މޯލްޑިވްސް އިމިގްރޭޝަންގެ މަސައްކަތްތައް އިތުރަށް ހަރުދަނާކުރުމުގެ ގޮތުން ކުރިއަށް އޮތް ފަސް އަހަރަށް އެކުލަވާލާފައިވާ "ސްޓްރެޓީޖިކް ޕްލޭން 2020-2024" ތަޢާރަފުކޮށްފިއެވެ.
މި ޕްލޭން އިފްތިތާޙް ކޮށްދެއްވީ މިނިސްޓަރ އޮފް އިކޮނޮމިކް ޑިވެލޮޕްމަންޓް އަލްއުސްތާޛް ފައްޔާޟް އިސްމާއީލްއެވެ. އިމިގްރޭޝަނުން ވިދާޅުވީ މި ސްޓްރެޓީޖިކް އެކްޝަން ޕްލޭނަކީ ފާއިތުވި 12 އަހަރުގެ ތެރޭގައި މޯލްޑިވްސް އިމިގްރޭޝަނުން ޝާޢިއުކުރި ފުރަތަމަ އިސްތިރާޖީ ޕްލޭންކަމަށެވެ. މި ޕްލޭންގެ މަޤްސަދަކީ، ދުރު ރާސްތާ އަމާޒަށް ވާސިލުވުމަށްޓަކައި ޙިކުމަތްތެރިކަމާއެކު މަސައްކަތްތައް ރާވައި، އިމިގްރޭޝަންގެ ޚިދުމަތްތައް އިތުރަށް ތަރައްޤީ ކުރުމަށް ގެންނަންޖެހޭ ބަދަލުތަކާއެކު ކަމާއިގުޅުންހުރި އިދާރާތަކާއި ގުޅިގެން، މި ޕްލޭނާ އެއްގޮތަށް އިމިގްރޭޝަންގެ މަސައްކަތްތައް ތަންފީޒުކުރުމެވެ.
މި ޕްލޭން އިފްތިތާހް ކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އިކޮނޮމިކް މިނިސްޓަރ ފައްޔާޟް އިސްމާޢީލް ވަނީ ރާއްޖެ އަންނަ ކޮންމެ މީހަކަށްވެސް ލޯތްބާއި އިޙްތިރާމާއެކު ޚިދުމަތް ފޯރުކޮށްދިނުމަށް އިލްތިމާސްކުރައްވާފައެވެ. މިނިސްޓަރ ވިދާޅުވީ ބޯޑަރ ކޮންޓްރޯލްކުރުމަށް ހަރުދަނާ ފިޔަވަޅުތަކެއް އެޅިނަމަވެސް ރާއްޖެއަންނަ މީހުންނަށްވެސް ފަސޭހައިން ޚިދުމަތް ލިބޭނެ އިންތިޒާމްތަކެއް ހަމަޖެއްސުމަކީ މުހިއްމު ކަމެއްކަމަށެވެ. އަދި ބިދޭސީންގެ މައްސަލަތާކައެކު ސަރުކާރުގެ މިސްރާބު މިހާރު ހުރީ ދިމާވާ މައްސަލަތައް ހައްލުކޮށް ކުރިއަށް ދިއުމަށްކަން ފާހަގަކުރައްވައި މިނިސްޓަރ ވިދާޅުވީ ޤާނޫނުތަކާއި ޤަވާއިދުތަކަށް ގެނައި ބަދަލުތަކާއެކު ޤަވައިދާ ޚިލާފަށް އުޅޭ ބިދޭސީންގެ މައްސަލަތައް ހައްލުވާނެކަމަށް ޤަބޫލުކުރައްވާކަމަށެވެ.
މި ރަސްމިއްޔާތުގައި ވާހަކަދައްކަވަމުން ކޮންޓްރޯލާ ޖެނަރަލް އޮފް އިމިގްރޭޝަން މުޙައްމަދު އަޙްމަދު ޙަސަން ވިދާޅުވީ ޤައުމަށް އިޤްތިޞާދީ ގޮތުން ދިމާވެފައިވާ ގޮންޖެހުންތަކާއެކުވެސް ބޯޑަރ ހުޅުވައި ޚިދުމަތްދިނުމުގައި އިމިގްރޭޝަނުން ނަމޫނާ ދައްކާފައިވާކަމަށެވެ. އަދި ސަރުކާރުން ފަތުރުވެރިކަން ކިތަންމެ ވަރަކަށް ޕްރޮމޯޓް ކުރުމަށް މަސައްކަތް ކުރިނަމަވެސް އިމިގްރޭޝަނުންދޭ ޚިދުމަތްތައް ރަނގަޅަށް ނުދެވޭނަމަ އޭގެ ނަތީޖާ ނުފެންނާނެކަމަށްވެސް އޭނާ ވިދާޅުވިއެވެ.
އިމްގްރޭޝަނުން އެކުލަވާލި މި ޕްލޭނަކީ ސަރުކާރުގެ މެނިފެސްޓޯ ތަންފީޒުކުރުމަށްޓަކައި ސަރުކާރުގެ ވަޢުދުތަކާއި އެއްގޮތްވާނޭހެން އެކުލަވާލާފައިވާ އިސްތިރާޖީ ޕްލޭނެކެވެ. މި އިސްތިރާޖީ ޕްލޭންގައި މައިގަނޑު ހަތަރު ދާއިރާއަކަށް އަލިއަޅުވާލާފައިވެއެވެ. އެގޮތުން އިމިގްރޭޝަންގެ ޚިދުމަތްތައް ލާމަރުކަޒީކޮށް ހަމަހަމަކަމާއިއެކު ރައްޔިތުންނަށް ލުއިފަސޭހަ ޚިދުމަތްތަކެއް ފޯރުކޮށްދިނުމާއި، އޮފިސަރުންގެ ޤާބިލުކަން އިތުރުކުރުމުގެ ގޮތުން ތަމްރީން ޕްރޮގްރާމްތަކާއި ތަޢުލީމީ ފުރުޞަތުތައް ފަހިކޮށްދިނުން ހިމެނެއެވެ. މީގެ އިތުރުން ވައިގެ މަގުންނާއި ކަނޑުގެ މަގުން ރާއްޖެ އަންނަ އަދި ރާއްޖެއިން ފުރާ ފަރާތްތަކަށް އިމިގްރޭޝަން ކްލިއަރެންސް ދިނުމުގެ ޚިދުމަތް އިތުރަށް ހަރުދަނާކޮށް ލުއިފަސޭހަ ކޮށްދިނުމާއި، ރާއްޖޭގެ މައިގްރޭޝަން ނިޒާމް އިތުރަށް ތަރައްޤީކޮށް އިންސާނީ ވަގުފާރި ހުއްޓުވުމަށްޓަކައި މަސައްކަތް ކުރާނެ އަމާޒުތައް ކަނޑައަޅާފައިވެއެވެ.
އިމިގްރޭޝަންގެ މަޤްޞަދަކީ، ދުރުރާސްތާ މަންޒިލަކަށް ވާސިލްވުމަށް ރޭވުންތެރިކަމާއެކު މަސައްކަތްކޮށް، ޤާބިލު އޮފިސަރުންތަކެއް ބިނާކޮށް ފެންވަރު ރަނގަޅު ޚިދުމަތްތަކެއް ރައްޔިތުންނަށް ފޯރުކޮށްދިނުކަމަށް އިމިގްރޭޝަނުން ވިދާޅުވިއެވެ.