ވޯލްޑް އެކްސްޕޯގެ 2020ގައި ރާއްޖޭގެ ފަރާތުން ބައިވެރިވާން ނިންމައި، އެކްސްޕޯގައި ބައިވެރިވާން ބޭނުންވާ ފަރާތްތަކަށް އެ ފުރުޞަތު ހުޅުވާލައިފިއެވެ.
އަންނަ އަހަރު އޮކްޓޯބަރުމަހުގެ 1 ވަނަ ދުވަހުން 2021 އިން 31 މާރިޗު 2022 އަށް ކުރިއަށް ގެންދިއުމަށް ހަމަޖެހިފައިވާ މިއެކްސްޕޯ ކުރިއަށް ގެންދިއުމަށް ހަމަޖެހިފައިވަނީ ދުބާއީގައެވެ.
މިއީ މެދު އިރުމަތީގައި މިއެކްސްޕޯ ބާއްވޭ ފުރަތަމަ ފަހަރެވެ. 6 މަސް ދުވަހަށް ދެމިގެންދާ މިއެކްސްޕޯއަކީ ރާއްޖޭގެ ފަތުރުވެރިކަން، ސަޤާފަތާއި އުފެދުންތެރިކަން އަދި ތަރައްޤީގެ ކުރިމަގު މުޅި ދުނިޔެއަށް ދައްކާލަން ލިބޭ ރަނގަޅު ފުރުސަތެއްކަމަށް އިކޮނޮމިކް މިނިސްޓްރީން ވިދާޅުވެއެވެ.
މިއެކްސްޕޯއަށް ތައްޔާރުވުމަށް ކުރަންޖެހޭ މަސައްކަތުގައި އިސްކޮށް ހަރަކާތްތެރިވަނީ އިކޮނޮމިކް މިނިސްޓްރީ އަދި ޓުއަރިޒަމް މިނިސްޓްރީއެވެ. މިއެކްސްޕޯގެ ތީމަކީ ކަނެކްޓިން މައިނޑްސް - ކްރިއޭޓިންގ ފިއުޗަރއެވެ. މީގެ ދަށުން 3 ސަބް ތީމެއް ވަނީ ކަނޑައެޅިފައެވެ. އެއީ އޮޕޮޗުނިޓީ، މޮބިލިޓީ އަދި ސަސްޓެއިނަބިލިޓީއެވެ. ރާއްޖޭއިން އެކްސްޕޯގައި ބައިވެރިވަނީ ސަސްޓެއިނަބިލިޓީ ތީމުގެ ދަށުންނެވެ.
ކޮންމެ 5 އަހަރަކުން އެއްފަހަރު ދުނިޔޭގެ ކަންކޮޅުތަކުގައި ބާއްވާ މިއެކްސްޕޯ ލޯންޗު ކޮށްދެއްވުމުގެ ގޮތުން އިކޮނޮމިކް މިނިސްޓަރ ފައްޔާޒް އިސްމާއީލް ވިދާޅުވީ، މިއީ ދިވެހި ސަރުކާރުން ރާއްޖޭގެ އިޤްތިޞާދު ފުޅާކުރުމުގެ މަސައްކަތް ކުރަމުންދާއިރު ލިބޭ ރަނގަޅު ފުރުސަތެއް ކަމަށެވެ. އަދި އެކްސްޕޯގައި ކުދި އަދި މެދު ފަންތީގެ ވިޔަފާރިތަކާއި ބޮޑެތި ވިޔަފާރިތަކުން ބައިވެރިވުމަށް މިނިސްޓަރ ވަނީ ގޮވާލައްވާފައެވެ.
އެހެން އެކްސްޕޯ ތަކާއި ޙިލާފަށް މިއެކްސްޕޯގައި ރާއްޖޭގެ ސަޤާފަތް ވަރަށް ބޮޑަށް ދައްކާލެވިގެންދާނެކަމަށް ސަރުކާރުން ބުނެއެވެ. މީގެ އިތުރުން ރާއްޖޭގެ ރީތި ޤުދުރަތީ ވެށި އިޝްތިހާރުކޮށް، ދެމެހެއްޓެނިވި ތަރައްޤީއަށް ކުރަމުންދާ މަސައްކަތް ދެއްކުމުގެ މަގުފަހިވެގެންދާނެކަމަށް ސަރުކާރުން ބުނެއެވެ. އަދި މީގެ އިތުރުން މިއީ ދުނިޔޭގެ އެކި ކަންކޮޅުތަކުން އިންވެސްޓަރުން ޒިޔާރަތްކުރާނެ ތަނަކަށްވުމުން ރާއްޖޭގައި ހުރި އިންވެސްޓްމެންޓު ފުރުސަތުތަކުގެ މައުލޫމާތު އިންވެސްޓަރުންނަށް ލިބިގެންދާނެކަމަށް ސަރުކާރުން ބުނެއެވެ.
މިއެކްސްޕޯގަިއ ރާއްޖޭގެ ކަންނެލީގެ އަދި ދޮށީގެ މަސްވެރިކަން މާކެޓު ކުރުމަށް ފަހި ފުރުސަތުތަށް ލިބިގެންދާނެ ކަމަށް ފިޝަރީޒް މިނިސްޓްރީންވެސް ވަނީ ވިދާޅުވެފައެވެ. އަދި މިދާއިރާގެ ވީހާވެސް ގިނަ ފަރާތްތަކުން ބައިވެރިވުމަށް މިނިސްޓްރީން ވަނީ އެދިވަޑައިގެންފައެވެ. މިއާއިއެކު ފަންނާނުން ލިބިފައިވާ ހުނަރުތައް ދައްކާލުމާއި ރާއްޖޭގެ ސަޤާފަތް ދައްކާލުމާއި، ސްކޫލު އަދި ޔުނިވާސިޓީ ދަރިވަރުންނަށް ވެސް ފުރުސަތު އޮންނާނެކަމަށް އިކޮނޮމިކް ސަރުކާރުން ބުނެއެވެ.
މި އެކްސްޕޯގައި 193 ޤައުމަކުން ބައިވެރިވުމަށް ހަމަޖެހިފައިވާއިރު، 25 މިލިއަން މީހުން މި އެކްސްޕޯއަށް ޒިޔާރަތްކުރާނެކަމަށް ބެލެވެއެވެ. މި އެކްސްޕޯ ބޭއްވުމަށް ކުރިން ހަމަޖެހިފައި އޮތީ މި އަހަރުގެ އޮކްޓޫބަރުމަހު ނަމަވެސް، ކޯވިޑް-19އާ ގުޅިގެން، އެކްސްޕޯ މިހާރު ވަނީ އަންނަ އަހަރުގެ އޮކްޓޫބަރުމަހަށް ފަސްކޮށްފައެވެ.