އައްޑޫ ސިޓީ، މީދޫ ބަނދަރު ހެދުމުގެ މަސައްކަތު ބޮޑުބައި ނިމިފައިވާ ކަމަށް މިމަސައްކަތާއި ހަވާލުވެފައިވާ އެމްޓީސީސީން ހާމަކޮށްފިއެވެ.
މިދިޔަ އަހަރު އޮކްޓޯބަރު މަހު ޢަމަލީ މަސައްކަތް ފަށާފައިވާ މިބަނދަރުގެ މަސައްކަތުގެ މިހާތަނަށް %71 ނިމިފައިވާ ކަމަށް އެކުންފުނިން ހާމަކުރެއެވެ. އެގޮތުން މިހާތަނަށް އެއްގަމު ތޮށީގެ ގައު އެތެރުމުގެ މަސައްކަތް އެއްކޮށް ނިމިފައިވާ ކަމަށާއި، އެއްގަމުގެ ތޮށީގެ މިހާރު ކުރިއަށް ދަނީ ކެޕިންގް ބީމްގެ މަސައްކަތް ކަމަށްވެސް އެކުންފުނިން ބުނެއެވެ. މިމަސައްކަތުގެވެސް ދެބައިކުޅަ އެއްބައި ވަނީ ނިންމާލާފައެވެ.
މިމަޝްރޫއުގެ ދަށުން، 61،396 ކިއުބިކް މީޓަރަށް ބަނދަރު ފުން ކުރުމަށް ވަނީ ހަމަޖެހިފައެވެ. މީގެ އިތުރުން 115 މީޓަރުގެ ސަރައްހައްދެއްގައި ބޮޑުގަލުން ބޭރުތޮށްޓެއް ލުމާއިއެކު 621 މީޓަރުގެ އެއްގަމު ތޮށްޓެއް ލުމަށް ވަނީ ހަމަޖެހިފައެވެ. އަދި މިމަޝްރޫޢު ތެރޭގައި 3،150 އަކަމީޓަރުގެ ސަރަހައްދެއްގައި، ޕޭވްމެންޓު ހަދައި، މަގުބައްތި ޖަހައި ރޭމްޕް އެޅުމުގެ މަސައްކަތް ކުރުމަށްވެސް ވަނީ ހަމަޖެހިފައެވެ.
މީދޫ ބަނދަރުހެދުމުގެ މަޝްރޫޢު އެމްޓީސީސީއާ ހަވާލު ކުރީ މިދިޔަ އަހަރު ޖޫން މަހުގެ ތެރޭގައެވެ. މިމަޝްރޫއަށް 33.4 މިލިއަން ރުފިޔާ ޚަރަދު ވާނެ ކަމަށް އެކުންފުނިން ލަފާކުރެއެވެ.