އަންނަ އަހަރު 1.5 މިލިއަން ފަތުރުވެރިން ރާއްޖެ ޒިޔާރަތްކުރާނެކަމަށް ޓޫރިޒަމް މިނިސްޓްރީން އަންދާޒާކޮށްފިއެވެ.
ޓޫރިޒަމް މިނިސްޓްރީން މިގޮތަށް އަންދާޒާކޮށްފައިވާއިރު ބޯޑަރު ހުޅުވާލިފަހުން ރާއްޖެއަށް މިހާތަނަށް 1 ލައްކަ ފަތުރުވެރިން ވަނީ ޒިޔާރަތްކޮށްފައެވެ.
ޓޫރިޒަމް މިނިސްޓްރީން ވިދާޅުވީ، މިއަހަރު 525000 ފަތުރުވެރިން ރާއްޖެ ޒިޔާރަތްކުރާނެކަމަށް އަންދާޒާކުރާއިރު، އަންނަ އަހަރު 1.5 މިލިއަން ފަތުރުވެރިން ރާއްޖެ އަންނާނެކަމަށް މިހާރު އަންދާޒާކުރެވޭކަމަށެވެ. އަދި އަންނަ އަހަރުގެ ތެރޭގައި 10 މިލިއަނަށްވުރެ ބެޑް ނައިޓްސް އިތުރުވާނެކަމަށްވެސް އެ މިނިސްޓްރީން ވަނީ އަންދާޒާކޮށްފައެވެ.
ރާއްޖޭގެ ފަތުރުވެރިކަން އަލުން ކޮޅަށް ނެގުމަށްޓަކައި ދައިރާގެ ފަރާތްތަކުން ދެއްވާ އެއްބާރުލުމަށް ޓޫރިޒަމް މިނިސްޓްރީން ވަނީ ޝުކުރު އަދާކޮށްފައެވެ. ރާއްޖެ އަންނަ ފަތުރުވެރިން އިތުރުކޮށް ބޭރުގެ މާކެޓްތަކުގައި ރާއްޖެ އިޝްތިހާރުކުރުމަށް ސަރުކާރާއި ކަމާގުޅޭ ފަރާތްތަކުން ކޯވިޑްގެ ހާލަތުގައިވެސް ވަނީ ގިނަ ކެންޕެއިންތަކެއްވެސް ކުރިއަށްގެންގޮސްފައެވެ.
މިމަހުގެ ތެރޭގައި މާލެ ސަރަހައްދުގެ ގެސްޓްހައުސްތައްވެސް އަލުން ހުޅުވާލުމަށް ޓޫރިޒަމް މިނިސްޓްރީން މިހާރު ވަނީ ނިންމާފައެވެ. އަދި ރާއްޖެ އަންނަ ފަތުރުވެރިންގެ އަދަދު އިތުރުވެ އެއަރޕޯޓްވެސް މިހާރު ވަނީ ފުރިފައެވެ.