އައްޑޫ ސިޓީގެ ރަށްތަކަށް އުދަ އަރަނީ

އައްޑޫ ސިޓީގެ ބައެއް ރަށްތަކަށް އުދަ އަރައި ގެއްލުންތަކެއް ވެއްޖެއެވެ.

ދިޔަވަރު ބޮޑުވާ ވަގުތުތަކުގައި އައްޑޫގެ ގުޅިފައިވާ ރަށްތަކަށް މިއަދުވެސް ވަރަށްބޮޑަށް އުދައަރާފައިވެއެވެ. މިކަމުގެ ސަބަބުން ބައެއް ސަރަހައްދު ތަކުގެ ހޭޅިފަށަށް ވަނީ ގެއްލުންވެފައެވެ.

މިކަމާ ގުޅިގެން ޕީއެސްއެމް ނިއުސްއަށް މަޢުލޫމާތު ދެއްވަމުން އައްޑޫސިޓީގެ މޭޔަރު ޢަބްދުﷲ ޞާދިޤް ވިދާޅުވީ، އައްޑުއަށް އުދަ އަރައި ލިބެމުންދާ ގެއްލުންތައް ކުޑަކުރުމަށް ވެލި އަޅަން ޖެހޭ ސަރަހައްދުތަކަށް އެމްޓީސީސީއާ ގުޅިގެން ވެލި އަޅަމުންދާ ކަމަށެވެ. އަދި އެސަރަހައްދުތަކުގެ ގޭގެއަށް ލޮނުގެ އަސަރު ކުރާނަމަ ވެލި ބަސްތާ ޖެހުމުގެ މަސައްކަތް ވެސް ކުރިއަށް ގެންދާނެކަމަށް މޭޔަރ ވިދާޅުވިއެވެ. އުދައިގެ ސަބަބުން ލިބެމުންދާ ގެއްލުންތަށް ކައުންސިލުން ބަލަމުންދާނެ ކަމަށްވެސް އޭނާ ވިދާޅުވިއެވެ.

އައްޑޫގައި އެންމެ ބޮޑަށް އުދައިގެ އަސަރު ކޮށްފައިވަނީ ހިތަދޫ، މަރަދޫ އަދި މަރަދޫ ފޭދު އަށެވެ.

މިކަމާއި ގުޅިގެން މޫސުމާއި ބެހޭ ޤައުމީ އިދާރާއިން އުދަ އަރާނެ ކަމަށް ބަލައި ދެކުނު ރައްތަކަށް ހަވީރު 4:30 އިން ފެށިގެން ރޭގަނޑު 8:30 ހަމައަށް ރީނދޫ ސަމާލު ނެރެފައެވެ.

މޫސޫމާ ބެހޭ ޤައުމީ އިދާރާއިން ބުނެފައިވަނީ ރާއްޖެއާއި ދުރުން އިންޑިއާ ކަނޑުގައި އުފެދިފައިވާ ބާނިތަކުގެ އަސަރު ކުރިއަށް އޮތް ތިން ދުވަހުވެސް ރާއްޖެއަށް ކުރާނެ ކަމަށެވެ. އެއިދާރާއިން ވަނީ އުދައިގެ އަސަރު، މެދު ރާއްޖެ އަދި ދެކުނުގެ އަތޮޅުތަކަށް ކުރާނެ ކަމަށް ބުނެފައެވެ. އަދި ރާޅުގެ އުސްމިނުގައި 3 ފޫޓާއި 6 ފޫޓު ހުންނާނެ ކަމަށް އެއިދާރާއިން ލަފާ ކުރެއެވެ.