ދުނިޔޭގެ ފަތުރުވެރިކަމުގެ ދުވަހުގެ މުނާސަބަތުގައި ބާއްވާ ހަރަކާތްތައް މިއަހަރު ކުރިއަށް ގެންދާނީ އައްޑޫ ސިޓީގައި ކަމަށް ޓުއަރިޒަމް މިނިސްޓަރ އަބްދުﷲ މައުސޫމް ވިދާޅުވެއްޖެއެވެ.
އައްޑޫގައި ބޭއްވި ބްރިޓިޝް ލޯޔަލްޓީ ޝިޕްވްރެކަށް 75 އަހަރު ފުރުން ފާހަގަކުރުމުގެ ޑައިވް ހަރަކާތް އިފްތިތާޙުކުރުމަށް ބޭއްވި ރަސްމިއްޔާތުގައި މިނިސްޓަރ މައުސޫމް ވިދާޅުވީ، މިއަހަރުގެ ފުރަތަމަ ފަތުރުވެރިކަމުގެ ހަރަކާތް އައްޑޫގައި ބޭއްވިގެންދާއިރު، މިއަހަރުގެ ފަތުރުވެރިކަމުގެ މައި ހަރަކާތްވެސް އައްޑޫގައި ބޭއްވުމަށް އައްޑޫ ސިޓީގެ މޭޔަރ ދައުވަތު ދެއްވާފައިވާކަމަށެވެ. އަދި އައްޑޫގެ މޭޔަރ ދެއްވި ދައުވަތު ޤަބޫލު ކުރައްވައި، ފަތުުރުވެރިކަމުގެ ދުވަހުގެ މައި ހަރަކާތް އައްޑޫގައި ބޭއްވުމަށް ނިންމާފައިވާކަމަށެވެ.
" އައްޑޫސިޓީ 2021 ވަނަ އަހަރު ޓުއަރިޒަމްގެ އެންމެ އިސް ހަރަކާތްތަކެއް ގެންދާނެ ސިޓީއެއްގެ ގޮތުގައި، އަޅުގަނޑަށް މިހާރު ޔަޤީންވެ ކަށަވަރުވެއްޖެ. އިރާދަ ކުރެއްވިއްޔާ އެކަންތައް އެހެންވާނެ. މިއަހަރު އަޅުގަނޑުމެން ފަތުރުވެރިކަމަށް ބާއްވާ އެންމެ ފުރަތަމަ ހަރަކާތް މިބޭއްވެނީ އައްޑޫގައި. ދުނިޔޭގެ ފަތުރުވެރިކަމުގެ ދުވަހަކީ ރައްޖޭގައި ވަރަށް ކުލަގަދަކޮށް ފާހަގަ ކުރާ ދުވަހެއް. މިދިޔަ އަހަރު ފަނޑުކޮށް ފާހަގަކުރުމުގެ ފުރުސަތު ލިބުނީ. އެހެންނަމަވެސް ސިޓީގެ މޭޔަރ އަޅުގަނޑުމެންނަށް އެ ދެއްވި ދައުވަތު ބަލައިގަނެ އިރާދަ ކުރެއްވީޔާ، ދުނިޔޭގެ ފަތުރުވެރިކަމުގެ ދުވަސް ރާއްޖޭގައި ފާހަގަކުރާއިރު މައި ހަރަކާތްތައް ގެންދާނީ އައްޑޫސިޓީގައި" ޓުއަރިޒަމް މިނިސްޓަރ ވިދާޅުވިއެވެ.
މިނިސްޓަރ މައުސޫމް ވިދާޅުވީ ދަނޑުވެރިކަމާއި މަސްވެރިކަމަކީ ފަތުރުވެރިކަމާއި ގުޅި ލާމެހިފައިވާ ދެ ސިނާއަތަށްވާއިރު، އައްޑޫ ސިޓީގެ ދެ ރިސޯޓެއް ބަންދުކުރުމުން އައްޑޫގެ ދަނޑުވެރިންނަށް އަސަރުކޮށްފައިވާކަމަށެވެ. އެހެންކަމުން މިއަހަރު ފަތުރުވެރިކަމާއި މަސްވެރިކަމާއި ދަނޑުވެރިކަން ކުރިއެރުވުމަށް ސަރުކާރުގެ ސިޔާސަތުތައް ބައްޓަން ކުރުމަށް ކަނޑައެޅިފައިވާ ކަމަށް މިނިސްޓަރ ވިދާޅުވިއެވެ.
މިނިސްޓަރގެ ވާހަކަފުޅުގައި ބްރިޓިޝް ލޯޔަލްޓީ ޝިޕްވްރެކް ޑައިވް ސައިޓަކީ ރާއްޖެ އަދި ދުނިޔޭގެ މަޤްބޫލު ޑައިވް ސައިޓެއްގެ ގޮތުގައި އިޝްތިހާރުކޮށްދޭނެކަމަށް ވިދާޅުވިއެވެ.
މިރަސްމިއްޔާތުގައި ވާހަކަ ދައްކަވަމުން އައްޑޫސިޓީގެ މޭޔަރ އަބްދުﷲ ސޯދިޤް ވިދާޅުވީ މިހަރަކާތާއެކު ކުރިއަށް އޮތް ތަނުގައި ކޮންމެ އަހަރަކުވެސް މި ދުވަހު މުހިންމު ހަރަކާތްތަކެއް ސިޓީ ކައުންސިލާއި އެކިފަރާތްތަކާއި ގުޅިގެން ކުރިއަށް ގެންދަވާނެ ކަމަށެވެ.
ބްރިޓިޝް ލޯޔަލްޓީ ފައްތާލިތާ 75 އަހަރު ފުރުމުގެ ހަރަކާތް މިއަދު އިފްތިތާޙް ކޮށްފައިވާއިރު، މިހަރަކާތުގައި ރައްޖެއަށް ނިސްބަތްވާ 75 ޑައިވަރުން މިސަރަހައްދަށް ޑައިވް ކޮށްފައިވެއެވެ. އެގޮތުން އައްޑޫ އަށް ނިސްބަތްވާ ގިނަ އަދަދެއްގެ ޑައިވަރުންގެ މިހަރަކާތުގައި ބައިވެރިވެފައެވެ. އަދި އަންނަ މާރިޗު މަހު މިހަރަކާތުގެ ތެރެއިން އިނގިރޭސި ވިލާތުން ޑައިވަރުން ގެނެސް ބޮޑު ޑައިވް ހަރަކާތެއް ކުރިއަށް ގެންދިއުމަށް ވަނީ ނިންމާފައެވެ.