ރާއްޖޭގެ ދެކުނުން ހުވަދު އަތޮޅުގެ ރިސޯޓުތަކާއި ގުޅުވާލުމަށްޓަކައި އައްޑޫ ސިޓީ ގަމުގެ ސީޕްލޭން ޓާމިނަލަށް ގެންނަ ބަދަލުތައް އަންނަ މަހުގެ މެދު ތެރެއަށް ނިންމާލެވޭނެކަމަށް އައްޑޫ އިންޓަނޭޝަނަލް އެއާޕޯޓުން ބުނެފިއެވެ.
ގަމުގެ ސީޕްލޭން ޓާމިނަލް އަޕްގްރޭޑް ކުރުމާއި މަރާމާތުގެ މަސައްކަތް ކުރަމުންދަނީ އައްޑޫ އިންޓަނޭޝަނަލް އެއާޕޯޓުންނެވެ. މި ޓާމިނަލް އަޕްގްރޭޑް ކުރުމުގެ މަސައްކަތް ކުރަނީ އެއްފަހަރާ 2 ސީޕްލޭނަށް ޙިދުމަތް ދެވޭނެ ގޮތަށް ކަމަށް އެކުންފުނިން ބުނެއެވެ. އެގޮތުން މިހާރު ހުރި ސީޕްލޭން ޓާމިނަލަށް ބޮޑެތި ބަދަލުތަކެއް ގެނެސް ބައިނަލްއަޤްވާމީ މިންގަނޑުތަކަށް އެތަން ފެއްތުމުގެ މަސައްކަތް ކުރަމުންދާ ކަމަށްވެސް އެކުންފުނިން ބުނެއެވެ.
ޕީއެސްއެމް ނިއުސްއަށް މައުލޫމާތު ދެއްވަމުން އައްޑޫ އިންޓަނޭޝަނަލް އެއާޕޯޓުގެ މެނޭޖިންގް ޑިރެކްޓަރ ޤައިސް ނަސީރު ވިދާޅުވީ، ކުރިން ސީޕްލޭން ޓާމިނަލް ހިންގި ގޮތާއި މިހާރާއި އެންމެ ބޮޑު ތަފާތަކީ އެތަން ތައްޔާރުކޮށް ތަނުގެ މަރާމާތު ކުރެވެމުންދަނީ އޭއައިއޭގެ ބެލުމުގެ ދަށުން ކަމަށް ވުން ކަމަށެވެ. އަދި މޯލްޑިވިއަން އިން ސީޕްލޭން އޮޕަރޭޝަން ކުރިއަށް ގެންދިޔަ ނަމަވެސް އެކަން ކުރެވެނީ ވަރަށް ބޮޑަށް ގުޅިގެން ކަން ގައިސް ފާހަގަ ކުރެއްވިއެވެ.
" އެންމެ ބޮޑު އެއްތަފާތަކީ، ޓާމިނަލްގެ މެއިންޓެނެންސް އާއި ޓާމިނަލްގެ މަސައްކަތަށް އޭއައިއޭއިން ކުރުން. އަޅުގަނޑުގެ ފާހަގަ ކޮށްލަން، އެގްރިމެންޓް ސެރަމަނީގައި ވަރަށް ބޮޑަށް ދެކެވުނު ވާހަކައެއް ގުޅިގެން މިކަން ކުރިއަށް ގެންދިއުން. ފުރަތަމަ ފައިދާ ނުވިއަސް މިކަން ކުރިއަށް ގެންދެވޭނީ މިދެބައި މީހުންގެ ގުޅިގެން މިކަން ކުރިއަށް ގެންދެވިގެން" ގައިސް ވިދާޅުވިއެވެ.
މޯލްޑިވިއަން އިން ހިނގުމަށް ހަމަޖެހިފައވާ ސީޕްލޭން ބޭސްގެ އެއްބަސްވުމުގައި ސޮއިކޮށްފައިވަނީ މިދިޔަ އޮކްޓޯބަރު މަހުގެ 3 ވަނަ ދުވަހުއެވެ. މިއީ ދެކުނުގެ އިޤްތިޞާދީ ހަބެއްގެ ގޮތުގައި އައްޑޫސިޓީ ތަރައްޤީ ކުރުމުގެ ގޮތުން ޢުމްރާނީ ވަސީލަތްތައް ޤާއިމުގެ ކުރުމުގެ މަޤްޞަދުގައި ކުރިއަށް ގެންދެވޭ މަސައްކަތެއް ކަމަށް މިއެއްބަސްވުމުގައި ސޮއި ކުރެއްވި ދުވަހު އިކޮނޮމިކް މިނިސްޓަރ ވަނީ ވިދާޅުވެފައެވެ.
އޭރު މަސައްކަތް ނިންމުމަށް ހަމަޖެހިފައި އޮތީ، އެއްބަސްވުމުގައި ސޮއި ކުރާތާ 45 ދުވަހުގެ ތެރޭގައެވެ. ނަމަވެސް މިމަސައްކަތުގެ ޝެޑިއުލް ބަދަލުވެ މިމަސައްކަތް މިހާރު ނިމޭނެ ކަމަށް އަންދާޒާ ކޮށްފައިވަނީ އަންނަ މަހުގެ މެދުތެރެއަށް ކަމަށް އައްޑޫ އިންޓަނޭޝަނަލް އެއާޕޯޓުން ބުނެއެވެ.
އެކުންފުނިން ބުނީ މިމަސައްކަތް ލަސްވީ މޫސުން ގޯސްވުމުގެ ސަބަބުން މަސައްކަތަށް ބޭނުންވާ ސާމާނު ލިބުމުގައި ދަތިތަކެއް ދިމާވެ މޫސުން ތަން ނުދިނުމުގެ ސަބަބުން ކަމަށެވެ.
ޤައިސް ވިދާޅުވީ ޓާމިނަލް މަރާމާތު ކުރުމުގެ މަސައްކަތް ދެމެހެއްޓެނިވި ގޮތަކަށް ކުރިއަށް ގެންދެވޭނެ ގޮތަކަށް ކަންކަން ރޭވިފައިވާކަމަށެވެ.
"ޓާމިނަލް އެއްކޮށް ފާނިޝްކޮށް، އަލުން މަރާމާތުކޮށް ބައެއް ތަންތަން އިތުރު ކުރަން ޖެހިފައި އޮތީ، މީގެ އިތުރަށް އޮޕަރޭޝަނަށް ބޭނުންވާ އެކޮމޮޑޭޝަން ވެސް އަޅުގަނޑުމެން ހަމަޖައްސާ ގޮތަށް އޮތީ. އެއީވެސް ޕެރެލަލް ކޮށް ކުރެވޭ މަސައްކަތެއް. ސައިނިންގް ސެރަމަނީގަ ބައެއް ބޭފުޅުންނަށް ހީވެ ދާނެ ޓާމިނަލް ނިމިފަ ކަމަށް ހުރީ، ހަމަ އޮޕަރޭޝަނަށް ދެވޭނެ ކަމަށް. އަޅުގަނޑުމެން ތަންކޮޅެއް ލާސްޓިންގް ގޮތަކަށް މިކަން ކުރަންވެގެން މި ޓާމިނަލް އިތުރަށް ފުރިހަމަ ކޮށްފަ ކުރިއަށް ގެންދާ ގޮތަށް މިވިސްނަނީ " ޤައިސް ވިދާޅުވިއެވެ.
އޭއައިއޭއިން ވިދާޅުވި ގޮތުގައި، ޓާމިނަލް ނިމޭއިރު، ފުރާ މީހުންނާއި އަންނަ މީހުންނަށް ޚާއްޞަ ސަރަހައްދެއް ޤާއިމުކޮށް، ސްޓޯރ އޭރިއާއެއްގެ އިތުރުން ލަގެޖްތަކަށް ޚާއްޞަ ސަރަހައްދަކާއި ފިއުލް ސޭފްޓީ އިމާރާތެއްވެސް ހުންނާނެ ކަމަށެވެ. އަދި ސީ ޕްލޭން ޕްލެޓްފޯމުގެ ބޮޑެތި މަރާމާތުތަކެއްވެސް ކުރުމަށް ހަމަޖެހިފައިވާކަމަށެވެ.
އައްޑޫ ސިޓީއާއި ހުވަދު އަތޮޅާ ދެމެދު ސީޕްލޭން ދަތުރުތައް ފެށުމަށް ތައްޔާރު ވަމުންދާއިރު، އައްޑޫ ސިޓީއާއި ފުވައްމުލަކު ސިޓީއާ ދެމެދު ޤަވާޢިދުން ކޮންމެ ދުވަހަކު ވައިގެ ދަތުރުތައް ބޭއްވުމާ ގުޅޭގޮތުންވެސް މިހާރު ދަނީ މަޝްވަރާކުރަމުންނެވެ. އަދި މިކަމުގެ ސަބަބުން ރާއްޖޭގެ އިޤްތިޞާދަށް، ޚާއްސަކޮށް ދެކުނުގެ އިޤްތިޞާދަށް ކުރިއެރުންތަކެއް ލިބިގެން ދާނެ ކަމަށް އިކޮނޮމިކް މިނިސްޓްރީން ވިދާޅުވެއެވެ.