ބްރޯޑްކާސްޓް ކުރުމާއި އަދި ރީ ބްރޯޑްކާސްޓް ކުރުމުގެ ލައިސަންސް ހޯދުމަށް ހުށައެޅުމުގެ ފުރުޞަތު މޯލްޑިވްސް ބްރޯޑްކާސްޓީން ކޮމިޝަނުން ހުޅުވާލައިފިއެވެ.
ލައިސަންސަށް އެދި ހުށައެޅުމަށް ބޭނުންވާ ފަރާތްތަކަށް، އެކަމަށް އެދި ހުށައެޅުމުގެ ފުރުޞަތު 2025 އޮކްޓޫބަރ 04 ދުވަހާއި ހަމައަށް އޮންނާނެއެވެ.
ބްރޯޑްކާސްޓިން ދުވަހާއި ގުޅިގެން ބްރޮޑްކޮމްއިން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ބްރޯޑްކާސްޓިން ކޮމިޝަންގެ ރައީސާ މަރިޔަމް ވަހީދާ ވިދާޅުވީ، މޯލްޑިވސް ބްރޯޑް ކާސްޓިން ކޮމިޝަން އުފެދުނީއްސުރެ މިހާތަނަށް 39 ފަރާތްތަކަށް ބްރޯޑްކާސްޓް ކުރުމުގެ ހުއްދަ ދީފައިވާކަމަށެވެ. މީގެ ތެރޭގައި 11 ރޭޑިއޯ ޗެނަލް އަދި 28 ޓީވީ ޗެނަލް ހިމެނޭކަމަށެވެ. މަރިޔަމް ވަހީދާ ވިދާޅުވީ 121 ފަރާތަކުން ރާއްޖޭގައި ރީބްރޯޑްކާސްޓް ކުރުމުގެ މަސައްކަތް ކުރަމުން އަންނަކަމަށެވެ. އަދި މުޅި ރާއްޖޭގައި ރީބްރޮޑްކާސްޓުކުރުމުގެ ލައިސަންސް 5 ފަރާތަކަށް ދޫކުރެވިފައިވާ ކަމުގައިވެސް މަރިޔަމް ވަހީދާ ވިދާޅުވިއެވެ.
" ބްރޯޑްކާސްޓީން އަދި ރީބްރޯޑްކާސްޓް ކުރުމަށް އެދި ލައިސަންސް ހޯދުމަށް ހުށައެޅުމުގެ ފުރުޞަތު މިވަނީ ހުޅުވާލާފައި . ބްރޯޑްކާސްޓުކުރުމަކީ ވަރަށް ބުރަ އަދި އަގުހުރި މަސައްކަތެއް. މިދާއިރާ ކުރިއަށް ގެންދިޔުމަށްޓަކައި ވަރަށް ބައިވަރު މަސައްކަތްތަކެއް ކުރަން އެބަޖެހޭ. މީގެ ތެރޭގައި ފައިސާގެ އެހީއާއި ތަމްރީންތައް މިހާރަށްވުރެ ގިނައިން ދޭންއެބަޖެހެ. އަދި ބައިނަލް އަޤްވާމީ ފެންވަރުގައިވެސް ތަމްރީންތަކެއް ދޭން އެބަޖެހޭ." މޯލްޑިވްސް ބްރޯޑްކާސްޓީން ކޮމިޝަންގެ ރައީސާ މަރިޔަމް ވަހީދާ ވިދާޅުވިއެވެ.
ނޫސްވެރިންގެ ބައްދަލުވުމުގައި މަރިޔަމް ވަހީދާ ވިދާޅުވީ، މިހާތަނަށް އައިއރު 653 މައްސަލައެއް އެ ކޮމިޝަނަށް ހުށައެޅިފައިވާކަމަށެވެ. އޭގެ ތެރޭގައި ބްރޯޑްކާސްޓްކުރާ ކޮންޓެންޓާއި ގުޅުން ހުރި 242 މައްސަލަ ވަނީ ހުށައަޅާފައެވެ. އަދި ލައިސަންސްގެ މައްސަލައާއި ގުޅުން ހުރި 327 މައްސަލައެއްވެސް ހުށައަޅާފައި ވާކަމަށް އޭނާ ވިދާޅުވިއެވެ. މި ޝަކުވާތަކުގެ ތެރެއިން މިހާރުވެސް 32 ޝަކުވާއެއް ބަލަމުން އަންނަކަން ފާހަގަކުރައްވައި މަރިޔަމް ވަހީދާ ވިދާޅުވީ، މީގެ ތެރޭގައި ލައިސަންސާއި ގުޅުންހުރި 21 މައްސަލައަކާއި ކޮންޓެންޓާއި ގުޅޭ 5 މައްސަލައިގެ އިތުރަށް ޚިދުމަތްތަކާއި ގުޅުންހުރި 6 މއްސަލަ ހިމެނޭކަމަށެވެ.