ގަން އެއަރޕޯޓު މެދުވެރިކޮށް ދެކުނުގެ ރިސޯޓުތަކަށް ފަތުރުވެރިން ގެންދިއުމުގެ މަސައްކަތް ކުރަނީ

ގަން އިންޓަނޭޝަނަލް އެއަރޕޯޓު މެދުވެރިކޮށް ދެކުނުގެ ރިސޯޓުތަކަށް ފަތުރުވެރިން ގެންދިމުގެ މަސައްކަތް ކުރަމުންދާ ކަމަށް އިނާ މޯލްޑިވްސްގެ މެނޭޖިންގް ޑިރެކްޓަރ މުހައްމަދު ފިރާޤް ވިދާޅުވެއްޖެއެވެ.

މިކަން ހާމަކުރައްވާ ސޯޝަލް މީޑިއާގައި އޭނާ ކުރެއްވި ޕޯސްޓެއްގައި ވިދާޅުވީ، ބައިނަލްއަޤްވާމީ ޓުއަރ އޮޕަރޭޓަރ ކޮންޓްރެކްޓަކަށް ބޭނުންވާ ދެކުނުގެ ގެސްޓް ހައުސް އާއި ރިސޯޓުތައް ހޯދަމުންދާ ކަމަށެވެ. އަދި މިދަތުރުތައް ފަށަނީ މެދު އިރުމަތީ މާކެޓަށް ކަންވެސް އޭނާ ވަނީ ހާމަކުރައްވާފައެވެ.

މިކަމާއި ގުޅޭގޮތުން ޕީއެސްއެމް އިން ކުރި ސުވާލަކަށް ޖަވާބު ދެއްވަމުން ފިރާޤު ވިދާޅުވީ، މިވަގުތު ފެށުމަށް ތައްޔާރު ވަމުންދާނީ ވިންޓަރ އޮޕަރޭޝަންތައް ކަމަށެވެ. ނަމަވެސް މިކަން ދެމެހެއްޓެނިވި ގޮތެއްގައި ކުރެވޭ ނަމަ އިތުރު ފްލައިޓްތައް ކުރިއަށް އޮތް ތަނުގައިވެސް ބާއްވާނެ ކަމަށް ފިރާޤު ވިދާޅުވިއެވެ.

އޮޕަރޭޝަން ފެށުމަށް މަސައްކަތް ކުރަމުންދާއިރު އޮޕަރޭޝަން ފަށަނީ ކޮން އެއަރލައިނަކުން ކަމަށް ފިރާޤު ހާމަ ކޮށްފައިނުވެއެވެ. ނަމަވެސް ފިރާގު ވިދާޅުވީ އެއީ މިހާރުވެސް ރާއްޖެއަށް އޮޕަރޭޓް ކުރަމުންދާ އެއަރލައިނެއް ކަމަށާއި އެފަރާތުން ގަމާއި ޔޫއޭއީ ގުޅުވާލުމަށް މަސައްކަތް ކުރަމުންދާ ކަމަށެވެ.

ފިރާޤު ވިދާޅުވީ ގޮތުގައި މިމަސަކަތަށް ބޭނުންވަނީ އައްޑޫ، ހުވަދޫ، ފުވައްމުލަކުގެ ގެސްޓު ހައުސްތަކާއި ރިސޯޓުތަކުގެ ބައިވެރިވުން ކަމަށެވެ. އަދި މިއޮޕަރޭޝަން ފެށުމަށް އިތުރު ރިސޯޓުތައް ބޭނުންވާ ކަމަށްވެސް ފިރާޤު ވިދާޅުވިއެވެ.

ގަން އިންޓަނޭޝަނަލް އެއަރޕޯޓު މެދުވެރިކޮށް ބައިނަލްއަޤްވާމީ ފްލައިޓުތައް ފެށުމުގެ މަސައްކަތް ކުރަމުންދާއިރު، ކޯވިޑް-19 އާއި ގުޅިގެން ބައިނަލްއަޤްވާމީ ދަތުރުތައް އެއްކޮށް ވަނީ ހުއްޓިފައެވެ. އަދި އަލުން ޝެޑިއުލް ދަތުރުތަކެއް ފެށޭނެ ތާރީޚެއް ނޭނގުމަކީ ގިނަ ރައްޔިތުންގެ ކަންބޮޑުވުމެކެވެ.