އައްޑޫސިޓީ ހިތަދޫގެ ހުރިހައި ސްކޫލެއްގެ ކިޔެވުން ކުރިއަށް އޮތް 2 ދުވަހަށް މެދު ކަނޑާލައިފިއެވެ.
ސްކޫލްތަކުގެ ކިޔެވުން މެދުކަނޑާލާފައިވާކަން، މިހާރު ސްކޫލްތަކުން ބެލެނިވެރިންނަށް ދަނީ އަނގަމުންނެވެ. އަދި މިއަދު މެނދުރު ފަހުގެ ސެޝަންގެ ކިޔެވުންވެސް ބައެއް ސްކޫލުތަކުގައި ވަނީ މެދުކަނޑާލާފައެވެ. ހިތަދޫގެ ސްކޫލު ތަކުގެ ކިޔެވުން މެދު ކަނޑާލާފައި ވުމާއި ގުޅިގެން ޕީއެސްއެމް ނިއުސްއިން ދެންނެވި ސުވާލަކަށް ޖަވާބު ދެއްވަމުން ކޯވިޑް-19ގެ ޙާލަތާ ގުޅިގެން އައްޑޫ ސްކޫލްތަކުގެ ކަންކަން ބަލަހައްޓަވާ ކޯޑިނެޓަރ، އައްޑޫ ހައި ސްކޫލުގެ ޕްރިންސިޕަލް އިބްރާހީމް ނަދީމް ވިދާޅުވީ، މިވަގުތު މެދު ކަނޑާލާފައިވަނީ ހަމަ އެކަނި ހިތަދޫގެ ސްކޫލުތަކުގެ ކިޔެވުން ކަމަށެވެ.
އެހެން ކަމުން އައްޑޫގެ އެހެން ރައްތަކުގެ ސްކޫލު ތަކުގައި ކިޔެވުން ކުރިއަށް ގެންދާނެ ކަމަށް އޭނާ ވިދާޅުވިއެވެ. ނަދީމް ވިދާޅުވީ، މިވަގުތު ހިތަދޫގެ ސްކޫލުގެ ތަކުގެ ކިޔެވުން ދެދުވަހަށް މެދު ކަނޑާލާފައިވަނީ ހިތަދޫގައި ހޯމް ކަރަންޓީނުގައި ހުރި ބިދޭސީއަކު ކޯވިޑް-19އަށް ޕޮޒިޓިވްވުމާ ގުޅިގެންނެވެ.
މިމީހާ އަކީ އައްޑޫ ހައިސްކޫލުގެ ހޯލް ހެދުމުގެ މަސަތްކަތް ކުރަމުންދާ ކުންފުންޏަށް ނިސްބަތްވާ މީހެއްކަމަށް މައުލޫމާތު ލިބެއެވެ. އޭނާ ޕޮޒިޓިވް ވެފައި ވަނީ ހޯމް ކަރަންޓީނުގެ 14 ދުވަސް ހަމަ ވުމަށް ފަހު ކުރި ދެވަނަ ޓެސްޓުގެ ނަތީޖާއިންނެވެ.
ހިތަދޫ އިން ޕޮޒިޓިވްވި މީހާގެ އިތުރުން ފޭދޫގައި ހޯމް ކަރަންޓީނުގައިހުރި ފުލުހަކުވެސްވަނީ އީއްޔެރޭގެ ވަގުތެއްގައި ޕޮޒިޓިވްވެފައެވެ. އޭނާ ޕޮޒިޓިވްވީ މާލޭގައި ނެގި ރެންޑަމް ސާމްޕަލެއްގެ ނަތީޖާއިން ކަމަށް އޭއީއެޗް އިން ވިދާޅުވެއެވެ.