ކޯވިޑް-19 އާއި ގުޅިގެން ބޮޑެތި ވިޔަފާރިތަކަށް ލިބިފައިވާ ގެއްލުމުން އަރައިގަތުމަށް ބޭންކް އޮފް މޯލްޑިވްސްއިން 678 މިލިއަން ރުފިޔާ ދޫކޮށްފިއެވެ.
ފިނޭންސް މިނިސްޓްރީގެ ތަފާސް ހިސާބުތަށް ދައްކާގޮތުން މިދިޔަ ހަފްތާގެ ބުރާސްފަތި ދުވަހުގެ ނިޔަލަށް ބީއެމްއެލްއިން ދޫކުރާ "ރިކަވަރީ ލޯނު ސްކީމް"ގެ ދަށުން 554.7 މިލިއަން ރުފިޔާ އަދި 8 މިލިއަން ޑޮލަރު (123.36 މިލިއަން ރުފިޔާ) ދޫކޮށްފައި ވެއެވެ. މިއާއިއެކު މުޅި ޖުމްލަ 678.06 މިލިއަން ރުފިޔާ މިހާތަނަށް ވަނީ ދޫކުރެވިފައި ވެއެވެ.
މިލޯނަށް މިހާތަނަށް 590 މީހުން އެދިފައި ވާއިރު، އޭގެ ތެރެއިން ލޯނު ހަމަޖެހިފައި ވަނީ 417 ފަރާތަކަށެވެ. މީގެ ތެރެއިން 17 ފަރާތެއްގެ ލޯނު އެޕްލިކޭޝަން ރިޖެކްޓް ކޮށްފައިވާއިރު، 138 ފަރާތެއް ޝަރުތު ހަމަނުވެ ނުވަތަ މައުލޫމާތު ފުރިހަމަ ނުކޮށް ހުށަހަޅާފައިވެއެވެ. އަދި އިތުރު 18 ފަރާތެއްގެ ލޯނު ޕްރޮސެސިން މަރުހަލާގައިވާކަމަށް ފިނޭންސް މިނިސްޓްރީން މައުލޫމާތު ދެއެވެ.
ކޯވިޑް ރިކަވަރީ ލޯން ސްކީމަކީ ކޯވިޑް-19 އާއި ގުޅިގެން ވިޔަފާރިތަކަށް ކުރިމަތިވެފައިވާ ދަތިތަކަށް ހައްލު ހޯދައި ދިނުމުގެ ގޮތުން އެ ވިޔަފާރިތަކުން ބޭނުންވާ ހިންގުމުގެ ހަރަދު ހަމަޖައްސައި ދިނުމަށް ތައާރަފު ކުރި ލޯން ސްކީމެކެވެ.
މި ސްކީމްގެ ދަށުން ނަގާ ލޯނުތަކަށް ހަ މަސްދުވަހުގެ ގްރޭސް ޕީރިއެޑެއް ލިބޭއިރު އެ ހަ މަސް ދުވަހުގެ ތެރޭގައި އެއްވެސް ޕޭމަންޓެއް ދައްކަން ނުޖެހޭނެއެވެ. އަދި މިލޯންތަށް ދެއްކުމަށް 3 އަހަރު މުއްދަތެއް ލިބެއެވެ.
މި ލޯނު ސްކީމްގެ ދަށުން ބީއެމްއެލުން ރިސޯޓުތަކަށް 7.7 މިލިއަން ރުފިޔާގެ ލޯނު ދޫކުރާއިރު އެހެނިހެން ވިޔަފާރިތަކަށް ދޫކުރާނީ އެއްމިލިއަން ރުފިޔާއެވެ.