ރާއްޖެއަށް މިހާރު ކުރަމުންދާ ވިއްސާރައިގައި ދެކުނުގެ ދެ ސިޓީގެ ބައެއް ގެތަކަށް ފެން ވަދެއްޖެއެވެ.
އެގޮތުން ފުވައްމުލަކު ސިޓީގެ 15 ގެއަކަށް ފެންވަދެގެން މިހާތަނަށް ރިޕޯޓު ކޮށްފައިވާ ކަމަށް ސިޓީ ކައުންސިލުން ޕީއެސްއެމް އަށް ވަނީ ކަށަވަރު ކޮށްދީފައެވެ. އަދި މިކަމާއި ގުޅިގެން އެމްއެންޑީއެފް އާއި ކައުންސިލް ގުޅިގެން އެހީތެރިކަން ފޯރުކޮށްދެމުންދާ ކަމަށް ކައުންސިލުން ބުނެއެވެ.
މިކަމާއި ގުޅިގެން އެމްއެންޑީއެފް އިން ވިދާޅުވީ ރާއްޖެއަށް ކުރަމުންދާ ވިއްސާރައިގެ ސަބަބުން ފުވައްމުލަކުގެ 8 ގެއަކަށް ފެންވަނުމާއި ގުޅިގެން ވެލި ބަސްތާ ޖަހާދީފައިވާ ކަމަށެވެ. އަދި ވައިގަދަ ވުމާއި ގުޅިގެން ބައެއް ގަސްތައް ވެއްޓުމާއި އެކު ގަސްތަށް ނަގާފައިވާ ކަމަށްވެސް އެމްއެންޑީއެފްއިން ވިދާޅުވެއެވެ.
މީގެ އިތުރުން އައްޑޫސީޓީ ފޭދޫ ގެއަކަށް ވެސް ފެން ވަނުމާއި ގުޅިގެން އެހީތެރިކަން ފޯރުކޮށްދީފައިވާ އެމްއެންޑީއެފް އިން މައުލޫމާތުދެއެވެ. ރާއްޖޭގެ ބޮޑު ސަރަހައްދަކަށް މޫސުން ގޯސްވެފައި ވާއިރު، ދެކުނުގެ ބައެއް ރަށްތަކަށް އުދައިގެ އަސަރު ވެސް ކޮށްފައެވެ. އެގޮތުން އައްޑޫސިޓީ މީދޫ ކޯގަންނު ގަބުރުސްތާނު ސަރަހައްދަށް ވަނީ އުދައިގެ އަސަރު ކޮށްފައެވެ.
ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން ރާއްޖޭގެ ބޮޑުބަޔަކަށް ވަނީ ޔެލޯ އެލާޓު ނެރެފައެވެ. އެގޮތުން މިރޭ 00:00 އާއި ހަމައަށް ބ. އަތޮޅުން ފެށިގެން އައްޑޫސިޓީ އާއި ހަމައަށް ޔެލޯއެލާޓު ނެރެފައެވެ. އަދި މީގެ އިތުރުން ހ.އ އިން ބ. އަތޮޅާއި ހަމައަށް ވައިޓް އެލާޓް ވަނީ ނެރެފައެވެ. މޫސުން ގޯސްވުމާއި ގުޅިގެން ކަނޑު ދަތުރު ކުރާ ފަރާތްތަކުން އެކަމަށް ސަމާލުވުމަށް މޫސުމާއި ބެހޭ އިދާރާއި ވަނީ އިލްތިމާސްކޮށްފައެވެ.