އައްޑޫ އިކުއިޓޯރިއަލް ހޮސްޕިޓަލަށް ބޭސް ފޯރުކޮށްދިނުމާއި ގުޅޭ ގޮތުން އެސްޓީއޯއާއެކު މަޝްވަރާކޮށްފި
އައްޑޫ އިކުއިޓޯރިއަލް ހޮސްޕިޓަލަށް ބޭނުންވާ ބޭސް ދާއިމީ ގޮތެއްގައި ފޯރުކޮށްދިނުމާއި ގުޅޭ ގޮތުން، އެހޮސްޕިޓަލުން އެސްޓީއޯއާއިއެކު މަޝްވަރާކޮށްފިއެވެ.
މި ބައްދަލުވުމުގައި އެސްޓީއޯގެ މެނޭޖިންގް ޑިރެކްޓަރ ހުސެއިން އަމްރު އާއި އައްޑޫ އިކުއިޓޯރިއަލް ހޮސްޕިޓަލުގެ ސީއީއޯ ޑރ. މުހައްމަދު ސޯލިހު ވަނީ ބައިވެރިވެ ވަޑައިގެންފައެވެ.
އޭއީއެޗް އިން ވިދާޅުވީ މި ބައްދަލުވުމުގައި އެ ހޮސްޕިޓަލަށް ބޭނުންވާ ވަސީލަތްތަކާއި ބޭސް ހޯދުމުގައި ހުރި ދަތިތައް ފާހަގަކޮށް އެކަމުގައި އެސްޓީއޯއިން ވެދެވޭނެ އެހީތެރިކަމާއި ގުޅޭގޮތުން މަޝްވަރާކޮށްފައިވާ ކަމަށެވެ. އެގޮތުން ދެމެހެއްޓެނިވި ގޮތެއްގައި އެސްޓިއޯއާއި ގުޅިގެން އެ ހޮސްޕިޓަލަށް ބޭހާއި އިތުރު ވަސީލަތްތައް ހޯދުމާއި ގުޅޭގޮތުން މަޝްވަރާކޮށްފައިވާކަމަށް އެ ހޮސްޕިޓަލުން ވިދާޅުވެއެވެ.
މީގެ އިތުރުން ކުރިއަށް އޮތް ތަނުގައި، ކީމޯ ފަރުވާ ދެމުންދާ ފަރާތްތަކަށް ބޭނުންވާ ބޭސް ފޯރުކޮށްދިނުމާއި ހުޅޫމީދޫގައި ހިންގަމުންދާ އެސްޓީއޯގެ ބޭސްފިހާރަ 24 ގަޑިއިރު ހިދުމަތްދޭ ތަނަކަށް ބަދަލު ކުރުމާއި ގުޅޭ ގޮތުންވެސް މި ބައްދަލުވުމުގައި މަޝްވަރާކޮށްފައިވާކަމަށް އައްޑޫ އިކުއިޓޯރިއަލް ހޮސްޕިޓަލުން ވިދާޅުވެއެވެ.
އައްޑޫ އިކުއިޓޯރިއަލް ހޮސްޕިޓަލުގެ ތެރޭގައި ހުންނަ ބޭސްފިހާރަ މިހާރު ހިންގަމުން ދަނީ އެސްޓީއޯ އިންނެވެ. މިއީ ރާއްޖޭގެ ހުރިހާ ރަށަކަށް ބޭސް ފޯރުކޮށްދިނުމަށް އެސްޓީއޯއިން ކުރަމުންދާ މަސައްކަތުގެ ދަށުން އެ ކުންފުނިން ހިންގާ 188 ވަނަ ބޭސްފިހާރައެވެ.