަލަތައް ވަކި ގޮތަކަށް ނުނިމި ލަސްވަމުންދާތީ އެކުންފުނިތަކުގެ ހިންގުމަށް އޭގެ އަސަރުކޮށް ގެއްލުންވަމުންދާކަން ފާހަގަކޮށްފައެވެ.
އޭސީސީ ކޮމިޓީއަށް ހާޒިރުކުރުމަށް ހުށަހަޅުއްވަމުން ފުވައްމުލަކު މެދު ދާއިރާގެ މެމްބަރު، ހުސެއިން މުޙައްމަދު ދީދީ ވިދާޅުވީ އެންޓި ކޮރަޕްޝަން ކޮމިޝަނުން ބަލަމުންދާ މައްސަލަތައް ލަސްވުމުން އެސްއޯއީ ކޮމިޓީގެ ބައެއް މަސައްކަތްތަށް ކުރިއަށްގެންދިޔުމަށް ދަތިވެފައިވާކަމަށެވެ.
" ކޮމިޓީއިންވެސް ނުނިމިގެން މިއުޅެނީ، ކޮމިޓީގައި އޮތް މޯލްޑިވްސް ގޭސްގެ މައްސަލަ، އޮކްޓޫބަރު 2019ގައި އެތަނުގެ އެމްޑީވަނީ ސަސްޕެންޑުކޮށްފައި، ނުވަ މަސް ދިޔައިރު، އެސީސީއަކަށް އެކަމާއި ގުޅޭ ރިޕޯޓެއް ނުނެރެވޭ، މިހާ ޒިންމާދާރުކަން ކުޑަކޮށް މިތަން ހިންގަންޔާ އެބަޖެހޭ، މަޖްލީހަށް ހާޒިރުކޮށް ޖަވާބު ދާރީ ކުރުވަން،" ހުސެއިން މުޙައްމަދު ދީދީ ވިދާޅުވިއެވެ.
ކުންފުނިތަކުގެ ހިންގުމަށް އަސަރުކޮށްފައިވުމުން ދައުލަތަށް މާލީގޮތުން ބޮޑު ގެއްލުންތަކެއް ވަމުންދާކަމަށްވެސް މެމްބަރުން ވިދާޅުވިއެވެ. ކޮމިޓީގެ އެހެން މެމްބަރުންވެސް ވަނީ އޭސީސީ ކޮމިޓީއަށް ހާޒިރުކުރުމަށް ތާއީދުކޮށްފައެވެ.
އެސީސީ ހާޒިރުކުރުމަށް ހަމަޖެހިފައިވަނީ އެމްއޭސީއެލްގެ ސީޕްލޭން ޓަރމިނަލް ވަކި ބަޔަކަށް ނުދީ ހުއްޓުވާފައި އޮތް މައްސަލައާއި ގުޅޭގޮތުންނާއި، މޯލްޑިވްސް ގޭސްގެ މައްސަލައެއްގެ އިތުރުން އައިލެންޑް އޭވިއޭޝަންގެ ޕްރޮޖެކްޓެއް ހުއްޓުވާލާފައި އޮތް މައްސަލައިގައި ވަކި ގޮތެއް ނުނިންމާ ލަސްވަމުންދިޔުމާއި ގުޅޭގޮތުން ސުވާލު ކުރުމަށެވެ.