ބައިނަލްއަޤްވާމީ ފަތުރުވެރިކަމުގެ މާކޭޓުގައި ރާއްޖެއިން ފައިހަމަ ކުރުމަށް ރަނގަޅު ޕޭކޭޖުތަކެއް ތަޢާރަފު ކުރަން ޖެހޭ ކަމަށް ޓުއަރިޒަމަ މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
މިނިސްޓަރ މައުސޫމު މިހެން ވިދާޅުވީ، ޓީޓީއެމް ސަމިޓު ފެށުމުގެ އޮންލައިން ކޮށް ބޭއްވި ބައްދަލުވުމުގައި، ސަރުކާރުން ފަތުރުވެރިކަން އަލުން ފަށައިގަތުމަށް ރޭވިފައި ހުރި ކަންކަމާއި ގުޅޭ ގޮތުން ވާހަކަ ދައްކަވަމުންނެވެ. މިނިސްޓަރ ވިދާޅުވި ގޮތުގައި، ދުނިޔެ މިހާރު މިއޮތް ހާލަތުން، ބައިނަލްއަޤުވާމީ ފަތުރުވެރިކަމުގެ ދާއިރާ ވަރަށް ބޮޑަށް ވާދަވެރި ވެފައިވާ ކަމަށެވެ.
މިވާދަވެރިކަމާއި ރާއްޖެއިން ކުރިމަތި ލެވޭނީ އުފެއްދުންތެރި ޕެކޭޖުތަކެއް ފަތުރުވެރިންނަށް ތަޢާރަފު ކުރެވިގެން ކަމަށް މިނިސްޓަރ ވިދާޅުވިއެވެ. އަދި މިކަން ކުރެވޭނީ ރާއްޖޭގެ އޭޖެންޓުންނާއި ރާއްޖޭގައި ހަރަކާތްތެރިވަމުންދާ ފަތުރުވެރިކަމުގެ ފެސިލިޓީސްތަށް ވަރަށް ބޮޑަށް އެއްބައިވެ ގުޅިގެން ކަމަށެވެ. މީގެ އިތުރުން މިހާރު ފަތުރުވެރިން އަގުތަކާއި ޕެކޭޖުތަކަށް ވަރަށް ބޮޑަށް އަހަމިއްޔަތުކަން ދޭކަމުގައި މިނިސްޓަރ ފާހަގަ ކުރެއްވިއެވެ.
މިނިސްޓަރ މައުސޫމު އިތުރަށް ވިދާޅުވި ގޮތުގައި، ވޭތުވެ ދިޔަ ދުވަސްތަކުގައި ރާއްޖެ އައިސްފައިވާ ފަތުރުވެރިންނަށް ބަލާއިރު، ދިގު މުއްދަތަކަށް ޗުއްޓީ ހޭދަކުރުމަށް އަންނަ ފަތުރުވެރިން ގިނަވެފައިވާ ކަމަށެވެ. އަދި މިއީ މިހާރު އުސޫލުތަށް އޮންނަ ގޮތުން ކަމަށްވެސް ވެދާނެ ކަން ފާހަގަ ކުރައްވައި މިފަދަ ކަންކަމަށް ޕެކޭޖުތަށް ހެދުމުގައި ރިއާޔަތް ކުރުމަށް މިނިސްޓަރ ގޮވާލެއްވިއެވެ.
މިނިސްޓަރ މައުސޫމު ވަނީ ރާއްޖޭގެ ފަތުރުވެރިކަން އަލުން ފަށައިގަތުމުގައި ސަރުކާރުގެ ސިޔާސަތުތަކަށް އަލި އަޅުއްވާފައެވެ. އެގޮތުން ރާއްޖޭގެ އުތުރާއި ދެކުނު އެއާޕޯޓުތަށް، ހިންގަން ފެށުމާއިއެކު ފަތުރުވެރިންނަށް ދަތުރުކުރުމުގައި ލުއި ތަކެއް ލިބިގެންދާނެ ކަން މިނިސްޓަރ ފާހަގަ ކުރެއްވިއެވެ. މީގެ އިތުރުން ދިވެހިންނަށް މިދާއިރާގައި ވަޒީފާގެ ކުރިއެރުން ލިބުމުގައި ލުއިފަސޭހަތަކެއް ދިނުމަށް ވަޒީފާ އަދާކުރާ ފަރާތްތަކުގެ ކޮލިފިކޭޝަން މަތިކުރުމުގެ މަސައްކަތްތަކެއް ކުރިއަށްދާނެ ކަން މިނިސްޓަރ ފާހަގަ ކުރެއްވިއެވެ.
މިއަހަރުގެ ޓީޓީއެމް ސަމިޓު ބާއްވަނީ އޮންލައިން ކޮށެވެ. މިމަހުގެ 23 އިން 24 އަށް ކުރިއަށް ގެންދާ މިސަމިޓުގައި މައިގަނޑުގެ ގޮތެއްގައި ބަލާލާނީ ފަތުރުވެރިކަން އަލުން ފަށައިގަތުމާއި ގުޅޭ ގޮތުންނެވެ. މިއަހަރުގެ ޓީޓީއެމް ފެއާގައި 150 ރިސޯޓް އަދި ހޮޓެލްއާ 200 އޮޕަރޭޓަރުން ބައިވެރިވެއެވެ. މި ސަމިޓުގެ ތެރެއިން، އެގްޒިބިޓަރުންނާއި ޓްރޭޑް ވިޒިޓަރުންނާއި ދެމެދު ޕްރީ ޝެޑިއުލްޑް ބައްދަލުވުންތައް އޮންނާނެ އެވެ. މި ބައްދަލުވުންތައް އޮންނާނީ މި މަހުގެ 25 އިން 26 އަށެވެ.
ރާއްޖޭގެ ފަތުރުވެރިކަމުގައި ހަރަކާތްތެރިވާ ފަރާތްތަކާއި ދުނިޔޭގެ ބޮޑެތި ޓްރެވެލް އޭޖެންޓުންނާއި ގުޅުވާލުމަށް ރާއްޖޭގައި މިހާތަނަށް ކުރިއަށްގެންދާ އެންމެ ބޮޑު ޓްރެވެލް ޓްރޭޑް ހަރަކާތެވެ. މިއީ މިސަމިޓު ބާއްވާ 4 ވަނަ އަހަރެވެ.