އިންޑިއާގެ ޓުޓިކޮރިން އާއި އައްޑޫ އަދި ގ.ދ ތިނަދޫ އާއި ދެމެދު ކާގޯ ފެރީގެ ޙިދުމަތް ފަށައިފިއެވެ.
މިކަން ހާމަ ކޮށް ޤައުމީ ޝިޕިންގް ކުންފުނި މޯލްޑިވްސް ސްޓޭޓް ޝިޕިންގް ކުރި ޓްވީޓެއްގައި ބުނެފައިވަނީ ރާއްޖެ އާއި އިންޑިއާގެ ޓުޓިކޮރިން އާއި ދެމެދު ސީދާ ދަތުރުތަށް ފެށި ފުރަތަމަ ކާގޯ ބޯޓު ޓުޓިކޮރިންގ ބަނދަރުން މިހާރު ފުރާފައިވާ ކަމަށެވެ. އަދި އެކުންފުނި މެދުވެރިކޮށް ކާގޯ ގެނައުމަށް ބުކިންގ ހެދުމަށްވެސް އެ ކުންފުނިން ވަނީ ހުޅުވާލާފައެވެ. މިދެމެދު ކުރާ ފުރަތަމަ ކާގޯ ދަތުރަށް ފުރާފައިވަނީ އެމްވީ ބޮންތި 2 ނަމަކަށް ކިޔާ ބޯޓެކެވެ.
މިދަތުރުތަށް ފެށުމާއި ގުޅިގެން ދެކުނުގައި ޤާއިމު ކުރެވިފައިވާ ހިތަދޫ ޕޯޓް ލިމިޓެޑް (އެޗްޕީއެލް) އިން ބުނެފައި ވަނީ މިދަތުރުތައް ފެށުމާއި އެކު ދެކުނުގެ ރައްޔިތުންނަށް އަތްފޯރާ އަގުގައި މުދާ ލިބިގެން ދާނެ ކަމެއް ކަމަށެވެ. އަދި މިއީ ހިތަދޫ ޕޯޓު ލިމިޓެޑަށާއި ދެކުނުގެ ވިޔަފާރިތަކަށް ލިބޭ ކުރިއެރުމެއް ކަމަށް އެޗްޕީއެލް އިން ވިދާޅުވެއެވެ.
މިކަމާއި ގުޅިގެން އިންޑިއާއިން ބުނެފައި ވަނީ މިއީ ރާއްޖޭގެ ދެކުނާއި އިންޑިއާގެ ދެކުނާއި ގުޅުވާލުން ކަމަށެވެ. އަދި ކޮޗިން އާއި މާލެ އަދި ކުޅުދުއްފުއްޓާ ދެމެދު ކާގޯ ފެރީގެ ޙިދުމަތް ފެށިތާ 2 މަސް ދުވަހުގެ ތެރޭ އިތުރު ސަރަހައްދަކަށް ކާގޯ ފެރީގެ ޙިދުމަތް ފެށިފައިވާކަން އިންޑިއާއިން ފާހަގަކޮށްފައި ވެއެވެ.
އިންޑީއާގެ ޓުޓިކޮރިން އާއި ރާއްޖެ އާއި ދެމެދު ދަތުރުތަށް ފަށާފައި މިވަނީ ރާއްޖެ އަށް ނިސްބަތްވާ އެމްވީ ބޮންތި 2 އިންނެވެ. މިއީ ދިގުމިނުގައި 86 މީޓަރު ހުންނަ މުދާ އުފުލާ ބޯޓެކެވެ. މިބޯޓުގައި 2719 ޓަނުގެ މުދާ އުފުލޭނެއެވެ. މިބޯޓު ހަފްތާ ބަނދު ތެރޭގައި އިންޑިއާ އަށް ފޯރާނެ ކަމަށް ލަފާ ކުރެވެއެވެ.
މީގެ ކުރީން އިންޑިއާގެ ކޮޗިން އާއި ހދ. ކުޅުދުއްފުއްޓާއި ވެސް ވަނީ ކާގޯ ފެރީގެ ޙިދުމަތުން ގުޅުވާލެވިފައެވެ. އެގޮތުން ކުޅުދުއްފުއްޓާއި ކޮޗިން އާއި ދެމެދު ކާގޯ ފެރީގެ ޙިދުމަތް ފަށާފައި ވަނީ މިއަހަރު ސެޕްޓެމްބަރު މަހުގައެވެ. ރާއްޖެއިން ބޭރުން ރާއްޖޭގެ އެކި އަތޮޅުތަކަށް ސީދާ މުދާ ގެނެއުމަކީ ސަރުކާރުގެ އެއް ވައުދެވެ.