ރާއްޖޭގެ ބޯޑަރު ހުޅުވާލިފަހުން އެންމެ ގިނަ ފަތުރުވެރިން އެއްދުވަހެއްގައި އައި ދުވަހުގެ ރެކޯޑް އަނެއްކާވެސް އާވެއްޖެއެވެ.
ޓޫރިޒަމް މިނިސްޓަރ އަބްދުﷲ މައުސޫމް ކުރެއްވި ޓްވިޓެއްގައި ވިދާޅުވެފައިވަނީ އޮކްޓޯބަރ މަހުގެ 15 ވަނަ ދުވަހު ރާއްޖެއަށް 2000 ފަތުރުވެރިން ޒިޔާރަތްކޮށްފައިވާކަމަށެވެ. މި ކާމިޔާބީ ހާދިލްކުރުމުގައި މަސައްކަތްކޮށްދެއްވި ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ އެންމެހައި ފަރާތްތަކަށް މިނިސްޓަރ ވަނީ މަރުހަބާދަންނަވާފައެވެ. އަދި މިއީ ރާއްޖޭގެ ބޯޑަރު އަލުން ހުޅުވާލިފަހުން ލިބިގެންދިޔަ އިތުރު ކުރިއެރުމެއްގެ ގޮތުގައި މިނިސްޓަރ ވަނީ ސިފަކުރައްވާފައެވެ.
ރާއްޖޭގެ ބޯޑަރުތައް އަލުން ހުޅުވާލި ޖުލައިމަހު ރާއްޖެއަށް އެވްރެޖްކޮށް ކޮންމެ ދުވަހަކު އައިސްފައިވަނީ 117 ފަތުރުވެރިންނެވެ. އަދި އޮގަސްޓުމަހު ރާއްޖެއަށް އެވްރެޖްކޮށް ކޮންމެ ދުވަހަކު އައިސްފައިވަނީ 246 ފަތުރުވެރިންނެވެ. ސެޕްޓެމްބަރުމަހު ކޮންމެ ދުވަހަކު އެވްރެޖްކޮށް 318 ފަތުރުވެރިން ރާއްޖެއަށް އައިސްފައިވާއިރު، އޮކްޓޫބަރުމަހު މި އަދަދު ހުރީ 694 ގައެވެ. އަދި މިމަހުގެ މިހާތަނަށް މިއަހަރު މިހާރުވަނީ 997 އަށް އަރާފައެވެ.
ރާއްޖެ އަންނަ ފަތުރުވެރިން މަހަކަށްވުރެ މަހެއް އިތުރުވަމުން އަންނަ މައިގަނޑު ސަބަބަކީ ރާއްޖެ އަންނަ އެއަރލައިންތައް އިތުރުވުމެވެ. ޓޫރިޒަމް މިނިސްޓްރީން އާއްމުކޮށްފައިވާ އެންމެ ފަހުގެ ތަފާސް ހިސާބުތައް ދައްކާގޮތުން މިހާރު ރާއްޖެއަށް 15 އެއަރލައިންއަކުން ދަނީ ޝެޑިއުލް ދަތުރުތައް ބާއްވަމުންނެވެ. ރާއްޖޭގެ ބޯޑަރު ޖުލައިމަހުގެ 15 ވަނަ ދުވަހު އަލުން ހުޅުވާލުމާއިއެކު މިހާތަނަށް ރާއްޖެއަށް ބައިލައްކައަށްވުރެ ގިނަ ފަތުރުވެރިން ވަނީ ޒިޔާރަތްކޮށްފައެވެ.