އައްޑޫ ފްލައިން ސްކޫލުގައި ދަރިވަރުންނަށް އެންމެ އެކަށީގެންވާ ގޮތަށް ތަމްރީނު ދެވޭނެ ވަސީލަތްތައް ޤާއިމު ކުރެވިފައިނެތްކަން ސާފުވެފައިވާކަމަށް ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީން ވިދާޅުވެއްޖެއެވެ.
މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީން މިކަން ހާމަކޮށްފައި މިވަނީ ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީގެ ބައެއް މެންބަރުން އައްޑޫ ފްލައިން ސްކޫލުގެ މައްސަލައިގައި ވެގެން އުޅޭ ގޮތް ދެނެގަތަމަށް އައްޑޫ ސިޓީއަށް ކުރި ޒިޔާރަތުގެ ތެރެއިންނެވެ. މިޒިޔާރާތުގައި އައްޑޫ ފްލައިން ސްކޫލާއި ސީދާ ގުޅުން ހުރި 3 ފަރާތްތަކާއި އަދި ސްކޫލުގައި ކިޔަވާ ދަރިވަރުންނާ ކޮމެޓީގެ މެންބަރުން ވަނީ ބައްދަލުކޮށްފައެވެ.
އައްޑޫ ސިޓީގައި ހުންނަ އޭޝިޔަން އެކަޑަމީ އޮފް އެރޮނޮޓިކްސް ފުލައިންގ ސުކޫލްގެ ދަރިވަރުންނަށް ދިމާވާ ދަތިތައް ހައްލުކުރުމުގެ ގޮތުން، ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއިން، އައްޑޫ އިންޓަރނޭޝަނަލް އެއަރޕޯޓުގެ ބޭފުޅުންނާ ބައްދަލުކޮށް މަޝްވަރާކުރުން pic.twitter.com/f4Sv568TxU
— People's Majlis (@mvpeoplesmajlis) December 27, 2020
އެ ކޮމެޓީން އައްޑޫއަށް ކުރެއްވި ޒިޔާރާތުގައި، އެ ކޮމެޓީގެ މުގައްރިރު އަދި ބާރަށު ދާއިރާގެ މެންބަރު އަހްމަދު އަބްދުﷲ، ނައިބު މުގައްރިރު ކެލާ ދާއިރާގެ މެންބަރު އިބްރާހިމް ޝަރީފްއާއި، ހޮޅުދޫ ދައިރާގެ މެންބަރު ޔޫނުސް އަލީއާއި، ކުރެންދޫ ދާއިރާގެ މެންބަރު އަބްދުލް ޤަނީ އަބްދުލް ހަކީމްއާއި، ތުލުސްދޫ ދާއިރާގެ މެންބަރު އިބްރާހީމް ނަސީމް ބައިވެރިވެ ވަޑައިގެންނެވިއެވެ.
ކޮމެޓީން ވަނީ އޭޝިއަން އެކަޑަމީ އޮފް އެއިރޮނޯޓިކްސްގެ ނަމުގައި އައްޑޫގައި ހިންގަމުންދާ ފްލައިން ސްކޫލާއި ގުޅޭ އެއްބަސްވުމުގެ ތަފްސީލު ހޯއްދެއްވުމަށް އައްޑޫ އިންޓަނޭޝަނަލް އެއާޕޯޓާއި ބައްދަލު ކުރައްވާފައެވެ. އަދި ފްލައިން ސްކޫލުގެ ހިންގުމާއި ހަވާލުވެ ތިއްބެވި އިސްފަރާތްތަކާއި، ފްލައިން ސްކޫލުގެ ދަރިވަރުންގެ އިތުރުން އައްޑޫސިޓީ ކައުންސިލާއިވެސް މިމައްސަލައިގައި ކޮމެޓީގެ މެންބަރުން ވަނީ ބައްދަލު ކުރައްވާފައެވެ.
މި ބައްދަލުވުންތައް ނިންމަވާލެއްވުމަށްފަހު ޕީއެސްއެމް ނިއުސްއަށް މައުލޫމާތު ދެއްވަމުން ކޮމެޓީގެ މުގައްރިރު ބާރަށު ދައިރާގެ މެންބަރު އަހުމަދު އަބްދުﷲ ވިދާޅުވީ، ކޮމެޓީގެ ފަރާތުން އައްޑޫގައި ކުރި މަސައްކަތުން ސާފުވެގެންދިޔަ އެއްކަމަކީ ފްލައިން ސްކޫލުގައި ދަރިވަރުންނަށް އެންމެ އެކަށީގެންވާ ގޮތަށް ކިޔަވައިދެވޭނެ އިންތިޒާމެއް އަދި ވަސީލަތެއް ނެތް ކަމަށެވެ.
އައްޑޫ ސިޓީގައި ހުންނަ އޭޝިޔަން އެކަޑަމީ އޮފް އެރޮނޮޓިކްސް ފުލައިންގ ސުކޫލްގެ ދަރިވަރުންނަށް ދިމާވާ ދަތިތައް ހައްލުކުރުމުގެ ގޮތުން، ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއިން، ފުލައިންގ ސްކޫލްގެ މެނޭޖްމަންޓާ ބައްދަލުކޮށް މަޝްވަރާކުރުން pic.twitter.com/KdxmP1KxPE
— People's Majlis (@mvpeoplesmajlis) December 28, 2020
"ފްލައިން ސްކޫލުގެ މެނޭޖްމެންޓާއިވެސް ބައްދަލުކުރީމާ، އަޅުގަނޑުމެންނަށް އެބަ ސާފުވޭ. އެކުދިންނަށް ބޭނުންވާ ފެސިލިޓީސް މިވަގުތު އެތަނުގައި ނެތް. އަދި އެކުދިންނަށް ފްލައި ކުރެވޭނެ ގޮތްތަކެއްވެސް ރަނގަޅަށް އިންތިޒާމު ކުރެވިފައި ނެތް. ބައެއް ކުދިން އަޅުގަނޑުމެންނާއި ހިއްސާ ކުރި މައުލޫމާތުން އެނގިގެން ދިޔަ އެކުދިން ކޯހަށް ދައްކަން ޖެހޭ ފައިސާގެ އަދަދުގެ އިތުރަށްވެސް މިހާރުވެސް ދެއްކިފައިވާ ކަމަށް. އަދި އިތުރަށްވެސް ދައްކަން ޖެހޭ ކަމަށް ބައެއް ކުދިން ފާހަގަ ކުރި. " ބާރަށު ދާއިރާގެ މެންބަރު ވިދާޅުވިއެވެ.
ކޮމިޓީގެ މުޤައްރިރު ވިދާޅުވީ، މިދަތުރުން ދަރިވަރުންގެ ހުރި ކަނބޮޑުވުންތަކާއި ސްކޫލުގައި ހުރި މައްސަލަތައް ދެނެގަނެވިއްޖެކަމަށެވެ. އަދި ސިޓީ ކައުންސިލުން މިކަމުގައި ހުރި ކަންބޮޑުވުންތައްވެސް ދެނެގަނެވިފައިވާކަމަށް އޭނާ ވިދާޅުވިއެވެ. މީގެ އިތުރުން ސިވިލް އެވިއޭޝަން އޮތޯރިޓީ އަދި ހަޔަރ އެޑިއުކޭޝަން މިނިސްޓްރީއާވެސް މިކަމާއި ގުޅިގެން ބައްދަލުކުރުމަށް ހަމަޖެހިފައިވާކަމަށް މުޤައްރިރު ވިދާޅުވިއެވެ.
މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީގެ ބައްދަލުވުންތަކުން، ފްލައިން ސްކޫލުގެ އެގްރީމެންޓް އަންނަ އަހަރު ޖުލައި މަހަށް ހަމަވާއިރު، އެގްރީމެންޓް އާކުރުމުގެ ބަދަލުގައި އޭއައިއޭއިން އަލުން ފްލައިން ސްކޫލެއް ހިންގުމަށް ބިޑަށް ހުޅުވަން ނިންމާފައިވާކަން ހާމަވިއެވެ.
އައްޑޫ ސިޓީގައި ހުންނަ އޭޝިޔަން އެކަޑަމީ އޮފް އެރޮނޮޓިކްސް ފުލައިންގ ސުކޫލްގެ ދަރިވަރުންނަށް ދިމާވާ ދަތިތައް ހައްލުކުރުމުގެ ގޮތުން، ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީއިން، އައްޑޫ ސިޓީ ކައުންސިލްގެ ބޭފުޅުންނާ ބައްދަލުކޮށް މަޝްވަރާކުރުން pic.twitter.com/S6z5kjH81U
— People's Majlis (@mvpeoplesmajlis) December 28, 2020
މަޖިލީހުގެ ޤައުމީ ތަރައްޤީއާއި ތަރިކައިގެ ކޮމެޓީ އައްޑޫއަށް ދަތުރު ކޮށްފައި މިވަނީ މަޖިލިސް ޗުއްޓީގައި އޮތް ދުވަސްވަރެއްގައެވެ. ކޮމެޓީގެ މުގައްރިރު ވިދާޅުވީ، މިހާރު އަމާޒަކީ މަޖިލިސް އަލުން ހުޅުވެންވާއިރަށް ކޮމެޓީގެ މަސައްކަތްތައް ނިންމާ މަޖިލީހުގެ ތަޅުމާއި ހަމައަށް މައްސަލަ ގެންދިއުން ކަމަށެވެ.