ރާއްޖޭގައި މިވަގުތު 500 ރުފިޔާގެ ވަގު ނޫޓެއް ދައުރުވަމުންނުދާ ކަމުގެ ޔަޤީންކަން މޯލްޑިވްސް މަނިޓަރީ އޮތޯރިޓީއިން ދެއްވައިފިއެވެ.
އެމްއެމްއޭއިން މި ޔަޤީންކަން ދެއްވާފައި މިވަނީ ސޯޝަލް މީޑިއާގައި 500 ރުފިޔާގެ ވަގު ނޫޓެއް ދައުރުވަމުންދާ ކަމަށް ބުނެ ފޮޓޯ އެއް ދައުރު ކުރަމުންދާ ދަނޑިވަޅެއްގައެވެ.
މިކަމާއި ގުޅޭގޮތުން އެމްއެމްއޭއިން ވިދާޅުވީ، ސޯޝަލް މީޑިއާގައި ދައުރުވަމުންދާ ނޫޓު މަރުކަޒީ ބޭންކަށް ގެނެސް ބެލިބެލުމުން އެއީ ސައްޙަ ނޫޓެއް ކަމަށް ދެނެގަނެވިފައިވާ ކަމަށެވެ. އަދި އެނޫޓުގެ ކުލަ ފަނޑުވެފައިވަނީ، އޭގައި ޖެހުނު ކުލައެއް ފިލުވުމަށް ކެމިކަލް ޖެހުމުގެ ސަބަބުން ކަމަށް އެމްއެމްއޭއިން ވިދާޅުވެއެވެ.
މަރުކަޒީ ބޭންކުން ވިދާޅުވީ، އެނޫޓުން އެކަން ފާހަގަ ކުރެވުނު ނަމަވެސް، ނޫޓުގެ ސައްޙަ ކަމާއި މެދު ޝައްކެއް ނެތް ކަމަށެވެ. އަދި މިގޮތަށް އެއްވެސް ނޫޓަކާއި މެދު ޝައްކު އުފެއްދިއްޖެ ހާލަތެއްގައި އެމްއެމްއޭއަށް ގެނެސް އެކަން ސާފު ކުރުމަށް އެއިދާރާއިން ވަނީ އިލްތިމާސް ކޮށްފައެވެ.
ރާއްޖޭގެ ސައްޙަ ނޫން ނޫޓު ދައުރުވަމުންދާކަމަށް މީގެ ކުރީންވެސް އެކި ފަހަރު މަތިން ސޯޝަލް މީޑިއާގައި ވާހަކަ ފެތުރިފައިވެއެވެ. އަދި މިފަދަ ނޫޓުތައް ދެނެގަންނާނެ ގޮތާއި ސިފަތައް އެމްއެމްއޭއިން ވަނީ އާއްމުކޮށްފައެވެ.