އައްޑޫ ފުޓުބޯޅަ ޗެމްޕިއަންޝިޕް 2020 ގެ ފުރަތަމަ މެޗު އެފްސީ ބޭރުމަތި ފަސޭހަ ކަމާއި އެކު ކާމިޔާބު ކޮށްފިއެވެ. އެފްސީ ބޭރު މަތި މިމެޗު ކާމިޔާބު ކުރީ 1-4 ގެ ނަތީޖާއަކުންނެވެ.
އައްޑޫ ފުޓުބޯޅަ ސްޓޭޑިއަމުގައި ކުޅުނު މިމުބާރާތް ހުޅުވި މެޗުގައި މިދިޔަ އަހަރު ޗެމްޕިއަން އެފްސީ ބޭރުމަތި އާއި އެފްސީ އަފިރިން ބައްދަލުކުރި މެޗުގެ ދެފާހުފުގައިވެސް ރަނގަޅު ކުޅުމެއް އެފްސީ ބޭރުމަތި ޓީމުންވަނީ ދައްކާފައެވެ. މިމެޗުގެ ބޮޑުބައި ކޮންޓްރޯލް ކުރީވެސް އެފްސީ ބޭރުމަތި ޓީމުންނެވެ. މެޗުގެ ފުރަތަމަ ލަނޑު ބޭރުމަތި ޓީމަށް ކާމިޔާބު ކޮށްދިނީ، މުހައްމަދު ހަމްދާންއެވެ. ބޭރުމަތި ޓީމުން ފުރަތަމަ ހާފް ނިންމާލީ ޝަމްވީލް ޤާސިމް (ބޮންޑާ) ޖެހި ލަނޑާއެކު ދެލަނޑު ސުންލަނޑުންނެވެ.
ދެވަނަ ހާފުގައި އަފިރިން ޓީމުން ހަމަލާތައް އުފައްދަން މަސައްކަތް ކޮށްފައިވެއެވެ. ނަމަވެސް ބޭރުމަތި ޓީމުންވަނީ އަނެއްކާވެސް ލަނޑެއްޖަހާ މެޗްގެ ލީޑް ފުޅާކޮށްފައެވެ. މިލަނޑު މެޗްގެ 61 ވަނަ މިނިޓްގައި ކާމިޔާބުކޮށްދިނީ އެޓީމުގެ ޒުވާން ކުޅުންތެރިއާ އަލީ އަބާން ޝަރީފްއެވެ. މިމެޗްގެ ހަތަރުވަނަ ލަނޑަކީ އެފްސީ އަފިރިން ޓީމުގެ ސަފްވާން ލަތީފް އަތުން ބައިކޮޅަށް ވަން ލަނޑެކެވެ. މެޗު ނިންމާލުމުގެ ކުރީން އެފްސީ އަފިރިން ޓީމުގެ ޝަވީން ސައީދުވަނީ ލަނޑެއް ޖަހާ އެޓީމަށް ސުން ކަނޑުވާލަދީފައެވެ.
މެޗަށް ފަހު މަޢުލޫމާތުދެމުން ބޭރުމަތި އެފްސީގެ އެސިސްޓެންޓް ކޯޗު މުހައްމަދު ހައްސާން ރަޝީދު ބުނީ، މެޗުގެ ކުޅުމާއި މެދު ހިތްހަމަ ޖެހޭ ކަމަށާއި، ނަމަވެސް އަދި މިއަށްވުރެ ރަނގަޅު ޕާފޯމެންސެއް ދެއްކިދާނެ ކަމަށް ޤަބޫލު ކުރާކަމަށެވެ.
"މިއަދުގެ މެޗުން 3 ޕޮއިންޓު ލިބުމަކީ ހިތްހަމަޖެހުމެއް. ނަމަވެސް އަސްލު އެންމެ އެދެވޭ ގޮތަށް އަދި ނުކުޅެވޭ. އަދި މިއަށްވުރެ ރަނގަޅު ވެވޭނެ. ޤަވާއިދުން ޕްރެކްޓިސް ކުރަމުން ޓީމު އެކަތިގަނޑެއްގެ ގޮތުގައި ކުޅެން މަސައްކަތް ކުރަމުން މިދަނީ. ފްރެންޑްލީ 5 މެޗު ކުޅެފަ މިއައީ. ހުރިހާ ޓީމެއްވެސް އެވަރަށް މަސައްކަތް އެބަ ކުރޭ. އަހަރުމެންވެސް ވެސް ރަނގަޅު ފައިޓެއް ދޭނަން. " އެފްސީގެ އެސިސްޓެންޓް ކޯޗު ހައްސާން ބުންޏެވެ.
މެޗާއި ގުޅޭ ގޮތުން އެފްސީ އަފިރިންގެ ކޯޗު މުހައްމަދު އަލީ ބުނީ، އެޓީމަށް އެންމެ އެކަށީގެންވާ ގޮތަށް ޕްރެކްޓިސް ނުލިބޭ ކަމަށާއި، ދަނޑެއް ނެތުމުން އެހެން ސަރަހައްދަކުން ޕްރެކްޓިސް ކޮށްލަން ލިބޭ ވަގުތާއި ބަލާ ރަނގަޅު ކުޅުމެއް ކުޅުންތެރިން ދެއްކި ކަމަށެވެ.
" އަހަރުމެންނަކީ އަތޮޅަށް ބަލާއިރު، ނިސްބަތުން މަދު ބަޔަކު ތިބި ޓީމެއް. ސްކޮޑެއް ހަމަ ކުރަން އެހާ ފަސޭހައެއް ނޫން. އެހެން ކުރާއިރުވެސް ދަނޑެއް ނެތް ޕްރެކްޓިސް ކުރާނެ. 90 މިނެޓުގެ (މެޗަކަށް) ކުރަން ޖެހޭ ޕްރެކްޓިހެއް އަޅުގަނޑުމެންނަކަށް ނުލިބޭ. ގަޑި ދެގަޑި އިރު ޕްރެކްޓިސް ދުވާލަކު ކޮށްގެން އެ ކަވާރ ނުކުރެވޭ. އެހެންވީމަ ވަސީލަތެއް ނެތިވެސް ކުޅުންތެރިން އެދެއްކި ޕާފޯމެންސަށް ވަރަށް ބޮޑަށް ޝުކުރު އަދާކުރަން". އެފްސީ އަފިރިންގެ ކޯޗު މުހައްމަދު އަލީ ބުންޏެވެ.
މިމުބާރާތުގައި ދެން ކުޅޭނީ މަރަދޫ އެފްސީ އާއި ފޭދޫ ސްޕޯޓްސްއެވެ. މިމުބާރާތް އައްޑޫ ފުޓުބޯޅަ ސްޓޭޑިއަމުގައި ފެބްރުއަރީ މަހުގެ 10 އަށް ކުރިއަށް ދާނެއެވެ.