އެގްރޯނެޓްގެ ކޮންޓްރެކްޓް ފާމިންގ މަޝްރޫއު ލ. އަތޮޅުގެ ފެށުމަށް ދަނޑުވެރިންނާއެކު ސޮއިކޮށްފިއެވެ.
ލ. އަތޮޅުގައި މި މަޝްރޫއު ފަށާފައިވަނީ ޔޫއެންޑީޕީގެ އެހީތެރިކަމާއި އެކުގައެވެ. މިއީ ސަރުކާރުން އިމްޕޯޓަށް ބަރޯސާވުން ކުޑަކުރުމަށް ކުރިއަށްގެންދާ މަޝްރޫއެއް ކަމަށް އެގްރޯ ނޭޝަނަލް ކޯޕަރޭޝަން (އެގްރޯނެޓް) އިން ބުނެއެވެ. ލ. އަތޮޅުގައި މިމަޝްރޫއު ފަށާނީ ގާތްގަނޑަކަށް 120 ދަނޑުވެރިންނާއެކު ކަމަށް އެކުންފުނިން ބުނެއެވެ. އަދި ކުރިއަށްވެސް އިތުރު ދަނޑުވެރިން ބައިވެރިވާނެ އުއްމީދު ކުރައްވާ ކަމަށް އެކުންފުނިން ބުނެއެވެ.
އެގްރޯނެޓްއިން މިވަގުތު އެއްބަސްވުންތަކުގައި ސޮއި ކޮށްފައިވަނީ ލ. ގަން، އިސްދޫ، ކަލައިދޫ، އަދި ފޮނަދޫގެ ދަނޑުވެރިންނާއެކުގައެވެ.
މިކޯޕަރޭޝަން އާއި ޔޫ.އެން.ޑީ.ޕީ އާއި ގުޅިގެން ހިންގޭ ފުރަތަމަ މަޝްރޫޢުގެ ފުރަތަމަ ފިޔަވަހީގެ ދަށުން ކޮންޓްރެކް ފާރމިންގ ގެ ގޮތުގައި ދަނޑުވެރިކަން ކުރުމަށް ޝައުޤުވެރިވާ ފަރާތްތަކާއި އެކު އެއްބަސްވުމުގައި ސޮއި ކުރުމުގެ ރަސްމިއްޔާތު ލ. އަތޮޅުގައި ކުރިޔަށް ދަނީ! pic.twitter.com/FVC7vL6FoW
— AgroNat (@agro_nat) December 22, 2020
މިމަޝްރޫއާއި ގުޅޭ ގޮތުން ޕީއެސްއެމް ނިއުސްއަށް މައުލޫމާތު ދެއްވަމުން އެގްރޯނެޓް ކުންފުނީގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވީ، ލ. އަތޮޅުގައި ސޮއި ކުރެވިގެން ދިޔަ އެއްބަސްވުންތަކާއި އެކު މަޝްރޫގެ އަމަލީ މަސައްކަތް ފެށިގެންދާނެ ކަމަށެވެ. އެގޮތުން، މި އެއްބަސްވުން ތަކުގެ ދަށުން އެގްރޯނެޓްގެ ފަރާތުން ދަނޑުވެރިންނަށް ބޭނުންވާ ސާމާނާއި ތަމްރީން އަދި އެހެނިހެން އެހީތެރިކަން ފޯރުކޮށްދޭނެ ކަމަށް އޭނާ ވިދާޅުވިއެވެ.
ހާރޫން ވިދާޅުވީ މަޝްރޫއުގެ ދަށުން މި ސަރަހައްދުގައި ވަކި ހާއްސަ ބާވަތެއް ހެއްދުމަށް ނިންމާފައި ނެތް ކަމަށެވެ. އަދި މިދަނޑުވެރިން ހައްދާނީ ސަރުކާރުން އިމްޕޯޓު މަދު ކުރުމަށްޓަކައި ހައްދަން ކަނޑައަޅާފައިވާ 17 ބާވަތް ކަމަށާއި، އެ 17 ބާވަތް ހުރިހާ ދަނޑުވެރިންގެ މެދުގައި ބަހާލާނީކަމަށް ހާރޫން ވިދާޅުވިއެވެ.
އެގްރޯނެޓް ކުންފުނިން މައުލޫމާތުދޭ ގޮތުގައި މިމަޝްރޫއު ފެށިގެން ދިއުމާއެކު ރަށްރަށުގެ ދަނޑުވެރިން ހައްދާ ބާވަތްތައް ރައްކާކޮށް، ސަޕްލައި ކުރެވޭނެ އިންތިޒާމު އެކުންފުނިން ހަމަޖައްސާވާނެކަމަށެވެ.
މަރްޙަބާ ދިވެހި ދަނޑުވެރިޔާ! ދަނޑުވެރިކަމުގެ ބާވަތްތައް އުފައްދާ ބާޒާރަށް ފޯރުކޮށްދިނުމަށްޓަކައި އެއްބަސްވުންތަކުގައި ސޮއިކުރެވި، އޭގެ ޢަމަލީ މަސައްކަތް ފެށިގެން ދިޔުމަކީ ދަނޑުވެރިކަން ތަރައްޤީ ކުރުމަށް އެޅިގެން ދިޔަ ވަރަށް ވެސް ހަރުދަނާ ފިޔަވަޅެކެވެ. pic.twitter.com/zvxptlyD6f
— AgroNat (@agro_nat) December 22, 2020
އެގްރޯނެޓްގެ މަޝްރޫޢުގެ ދަށުން ދަނޑުވެރިންނާއި އެކު ހެދޭ އެއްބަސްވުމުގެ ދަށުން އުފައްދާ ބާވާތްތައް އެކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބި އުފެއްދުންތަކަށް ހަމަ އަގު ލިބިގެންދާނެއެވެ.