އައްޑޫ ސިޓީގެ މަގު ހެދުމުގެ މަޝްރޫއުގެ ތެރެއިން، ފޭދޫ، މަރަދޫ-ފޭދޫ އަދި މަރަދޫގެ ބޮޑު މަގުގައި އަލުން ތާރު އެޅުމުގެ މަސައްކަތް ފަށައިފިއެވެ.
އިންޑިއާގެ ޖީކޭ ޑިވެލޮޕްމެންޓް ކުންފުންޏާ ހަވާލު ކޮށްގެން ކުރިއަށް ގެންދާ މިމަޝްރޫއަކީ ސަރުކާރުން 134 މިލިއަން ރުފިޔާ ޚަރަދު ކޮށްގެން ކުރިއަށް ގެންދާ މަޝްރޫއެކެވެ. މިމަޝްރޫޢުގައި މައިގަނޑު ދެބައެއް ހިމެނެއެވެ. އެއީ މުޅިން އަލަށް 18 މަގެއްގައި ތާރު އެޅުމާއި، މަރަދޫ، މަރަދޫ-ފޭދޫ އަދި ފޭދޫގެ ގުޅިފައިވާ އަވަށްތަކުގެ ބޮޑުމަގު ރީސާފެސް ކުރުމެވެ.
މިމަޝްރޫއުގެ ދަށުން އެންމެ ފުރަތަމަ ފަށާފައިވަނީ، ތިން އަވަށުގެ ބޮޑުމަގު މަރާމާތު ކުރުމުގެ މަސައްކަތެވެ. މަގު ރީސާފެސް ކުރުމުގެ ތެރޭގައި މިހާރު ހަލާކުވެފައިވާ އޮތް ތާރުގަނޑު ނަގާ އަލުން ތާރު އެޅުމަށް ވަނީ ހަމަޖެހިފައެވެ. އެގޮތުން މުޅި ޖުމްލަ 4.5 ކިލޯމީޓަރުގެ މަގުގައި ތާރުގަނޑު ނަގާ އަލުން ތާރު އަޅާނެއެވެ.
މަގު އެއްވަރުކޮށް އަލުން ތާރު އެޅުމުގެ ޢަމަލީ މަސައްކަތް ފައްޓަވައި ދެއްވަމުން އައްޑޫސިޓީ މޭޔަރ އަބްދުﷲ ސާދިޤް ވިދާޅުވީ މިމަޝްރޫއު ފެށުން ލަސްވެގެން ދިޔަ އެއްސަބަބަކީ ތަކެތި ލިބުމުގައި ހުރި ދަތިތައް ކަމަށެވެ. އަދި މަޝްރޫއަށް ބޭނުންވާ ބައެއް ސާމާނު މިއަހަރުގެ ޖެނުއަރީ މަހުގެ ގެނެވުނުނަމަވެސް އިތުރު ސާމާނު ނުލިބި ދުވަސްތަކެއް ހޭދަވެގެން ދިޔަކަމަށްވެސް މޭޔަރ ފާހަގަ ކުރެއްވިއެވެ.
"ޖެނުއަރީން ފެށިގެން މިކަމަށް ބޭނުންވާ ތަކެތި، ހިލައާއި ހިލަވެލި، އަދިވެސް ބޭނުންވާ އެހެން ސާމާނު ގެނައުމުގައި ދަތިތަކެއް ދިމާވި. ރާއްޖެ އަށް މާރިޗު މަހު ކޯވިޑުގެ ހާލަތު އައި ކަމުގައިވީ ނަމަވެސް، ދުނިޔޭގެ ޤައުމުތަކަށް އެއަށްވުރެ މާކުރިން މިހާލަތު އައިސްފި. އެހެންވީމަ އެދަތިތަކާއި އެކު އެމީހުންނަށް (ޖީކޭޑީ ކުންފުންޏަށް) އެސަމާނު އެއްނުކުރެވި ލަސްތަކެއް ވެގެން ގޮސް، މިއަދު މިއޮތީ ކުރެވޭ ގޮތް ވެފައި." މޭޔަރ ސޯދިޤް ވިދާޅުވިއެވެ.
މިރަސްމިއްޔާތުގައި އިތުރަށް ވާހަކަ ދައްކަވަމުން މޭޔަރ ވިދާޅުވީ، މަގުގެ ތާރު އަލުން އަޅާ ނިމޭއިރު، މިމަގުގައި ހުރި ހުރިހާ ގެއަކަށް ނަރުދަމާ ހޮޅި ވައްދާ ނިންމާނެ ކަމާށާއި، ފަހުން ހޮޅި އަޅަން ޖެހުނުނަމަވެސް މަގަށް ގެއްލުން ނުވާނޭގޮތަށް އެކަން ކުރެވޭނެ ގޮތަށް މަސައްކަތް ރޭވިފައިވާ ކަމަށެވެ. މޭޔަރ ވިދާޅު ގޮތުގައި އައްޑޫގެ މަގު ހެދުމުގެ މަޝްރޫއުތައް އެއްކޮށް ނިމޭއިރު މަގުތަކުގައި ފެންބޮޑުވާ މައްސަލައަށް ހައްލެއް ލިބިގެންދާނެއެވެ.
ލަންކާ ސަރުކާރުގެ އެހީގައި މިތިން އަވަށުގެ ބޮޑު މަގުގައި މީގެ ކުރިން އަޅާފައިވާ ތާރުގަނޑު ހަލާކުވެގެން ދިޔައީ، ނަރުދަމާ މަސައްކަތް ކުރުމަށް ކަނޑާ ކޮނުމުގެ ސަބަބުންނެވެ. އޭރު މިތިން އަވަށުގައި ފެން ހޮޅި ވަޅުލާފައިވީ ނަމަވެސް ނަރުދަމާ ހޮޅި އަޅާފައި ނުވެއެވެ. ނަމަވެސް މިދިޔަ ސަރުކާރުގައި އެމްޓީސީސީ އާއި ހަވާލުކޮށްގެން 2017 ވަނަ އަހަރު މިތިން އަވަށުގައި ނަރުދަމާ އެޅުމުގެ މަސައްކަތް ވަނީ ފެށިފައެވެ. އެމަސައްކަތް މިހާރު ނިމުމަކަށް ގޮސްފައިވާއިރު، މިހާރު މަގުގައި ޗަކަ ވަޅުގަނޑު ހެދި ދުއްވާ މީހުންނަށާއި ހިނގާބިނގާވެ އުޅޭމީހުންނަށް ވަރަށް ބޮޑަށް ދަތިވެފައިވާ ކަމަށް އައްޑޫ ސިޓީ ކައުންސިލުން ހާމަކުރައްވައެވެ.
އިންޑިއާގެ ޖީކޭ ޑިވެލޮޕްމެންޓާއި ހަވާލުކުރެވިގެން ކުރިއަށް ގެންދާ މިމަޝްރޫއުގެ އިތުރަށް އިންޑިއާގެ އެގްޒިމް ބޭންކުގެ އެހީގެ ދަށުން އައްޑޫގައި އިތުރު 25 ކިލޯމީޓަރު މަގުގައި ތާރު އެޅުމަށް ވަނީ ހަމަޖެހިފައެވެ.