ހޮރައިޒަން ފިޝަރީޒުން ޑިސެމްބަރު މަހު 1ން ފެށިގެން މަސް ގަންނައިރު ވަގުތުން ފައިސާދޭނެ ކަމަށް އެކުންފުނިން ބުނެފިއެވެ.
މިކަން ހާމަކޮށް އެކުންފުނިން ކޮށްފައިވާ އިއުލާނެއްގައި ބުނެފައި ވަނީ، މިއަންނަ މަހުން ފެށިގެން އެކުންފުނީގެ ދަށުން ހިންގާ މާންދޫ ފިޝަރީޒް ކޮމްޕްލެކްސް އަދި އެކުންފުނީގެ މަސްކިރާ ބޯޓުތަކުން މަސް ގަންނާނީ ފައިސާ ދީގެން ކަމަށެވެ. ނަމަވެސް އަގުތަކަށް ބަދަލެއް ނާންނާނެ ކަމަށް އެކުންފުނިން ބުނެއެވެ.
މިކަމާއި ގުޅޭގޮތުން ޕީއެސްއެމަށް މައުލޫމާތު ދެއްވަމުން އެކުންފުނިން ބުނީ، މިބަދަލަކީ މަސްވެރިންގެ އެދުމުގެ މަތިންނާއި މަސްވެރިކަމުގެ މިހާރުގެ ހާލަތަށް ބަލާފައި މިވަގުތު އެބަދަލު ގެނެވެން އޮތުމުން ގެނައި ބަދަލެއް ކަމަށެވެ. އަދި މި ނިންމުމަށް ބަދަލެއް ދެން އަންނާނީވެސް މަސްވެރިކަމަށް އަންނަ ބަދަލަކަށް ބަލާފައި ކަމަށް އެކުންފުނިން ބުނެއެވެ.
ހޮރައިޒަން އިން މިވަގުތު މަސް ގަންނަނީ 1.5 ކިލޯއިން މަތީގެ މަސް އައިސް އަޅައިގެން 14ރ. އަށް އަދި އައިސް ނާޅާ 13.00ރ އަށެވެ. އަދި 1.5 ކިލޯއަށް ވުރެ ބަރުދަން ލުއި ވެއްޖެނަމަ، އައިސް އަޅައިގެން 5 ރުފިޔާ 50 ލާރިއަށް، އަދި އައިސް ނާޅާ 5 ރުފިޔާ 15 ލާރިއަށެވެ.
އެކުންފުނިން މީގެ ކުރިން ވަގުތުން ފައިސާ ދީގެން މަސް ގަންނަ އަގާއި ފަހުން ފައިސާ ދޭގޮތަށް މަސް ގަންނަ އަގު ތަފާތެވެ. ނަމަވެސް މިދިޔަ ސެޕްޓެމްބަރު މަހު އެއަގުތަކަށް ބަދަލު ގެނެސް އެއް އަގެއްގައި މަސްގަންނަން ވަނީ ފަށާފައެވެ.