ރާއްޖެއަށް އަންނަ ފަތުރުވެރިން އިތުރުވަމުންދާއިރު، ފަތުރުވެރިންނަށް ޙިދުމަތް ދޭ ތަންތަނުން ގައިޑްލައިންތަކަށް ސަމާލުކަން ދިނުމަށް ޓުއަރިޒަމް މިނިސްޓްރީން އިލްތިމާސްކޮށްފިއެވެ،
ޓުއަރިޒަމް މިނިސްޓްރީން މިގޮތަށް އިލްތިމާސް ކޮށްފައިވަނީ، ފަތުރުވެރިންނަށް ޙިދުމަތްދޭ ތަންތަނަށް ފޮނުވި ސާކިއުލާއްގައެވެ. މިގޮތަށް މިނިސްޓްރީން އިލްތިމާސްކޮށްފައި މިވަނީ، އިނގިރޭސީވިލާތުގައި ކޯވިޑް-19ގެ އާ ވައްތަރެއް ފެތުރެމުންދާކަމުގެ މައުލޫމާތު ލިބިފައިވާކަމަށް އެޗްޕީއޭއިން ހާމަކޮށްފައިވާ ދަނޑިވަޅެއްގައެވެ.
އެގޮތުން ފަތުރުވެރިންނަށް ޙިދުމަތްދޭ ތަންތަނުގައި ހެދިފައިވާ އިމަޖަންސީ ޕްލޭންތަކަކަކީ ކޮންމެ ވަގުތަކުވެސް ތަންފީޒުކުރެވޭ ޕްލޭންތަކެއްކަން ކަށަވަރުކުރުމަށް ޓުއަރިޒަމް މިނިސްޓްރީން ވަނީ އިލްތިމާސްކޮށްފައެވެ.
މީގެ އިތުރުން ފަތުރުވެރިންނާއި އެތަންތަނުގެ މުވައްޒަފުން މޫދުގައި އުޅޭއިރު، އިތުރަށް ސަމާލުކަން ދިނުމަށް ޓުއަރިޒަމް މިނިސްޓްރީން ވަނީ އިލްތިމާސްކޮށްފައެވެ. އަދި ހަމައެއާއެކު އެޗްޕީއޭ އަދި ޓުއަރިޒަމް މިނިސްޓްރީން ކަނޑައަޅާފައިވާ ޕްރޮޓޮކޯލްތަކާއި ގައިޑްލައިންތައް ފުރިހަމައަށް ތަންފީޒުކުރުމަށް އަހަމިއްޔަތުކަން ދިނުމަށް މިނިސްޓްރީން ވަނީ އިލްތިމާސް ކޮށްފައެެވެ.
ޓޫރިސްޓް ފެސިލިޓީތަކުން ގައިޑްލައިންތަކަށް ސަމާލުކަންދިނުމަށް އިލްތިމާސްކޮށްފައިވާއިރު ދުވާލެއްގެ މައްޗަށް ރާއްޖެ އަންނަ ފަތުރުވެރިންގެ އަދަދު ދަނީ ބޮޑަށް އިތުރުވަމުންނެވެ. އެގޮތުން މިދިޔަ ހަފްތާގެ ނިޔަލަށް ބޯޑަރު ހުޅުވިފަހުން އެއްލައްކަ ހަތާވީސް ހާހަށްވުރެ ގިނަ ފަތުރުވެރިން ވަނީ ރާއްޖެ ޒިޔާރަތްކޮށްފައިވެއެވެ.
ޓުއަރިޒަމް މިނިސްޓްރީން އާންމު ކޮށްފައިވާ ތަފާސް ހިސާބުތަށް ދައްކާ ގޮތުން، ފަތުރުވެރިންނަށް ޙިދުމަތް ދިނުމަށް މިހާތަނަށް 458 ތަނަކަށް ހުއްދަ ދީފައިވެއެވެ. މީގެ ތެރޭގައި ރިސޯޓު، މެރިނާ، ސަފާރީ، ހޮޓެލް އަދި ގެސްޓް ހައުސް ހިމެނެއެވެ.