އައްޑޫސިޓީން ހިތަދޫއިން 4ވަނަ މީހަކު ކޯވިޑް-19 އަށް ޕޮޒިޓިވްވެއްޖެއެވެ.
ޕޮޒިޓިވްވީ ހިތަދޫގައި ހޯމް ކަރަންޓީނުގައި ހުރި ޢުމުރުން 38 އަހަރުގެ ދިވެހި ފިރިހެނެކެވެ. އޭނާ ޕޮޒިޓިވް ވެފައިވާކަން ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ)އިން ވަނީ ކަށަވަރު ކޮށްދެއްވާފައެވެ.
އޭނާ ޕޮޒިޓިވްކަން ހާމަވީ ހޯމް ކަރަންޓީނުގެ 14 ދުވަސް ހަަމަ ކުރުމަށް ފަހު މިދިޔަ ބުރާސްފަތި ދުވަހު ނެގި ސާމްޕަލުންނެވެ. އައްޑޫ އިކުއިޓޯރިއަލް ހޮސްޕިޓަލުން ވިދާޅުވީ މިމީހާގެ ކޮންޓެކްޓް ޓްރޭސިން މަސައްކަތް މިހާރު ފަށާފައިވާ ކަމަށެވެ.
މިއީ އައްޑުއިން ޕޮޒިޓިވްވި 4ވަނަ މީހާއެވެ. މިހާތަނަށް ހިތަދޫ ހޯމް ކަރަންޓީނުގައި ތިބި 3 މީހަކު ވަނީ ޕޮޒިޓިވް ވެފައެވެ. ދެން ޕޮޒިޓިވްވި މީހާ އަކީ ފޭދޫގައި ހޯމް ކަރަންޓީނުގައި ހުރި މީހެކެވެ.
މާލެ ސަރަޙައްދުން ރަށްރަށަށް ދާ މީހުން ޕޮޒިޓިވް ވަމުން އަންނަ އިރު، އެރަށެއް މޮނީޓަރިންއަށް ލާނީ ހޯމް ކަރަންޓީނުގައި ހުރި ފަރާތް ހޯމް ކަރަންޓީނު އުސޫލާ ޙިލާފުވެފައިވާ ކަމަށް ޝައްކު ކުރެވޭ ހާލަތެއްގައެވެ.