ފަތުރުވެރިންނަށް ޙިދުމަތްދޭ ރިސޯޓްތަކުގައި ޗުއްޓީ ދިވެހިން ޗުއްޓީ ހޭދަކުރުން މަނާކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.
ޓޫރިޒަމް މިނިސްޓްރީން ވިދާޅުވީ، ކޯވިޑް19 ހުއްޓުވުމަށް އަޅާ ފިޔަވަޅެއްގެ ގޮތުން ފަތުރުވެރިންނަށް ޙިދުމަތްދޭ ރިސޯޓްތަކުގައި ދިވެހިން ޗުއްޓީ ހޭދަކުރުމާއި، ފަތުރުވެރިންނަށް ޙިދުމަތްދޭ އެއްވެސް ފެސިލިޓީއެއް ދިވެހިން ބޭނުންކުރުމަކީ މަނާކަމެއްކަމަށެވެ. އަދި ވަކިގޮތެއް އަންގަންދެން މިގޮތަށް އަމަލުކުރުމަށް ޓޫރިޒަމް މިނިސްޓްރީން ވަނީ ފަތުރުވެރިންނަށް ޙިދުމަތްދޭ ހުރިހާ ތަނަކަށް އަންގާފައެވެ.
ރާއްޖޭގެ ބޯޑަރު އަލުން ހުޅުވާލައި ރާއްޖޭގެ ފަތުރުވެރިކަން އަލުން ފަށާފައިވާއިރު، ކޯވިޑް19 ފެތުރުން ކޮންޓްރޯލް ކުރުމަށް އެޗްޕީއޭއިން ވަނީ ޙާއްސަ ގައިޑްލައިނެއްވެސް ނެރެފައެވެ. މި ގައިޑްލައިންގައިވާ ގޮތުން ރާއްޖެއަށް ޗުއްޓީ ހޭދަކުރުމަށް އަންނަ ފަތުރުވެރިން ތިބެންޖެހޭނީ އެމީހަކު ބުކިން ހައްދައިގެން އަންނަ ރިސޯޓެއްގައި އެކަންޏެވެ. އެއް ރިސޯޓުން އަނެއް ރިސޯޓަށް ދިއުމަކީ މަނާކަމެކެވެ. މި އުސޫލުގެ ދަށުން ސަފާރީއެއްގައި ޗުއްޓީ ހޭދަކުރަން އަންނަ ފަތުރުވެރިއަކަށްވެސް ޗުއްޓީ ހޭދަކުރެވޭނީ ހަމައެކަނި އެ ސަފާރީއެއްގައެވެ.
ރިސޯޓްތަކުގައި މަސައްކަތްކުރާ މުވައްޒަފަކު މީހުން ދިރިއުޅޭ ރަށަކަށްދާނަމަ އެ ރަށެއްގައި 14 ދުވަހުގެ ކަރަންޓީނެއް ފުރިހަމަ ކުރަންޖެހެއެވެ.
ރާއްޖޭގައި ހިންގާ ރިސޯޓްތަކާއި ސަފާރީތައް އަދި މާލެ ސަރަހައްދުގެ ބައެއް ގެސްޓްހައުސްތައް މިހާރު ވަނީ ރާއްޖެ އަންނަ ފަތުރިވެރިންނަށް ޙިދުމަތްދިނުމަށް ހުޅުވާލާފައެވެ.