ރަޝިއާގެ މަޝްހޫރު އަޒުރު އެއާއިން ރާއްޖެއަށް ދަތުރުތަށް ފަށައިފިއެވެ.
އަޒުރުއެއާގެ ދަތުރުތަށް ފެށުމާއި އެކު، އެއާލައިނގެ ފުރަތަމަ ފްލައިޓު ވަނީ ވެލާނާ އިންޓަނޭޝަނަލް އެއާޕޯޓުގައި ޖައްސާފައެވެ. މި ފްލައިޓުގައި 500އަށްވުރެ ގިނަ ފަސިންޖަރުން ރާއްޖެ ވަނީ އައިސްފައެވެ. މިކަމާގުޅިގެން ވެލާނާ އިންޓަނޭޝަނަލް އެއާޕޯޓުން ކުރި ޓްވީޓެއްގައި ބުނެފައިވަނީ މިއީ ރާއްޖޭގެ ބޯޑަރު އަލުން ހުޅުވުމާއެކު އެއް ފްލައިޓެއްގައި މިހާ ގިނަ ފަސިންޖަރުން އައި ފުރަތަމަ ފަހަރު ކަމުގައެވެ.
އަޒުރު އެއާ ރާއްޖެ ދަތުރު ކުރަން ހަމަ ޖެހިފައިވަނީ ހަފްތާއަކު އެއްފަހަރުއެވެ.
ރަޝިއާގެ އަޒުރު އެއާގެ އިތުރުން ރަޝިއާއަށް ނިސްބަތްވާ ރޮސިޔާ އެއާލައިންސް އަދި އެއިރޮފްލޮޓްއިން ވެސް ވަނީ ރާއްޖެއަށް ދަތުރުތަށް ފަށާފައެވެ.
ރާއްޖޭގެ ބޯޑަރު އަލުން ހުޅުވިފަހުން އެންމެ ގިނަ ފަތުރުވެރިން ރާއްޖެއަށް އައިސްފައިވަނީ ރަޝިއާއިންނެވެ. މިދިޔަ ހަފްތާގެ ބުރާސްފަތި ދުވަހުގެ ނިޔަލަށް ރަޝިއާއިން 14،855 ފަތުރުވެރިން ވަނީ ރާއްޖެ އައިސްފައެވެ.