ލ. އަތޮޅު ފިޔަވައި ރާއްޖޭގެ ހުރިހާ އަތޮޅަކުން އެގްރޯނެޓަށް އަތޮޅު ކޯޑިނޭޓަރުން ހޯދަން އިއުލާން ކޮށްފިއެވެ.
އެގްރޯނެޓްއިން އަތޮޅު ކޯޑިނޭޓަރުން ހޯދަން އިއުލާން ކޮށްފައިވަނީ ކުންފުނީގެ ފަރާތުން، އަތޮޅުތަކާއި ރަށްރަށުގައި ހިންގާ ޕްރޮޖެކްތަކާއި ޕްރޮގްރާމްތަކާއި ހަރަކާތްތަކާއި މަސައްކަތްތައް އެންމެ ފުރިހަމަ ކަމާއެކު ގެންދިއުމަށް ކުރަންޖެހޭ ކަންކަން ކުރުމަށް ބޭނުންވާ މުވައްޒަފުން ހޯދުމަށް ކަމަށް އެކުންފުނިން ބުނެއެވެ. އެގޮތުން އެކުންފުނިން ވަނީ ޖުމްލަ 19 އެޓޯލް ކޯޑިނޭޓަރުން ހޯދުމަށް އިއުލާން ކޮށްފައެވެ. އެގޮތުން ކޮންމެ އަތޮޅަކަށް ކޯޑިނޭޓަރަކު ކުންފުނިން ހޯދުމަށް ދަނީ މަސައްކަތް ކުރަމުންނެވެ.
އެކުންފުނިން އިއުލާން ކޮށްފައިވާ ގޮތުގައި، ކޯޑިނޭޓަރުންގެ ގޮތުގައި މަސައްކަތް ކުރަންޖެހޭ ރަށެއްގައި ޤާއިމްވެފައި ތިބި ފަރާތްތަކަށް އިސްކަން ދެވޭނެއެވެ. ކޮންމެ އަތޮޅަކަށް ވެސް ކޯޑިނޭޓަރުން ނަގަނީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. އަތޮޅު ކޯޑިނޭޓަރުންނަށް ވާން ބޭނުންވާ ފަރާތްތަކުން 14 ޖެނުއަރީ 2020 ވާ ބުރާސްފަތި ދުވަހުގެ 16:00ގެ ކުރީން އެކުންފުންޏަށް ހުށަހެޅުމަށް ކުންފުނިން ވަނީ އަންގާފައެވެ.
ލ. އަތޮޅު ފިޔަވައި ރާއްޖޭގެ ހުރިހާ ސަރަހައްދަކަން ކޯޑިނޭޓަރުން ހޯދުމަށް އެކުންފުނިން އިއުލާން ކޮށްފައިވާއިރު، އެކުންފުނީގެ ކޮންޓްރެކްޓް ފާމިން މަޝްރޫޢު ލ. އަތޮޅުގައި މިހާރު ވަނީ ފަށާފައެވެ. އެގޮތުން އެ އަތޮޅުގެ 120 ދަނޑުވެރިންނާއެކު ސަރުކާރުން ކަނޑައަޅާ 17 ބާވަތެއް ބަހާލައިގެން ހެއްދުމަށް އެއްބަސްވުމުގައި ވަނީ ސޮއިކޮށްފައެވެ.
އެގްރޯނެޓް އިން ބުނެފައިވަނީ، ކޮންމެ އަތޮޅެއްގައިވެސް ކޮންޓްރެކްޓް ފާމިންގ މަޝްރޫޢު ހިންގާއިރު އެކުންފުނިން ދަނޑުވެރިންނަށް ބޭނުންވާ ތަމްރީނާއި، ވަސީލަތްތަކާއި އަދި އެހެނިހެން އެހީތެރިކަން ފޯރުކޮށްދޭނެއެވެ.