ކަޒަކިސްތާންގެ ޤައުމީ އެއަރލައިން، އެއަރ އަސްތާނާއިން ރާއްޖެއަށް ދަތުރުތައް ފަށައިފިއެވެ.
އެއަރ އަސްތާނާއިން ރާއްޖެއަށް ދަތުރުތައް ބާއްވާ ފުރަތަމަ ފަހަރެވެ. އެއަރލައިނުން ރާއްޖެއަށް ހަފްތާއަކު 3 ދަތުރު ކުރުމަށް ވަނީ ހަމަޖެހިފައެވެ، އެއީ ކޮންމެ ހަފްތާއެއްގެވެސް ހޯމަ، ބުދަ އަދި ހޮނިހިރު ދުވަހުއެވެ.
އެއަރ އަސްތާނާގެ ފްލައިޓު ވެލާނާ އިންޓަރނޭޝަނަލް އެއަރޕޯޓަށް ޖައްސާފައިވަނީ މިއަދު ހެނދުނު 7:05 ގައެވެ. އެ ފްލައިޓަށް ވެލާނާ އިންޓަރނޭޝަނަލް އެއަރޕޯޓުން ވަނީ ހޫނު މަރުޙަބާއެއް ކިޔާފައެވެ. އޭ ތްރީ 321 މަރުކައިގެ މި ބޯޓުން ރާއްޖެއަށްވަނީ 146 ފަތުރުވެރިން އައިސްފައެވެ.
އެއަރ އަސްތާނާއިން ރާއްޖެއަށް ދަތުރުތައް ފެށުމާއި ގުޅޭގޮތުން އެމްއޭސީއެލްގެ ޖެނެރަލް މެނޭޖަރ ކޯޕަރޭޓް ކޮމިއުނިކޭޝަންސް ހަސަން އަރީފް ވިދާޅުވީ، މިހާރު އެއަރލައިންއިން ރާއްޖެއަށް ދަތުރުތައް ފަށާފައި ވަނީ ފިނި މޫސުމާ ދިމާކޮށް ޗަޓަރ ފްލައިޓްތަކެއް ކަމުގައިވިޔަސް އުއްމީދަކީ އެއަރލައިނުން ރާއްޖެއަށް ޝެޑިއުލް ދަތުރުތައް ކުރުން ފެށުންކަމަށެވެ.
" ކަޒަކިސްތާނަކީ ޕޮޓެންޝިއަލް މާރކެޓެއް، އެމްއޭސީއެލްގެ އުއްމީދަކީ އެއަރލައިނުން ރާއްޖެއަށް ކުރާ ދަަތުރުތައް ޝެޑިއުލް ދަތުރުތަކަށް ބަދަލުވެގެންދިޔުން" ހަސަން ވިދާޅުވިއެވެ.
ހަސަން ފާހަގަކުރެއްވި ކުރިން ރާއްޖެއަށް ދަތުރުތައް ނުކުރާ އެއަރލައިންތަކުން ރާއްޖެއަށް ދަތުރުތައް ފެށުމަކީ ބޮޑު ކާމިޔާބީއެއް ކަަމަށެވެ. އަދި މިއީ ފަތުރުވެރިިކަމުގެ ދާއިރާގައި މަސައްކަތްކުރާ ގިނަ ފަރާތްތަކެއްގެ މަސައްކަތުގެ ނަތީޖާކަމަށް ހަސަން ފާހަގަކުރެއްވިއެވެ.
ރާއްޖެއަށް ވަނީ ވޯލްޑް ޓްރެވަލް އެވޯޑްސްގައި ވޯލްޑް ލީޑިންގ ޑެސްޓިނޭޝަން ލިބިފައެވެ. އަދި ޔޫއެންޓަބްލިއުޓީގެ ސޭފްޓީ ޓްރެވަލް ސްޓޭމްޕް، އޭސީއައި ސޭފްޓީ އެކްރެޑިޓޭޝަން ރާއްޖެއިން ވަނީ ހާސިލްކޮށްފައެވެ. މިފަދަ ކާމިޔާބީތަކާއި އެކު އެއަރލައިތަނުންނާއި ފަތުރުވެރިންގެ މެދުގައި ރާއްޖެއަށް އޮންނަ އިތުބާރާއި ޔަޤީންކަން އިތުރުވެގެންދާކަމަށްވެސް ހަސަން ވިދާޅުވިއެވެ.
އަސްތާނާއިން ރާއްޖެއަށް ފަށާ އެއަރލައިންގެ ދަތުރުތަކަށް ރަނގަޅު ޑިމާންޑެއް އޮތްކަމަށް އެއަރލައިނުން މީގެކުރިން ވަނީ ހާމަކޮށްފައެވެ.
އެގޮތުން މިމަހުގެ 16 ވަނަ ދުވަހުން ފެށިގެން ޖެނުއަރީ މަހުގެ 16 ވަނަ ދުވަހާއި ހަމައަށް ރާއްޖެއަށް ދަތުރުތައް ކުރުމަށް ބޭނުންކުރުމަށްހަމަޖެހިފައި ވަނީ ބޮއިންގ- 767 މަރުކައިގެ ބޯޓެކެވެ.
ރާއްޖޭގެ ބޯޑަރު ހުޅުވާލިފަހުން ރާއްޖެއަށް އަލުން ދަތުރުތައް ފަށާ އެއަރލައިންތައް ދަނީ އިތުރުވަމުންނެވެ. އަދި ގިނަ އެއަރލައިންތަކަކުން ދަނީ ރާއްޖެއަށް އޮންނަ ޑިމާންޑު ރަނގަޅުވުމުން ރާއްޖެއަށް ބާއްވާ ދަތުރުތަކުގެ އަދަދުވެސް އިތުރުކުރަމުންނެވެ.