އުފެދުނުފަހުން މިހާތަނަށްވެސް ގެއްލުމުގައި ހިންގަމުންއައި ފެނަކަ ކޯޕަރޭޝަނަށް ފުރަތަމަ ފަހަރަށް ސާފު ފައިދާގެ ގޮތުގައި 35 މިލިއަން ރުފިޔާ ލިބިއްޖެއެވެ.
އޮޑިޓަރ ޖެނެރަލް އޮފީހުން ފެނަކަ ކޯޕަރޭޝަންގެ މިދިޔަ އަހަރުގެ އޮޑިޓް ރިޕޯޓު މިހާރުވަނީ ޝާއިއު ކޮށްފައެވެ. ފެނަކަ ކޯޕަރޭޝަނުން ވިދާޅުވީ މިއީ ކުންފުނީގެ ތާރީޚުގައިވެސް ކުންފުންޏާބެހޭގޮތުން ނެރުނު ފުރަތަމަ ރަނގަޅު އޮޑިޓް ރިޕޯޓު ކަމަށެވެ. މިއީ އެކުންފުނީގެ ނަން ކިލަނބުކޮށް ކުންފުންޏާމެދު ނުރަނގަޅު ތަޞައްވަރެއް އުފެއްދުމަށް މަސައްކަތް ކުރާ ފަރާތްތަކަށް ދެވުނު ރަނގަޅު ޖަވާބެއް ކަމަށް ފެނަކައިން ވިދާޅުވެއެވެ.
ފެނަކަ ކުންފުނީގެ އޮޑިޓް ރިޕޯޓުގައިވާ ގޮތުން ކުންފުންޏަށް މިދިޔަ އަހަރު އާމްދަނީގެ ގޮތުގައި، 1.4 ބިލިއަން ރުފިޔާ ލިބިފައިވެއެވެ. އަދި ޚަރަދު ކެނޑުމަށްފަހު ތިރީސް ފަސް މިލިއަން ނުވަ ލައްކަ ސާދަ ހާސް ހަ ސަތޭކަ ސާޅީސް ތިން ރުފިޔާ، ފައިދާގެ ގޮތުގައި އެކުންފުންޏަށް ވަނީ ލިބިފައެވެ.
އޭގެ ކުރީން 2018ވަނަ އަހަރު އެކުންފުންޏަށް އާމްދަނީގެ ގޮތުގައި 1.1 ބިލިއަން ރުފިޔާގެ އާމްދަނީ ލިބިފައިވާއިރު، 143 މިލިއަން ރުފިޔާގެ ގެއްލުންވެފައި ވެއެވެ.
މިއީ ސަރުކާރު ޙިއްސާވާ ކުންފުންޏަކުން ދެއްކި އެންމެ ތަފާތު ބޮޑު ބަދަލުކަމަށް ފެނަކައިން ވިދާޅުވެއެވެ. ފެނަކައިން މިކަމާއި ގުޅިގެން ނެރުނު ނޫސް ބަޔާނުގައިވަނީ، މިއީ ވޭތުވެ ދިޔަ 2 އަހަރުގެ ތެރޭގައި ކުންފުނީގެ ހިންގުމަށް ގެނެވުނު އިންޤިލާބީ ބަދަލުތަކުގެ ނަތީޖާ ކަމަށެވެ.
ފެނަކައިން ވިދާޅުވިގޮތުގައި ރައްކާތެރިކަމާއެކު ދެމެހެއްޓެނިވި ޚިދުމަތެއް ރައްޔިތުންނަށް ފޯރުކޮށްދިނުމަށް އެކުންފުނިން ވަނީ ގިނަ މަސައްކަތަކެއް ކޮށްފައެވެ. އެގޮތުން ވަސީލަތްތަށް ރަނގަޅު ކުރުމަށް މީގެ ކުރީން ކުރެވިފައި ނުވާވަރުގެ ބޮޑު ޚަރަދެއް ކުރެވިފައިވާކަން އެކުންފުނިން ފާހަގަ ކުރައްވައެވެ.
އެގޮތުން ކުންފުނިން ފާއިތުވި ދެ އަހަރު ތެރޭ 49 އިންޖީނުގޭގެ މަސައްކަތް އަލަށް ފަށައި، 20 އިންޖީނުގޭގެ މަސައްކަތް މުޅިން ނިންމައި، 77 މެގަވޮޓް ވަނީ އިންސްޓޯލް ކޮށްފައެވެ. މީގެ އިތުރުން އެކުންފުނީގެ ދަށުން މުޅި ރާއްޖޭގައި ހިންގަމުން އަންނަ ހުރިހާ އިންޖީނުގެއެއް ގުޅާލައި، ކަރަންޓު ވިއުގާ އަޕްގްރޭޑް ކޮށްފައިވާކަމަށް ފެނަކައިން ވިދާޅުވެއެވެ. އަދި ހަމަ އެއާއެކު، ދިގުލައިގެން ގޮސް ނުނިމިހުރި ފެނާއި ނަރުދަމާވެސް ކަށަވަރު ކޮށްދެމުންދާކަމަށް ކުންފުނިން ޔަޤީންކަން ދެއެވެ.
ފެނަކަ ކޯޕަރޭޝަން އުފައްދާފައިވަނީ 18 ޖޫން 2012ވަނަ އަހަރު އޭރު ރާއްޖޭގެ އެކި ސަރަހައްދުތަކުގައި ހިންގަމުން އައި ޔޫޓިލިޓީސް ކުންފުނިތަށް އުވާލުމަށް ފަހުއެވެ. އެކުންފުނި ފައިތުވި 8 އަހަރު ދުވަހު ހިންގަމުން އައި ބޮޑު ގެއްލުމެއްގައި ނަމަވެސް މިދިޔަ އަހަރު މިވަނީ ފައިދާވެފައެވެ.