ރާއްޖެއާ
ފިލިޕީންސްއާއި ބައްދަލްކުރާ މެޗަކީ ރަޙުމަތްތެރިކަމުގެ މެޗަކަށްވީނަމަވެސް
ރާއްޖެއިން ފިލިޕީންސްގެ ކިބައިން ބަދަލު ހިފަން ބޭނުންވާކަމަށް ރާއްޖޭގެ ކޯޗް
އިސްމާއިލް މަޙުފޫޒް ބުނެފި.
ރާއްޖެއާއި
ފިލިޕީންސްއާއި ޗެލެންޖް ކަޕުގެ ސެމީފައިނަލްގައި ރާއްޖޭގައި ކުޅުނު މެޗުން ރާއްޖެ ބަލިވީ ދޭއް
އެކަކުންނެވެ. މަހުފޫޒް ބުނީ ފުޓްބޯޅައިގައި އަބަދުވެސް ބަދަލު ހިފަން
ބޭނުންވާނެކަމަށެވެ.
މިއަދު
އޮތް ނޫސްވެރިންގެ ބައްދަލްވުމުގައި ވާހަކަދައްކަމުން މަހުފޫޒް ބުނީ
ރާއްޖެއަށްވުރެ ފިލިޕިންސްއަކީ މޮޅު ޓީމެއްކަމަށާ އެކަމަކުވެސް ރާއްޖެއިން
މަސައްކަތްކުރާނީ ފިލިޕީންސް އަތުން މޮޅުވުމަށްކަމަށެވެ.
ރާއްޖެއިން
މާދަމާ ފިލިޕީންސްއާއެކު ކުޅޭ މެޗަކީ ވޯލްޑްކަޕް ކޮލިފިކޭޝަނުގައި ޗައިނާޔާއެކު
ކުޅޭ މެޗަށް ތައްޔާރުވުމަށް ކުޅޭ މެޗެކެވެ. ފިލިޕީންސްގައި ކޭމްޕްކުރަމުންދާ ދިވެހި
ޓީމް ފިލިޕީންސްގައި ކުޅުނު ފުރަތަމަ މެޗުގައި ބައްދަލްކުރީ ފުރަތަމަ ޑިވިޜަނުގެ
ޓީމެއްކަމަށްވާ ސްޓެލިއޮން އެފްސީއާއެވެ. އެ މެޗް ނިމުނީ ދޭއް ދޭކުން ދެ ޓީމް
އެއްވަރުވެގެންނެވެ.
ވަގުތީ
ގޮތުން ޤައުމީ ޓީމާ ހަވާލުވެހުރި އެސިސްޓެންޓް ކޯޗް މަހުފޫޒް ބުނީ މާދަމާގެ
މެޗުގައި ރާއްޖެ ކުޅޭނީ ޗައިނާޔާއެކު ކުޅެން ބޭނުންވާ ގޮތަށްކަމަށެވެ. އަދި މި
މެޗަކީ ވަރަށް މުހިންމު މެޗެއްކަމަށްވެސް މަހުފޫޒް ފާހަގަކުރިއެވެ.
"މީ
ވަރަށް މުހިންމު މެޗެއް. އެއީ ކުޅުންތެރިންގެ މޯޓިވޭޝަން ރަނގަޅުވުމާއި، އަދި
ކުޅުންތެރިންނަށް އިތުރަށް ކޮންފިޑެންސް ލިބުމާއި، މިކަހަލަ ހުރިހާ ކަމަކަށް
ބަލާފަ އަޅުގަނޑު ބުނާނީ މި މެޗަކީ އެންމެ މުހިންމު އެއް މެޗޭ ވަރުގަދަ ޓީމްތަކާއި
ކުރިމަތިލާއިރުގަ" އިސްމާއިލް މަހުފޫޒު ބުންޏެވެ.
ޓީމުގެ
މުހިންމު ކުޅުންތެރިޔެއްކަމަށްވާ އަކްރަމް އަބްދުލް ޢަނީ ބުނީ ޗައިނާ މެޗުގެ
ކުރިން މި ލިބެނީ ރަނގަޅު މެޗެއްކަމަށް. އަދި ފިލިޕީންސް އަތުން މޮޅުވުމަކީ
ފަސޭހަކަމަކަށް ނުވާނެ ކަމަށެވެ.
"ޗައިނާ
މެޗުގެ ކުރިން ވަރުގަދަ މެޗެއް ލިބުމަކީ އަސްލު ވަރަށް ރަނގަޅު ޗާންސެއް ކަންނޭގެ.
މާދަމާގެ މެޗުން ރަނގަޅު ނަތިޖާއެއް ނެރެގެން ޗައިނާޔަށް ދިއުން ވަރށް
މުހިންމު" އަކްރަމް އަބްދުލް ޢަނީ ބުންޏެވެ.
ރާއްޖެއާ ފިލިޕީންސް ވާދަކުރާ މެޗް ފަށާނީ މާދަމާ ރާއްޖެ ގަޑިން ހަވީރު ފަސް ގަޑި ސުންމިނިޓްގައެވެ.