ބޮލީވުޑުގެ މަޝްހޫރު ތަރިންތަކެއް އިންސްޓަގްރާމްގައި ރާއްޖޭގެ ފަތުރުވެރިކަން އިސްތިހާރުކޮށްދީފިއެވެ.
މިއީ ރައްޖޭގެ ފަތުރުވެރިކަން އިސްތިހާރު ކުރުމަށް އެމްއެމްޕީއާރުސީގެ "ރީޑިސްކަވަރ މޯލްޑިވްސް - ދަ ސަނީ ސައިޑް އޮފް ލައިފް" ކެމްޕެއިންގެ ދަށުން ކުރިއަށް ގެންދިޔަ ޙަރަކާތެކެވެ. އިންސްޓަގްރާމް މެދުވެރިކޮށް ލައިވްކޮށް ކުރިއަށް ގެންދިޔަ މި ޙަރަކާތުގައި އިންޑިއާގެ މަޝްހޫރު 5 ތަރިއަކު ބައިވެރިވެފައިވަނީ އެ ތަރިންގެ ރަސްމީ އިންސްޓަގްރާމް އެކައުންޓު ބޭނުންކޮށްގެންނެވެ.
މި ކޮންފަރެންސްގެ މަޤްޞަދަކީ އިންޑިއާގެ މަޝްހޫރު ތަރިން މެދުވެރިކޮށް، ދިވެހިރާއްޖޭގެ ފަތުރުވެރިކަމުގެ އެންމެ ފަހުގެ މަޢުލޫމާތު ހިއްސާކޮށް، ރާއްޖެ އާއި މެދު ޝައުގުވެރިކަން އިތުރު ކުރުން ކަމަށް އެމްއެމްޕީއާރްސީން ބުނެއެވެ.
މި ލައިވް ކޮންފަރެންސްގައި ބައިވެރިވެރިވި އިންޑިއާގެ މަޝްހޫރު 5 ތަރިން ކަމުގައިވާ، ކަރިޝްމާ ޝަރްމާ އާއި، ކިޝްވަރު މާޗެންޓް، ތަންޔާ ޝަރްމާ، އަބިގައިލް ޕާންޑޭ އަދި ޕްރިންކާ ޓަލްކްޑާއެވެ. މިފަސް ތަރިން ވަނީ ރާއްޖޭގައި އެމީހުން ހޭދަކުރި ތަފާތު ތަޖުރިބާތައް ހިއްސާ ކޮށްފައެވެ. އަދި މި ތަރިން މެދުވެރިކޮށް މިވަގުތު ރާއްޖެ ފަތުރުވެރިންނަށް ރައްކާތެރި ވަނީ ކީއްވެގެންކަން އޯޑިއަންސަށް ބުނެދީފައިވާނެ ކަމަށްވެސް އެމްއެމްޕީއާރްސީން ބުނެއެވެ.
އެމްއެމްޕީއާރުސީން ވިދާޅުވީ، އިންޑިއާ އާއި ރާއްޖެއާ ދެމެދު ސޮއި ކުރެވުނު ޓްރެވެލް ބަބްލްސް އެއްބަސްވުމުގެ ސަބަބުން، އިންޑިއާއިން ރާއްޖެ ޒިޔާރަތް ކުރާ ފަތުރުވެރިންގެ އަދަދު އިތުރުވަމުންދާ ކަމަށެވެ. އަދި އިންޑިއާ އަކީ ރާއްޖެއަށް ދެވަނައަށް މިހާރު އެންމެ ގިނަ ފަތުރުވެރިން އަންނަ މާކެޓު ކަމުގައިވެސް އެމްއެމްޕީއާރްސީން ފާހަގަ ކުރައްވައެވެ.
އެގޮތުން މިދިޔަ ޖުލައި މަހު ބޯޑަރު ހުޅުވުމަށް ފަހު، މިހަފްތާގެ ބުރާސްފަތި ދުވަހުގެ ނިޔަލަށް 7652 ފަތުރުވެރިން ރާއްޖެ ޒިޔާރަތް ކޮށްފައިވާ ކަމާށް ޓުއަރިޒަމް މިނިސްޓްރީގެ ތަފާސް ހިސާބުތަކުން ދައްކައެވެ. މި މުއްދަތުގައި ޖުމްލަ ރާއްޖެ އައިސްފައިވަނީ، 67،564 ފަތުރުވެރިން ކަމަށް ޓުއަރިޒަމް މިނިސްޓްރީން ވިދާޅުވެއެވެ.