ސްރީ ލަންކާގައި ރާއްޖެ ނާދެވިފައިވާ ތިބި ދިވެހިން ގެނައުމަށް އަންނަ ބުދަ ދުވަހު ޙާއްސަ ދަތުރެއް ބޭއްވުމަށް މޯލްޑިވިއަނުން ނިންމައިފިއެވެ.
ކޯވިޑް-19އާ ގުޅިގެން އަވަށްޓެރި ޤައުމުތަކުގައި ރާއްޖެއަށް ނާދެވި ތާށިވެފައިތިބި ދެވެހިން ރާއްޖެއަށް ގެނައުމުގެ މަސައްކަތް މޯލްޑިވިއަނުންދަނީ ކުރަމުންނެވެ. އެގޮތުން މިދިޔަމަހުގެތެރޭގައިވެސް ވަނީ ސްރީލަންކާއިން ރާއްޖެއަށް ނާދެވިފައިތިބި ދިވެހިން ރާއްޖެ ގެނެސްފައެވެ.
މޯލްޑިވިއަންއިން ބުނީ 3335544 އަށް ގުޅައިގެން ނުވަތަ ވައިބަރ މެދުވެރިކޮށްވެސް ލަންކާއިން ރާއްޖެއަށް ކުރާ ދަތުރާއި ގުޅޭގޮތުން މައުލޫމާތު ސާފުކުރެވެނޭކަމަށެވެ. މިދަތުރުކުރުމަށް ހަމަޖެހިފައިވަނީ 200 ސީޓުގެ ފްލައިޓެއްގައެވެ.
ބޭސްފަރުވާ ނިންމުމަށްފަހު ރާއްޖެ ނާދެވި އިންޑިއާގައި ތާށިވެފައި ތިބި 91 ދިވެހިން ވަނީ ދާދިފަހުން މޯލްޑިވިއަންގެ ފްލައިޓެއްގައި ރާއްޖެ ގެނެސްފައެވެ. މޯލްޑިވިއަނުން ހާމަކުރާ ގޮތުގައި ކޯވިޑް-19އާ ގުޅިގެން ބޭރުގެ ޤައުމުތަކުގައި ރާއްޖެއަށް ނާދެވިފައިތިބި ދިވެހިން ގެނައުމަށް މިހާތަނަށް 38 އަށްވުރެ ގިނަ ދަތުރުކޮށް، 4000 އަށްވުރެ ގިނަ ދިވެހިން ރާއްޖެއަށް ގެނެސްފައިވާނެއެވެ.