އައްޑޫ ފުޓުބޯޅަ ޗެމްޕިއަންޝިޕް 2020 ގެ 4 ވަނަ މެޗު މަރަދޫ ބަލިކޮށް، މެދުވަލު އެފްސީ ކާމިޔާބު ކޮށްފިއެވެ.
މިމުބާރާތުގައި 4 ވަނަ މެޗު މެދުވަލު އެފްސީ ކާމިޔާބު ކުރީ، 2-3 އިން މަރަދޫ އެފްސީގެ މައްޗަށް ކުރި ހޯދައިގެންނެވެ.
ވާދަވެރި ކުޅުމެއް ފެނިގެން ދިޔަ މިމެޗުގެ ފުރަތަމަ ލަނޑު ޖެހީ މަރަދޫ އެފްސީގެ އަހުމަދު ތޮލާލެވެ. މެޗުގެ 16 ވަނަ މިނެޓުގައި ޠޮލާލް ޖެހި ލަނޑާއެކު މަރަދޫ އެފްސީއަށް ލީޑު ލިބުނު ނަމަވެސް، މި ލީޑު އެޓީމަށް ހިފަހަށްޓައި ނުލެވުނެވެ. މެދުވަލު އެފްސީގެ މުހައްމަދު މަމްނޫން ވަނީ އެޓީމަށް 21 ވަނަ މިނެޓުގައި ލަނޑު ޖަހައިދީ ނަތީޖާ ހަމަހަމަ ކޮށްފައެވެ. ދެޓީމުން ގޯލް ޖަހަން ގިނަ މަސައްކަތް ކޮށްފައިވާއިރު، މަރަދޫ އެފްސީއިން 42 ވަނަ މިނެޓުގައި ވިޝާން ހަބީބު ޖެހި ލަނޑުން ލީޑު ނެގިއެވެ. ނަމަވެސް ދެވަނަ ފަހަރަށް ހާފު ނިމުމުގެ ކުރީން އެޓީމަށް ލީޑު ގެއްލިގެން ދިޔައީ މެދުވަލު އެފްސީގެ އަހުމަދު ހާމީ ހާފު ނިމެނިކޮށް ޖެހި ލަނޑާއެކުއެވެ. މިހާފު ނިމިގެން ދިޔައީ 2-2 އިން ދެޓީމު އެއްވަރު ވެގެންނެވެ.
ދެވަނަ ހާފުގައި ދެޓީމުން ގޯލު ޖަހަން ރަނގަޅު ފުރުސަތު ތަކެއް ހޯދިއެވެ. އެގޮތުން މަރަދޫ އެފްސީގެ އަހުމަދު ތޮލާލަށް ގިނަ ފުރުޞަތުތައް ލިބި ވަނީ ބޭކާރުވެފައެވެ. މިހާފުގައި މެދުވަލު އެފްސީއަށް ވެސް ގޯލު ޖަހާނެ ފުރުސަތު ލިބުނެވެ. ނަމަވެސް އެޓީމަށް ވެސް އެންމެ އެދެވޭ ގޮތެއްގައި ހަމަލާތައް ނިންމާލެވޭ ގޮތް ނުވެއެވެ. މެދުވަލު އެފްސީއަށް މެޗު ކަށަވަރުކޮށްދިން ގޯލު މިހާފުގައި ޖަހާފަައިވަނީ، 81 ވަނަ މިނެޓުގައި އެޓީމުގެ މުހައްމަދު ރަފާހުއެވެ. މިގޯލާއި އެކު މެދުވަލު އެފްސީ ލީޑު ހިފެހެއްޓުމަށް ކުޅެމުންދިޔަތަން ފެނިގެން ދިޔައެވެ.
މެޗަށްފަހު ނޫސްވެރިންނާއި ވާހަކަ ދައްކަމުން މެދުވަލު އެފްސީގެ ކޯޗު މުހައްމަދު އުގެއިލް ބުނީ ފުރަތަމަ މެޗާއި އަޅާބަލާއިރު މެޗު ދިޔަ ގޮތް ރަނގަޅު ކަމަށެވެ. އަދި ޓީމުގައި މިވަގުތު އިންޖަރީ މައްސަލަތަކެއް ހުރި ނަމަވެސް، ކަރަންޓީނުގައި އިތުރު ކުޅުންތެރިން ތިބުމުން ކުރިއަށް ހުރި މެޗުތައް ރަނގަޅުވާނެ ކަމަށް އެނާ ބުންޏެވެ.
" ފުރަތަމަ މެޗާއި ބަލާ، ކުޅުން ވަރަށް ރަނގަޅު. އިރާދަ ކުރެއްވިއްޔާ ދެވަނަ މެޗު ވަރަށް ތަފާތު ވާނެ. އެމީހުން އެއްމެޗު ކުޅެލާފަ އަޅުގަނޑުމެންނާއި އެކުޅުނީ. އެހެންވީމަ ދަޑައް ފަރިތަވެ އެމީހުން ރަނގަޅުވާނެ. ޓީމުގައި އެބައުޅޭ ފުދޭވަރަކަށް އިންޖަރީ ކުޅުންތެރިން. ބެންޗުގައި ވެސް އިންޖަރީ ކުޅުންތެރިން އެބަތިބި. އަދި މިއަދު އެއް ކުޅުންތެރިއަކު ދެން އޮތް މެޗަށް ނޭރޭ ވަރުގެ އިންޖަރީއެއް ވެއްޖެ. ނަމަވެސް އަޅުގަނޑުމެންގެ ބައެއް ކުޅުންތެރިން ކަރަންޓީނުގައި އެބަތިބި. އެކުޅުންތެރިން އައީމަ ރަނގަޅުވާނެ. " އުގެއިލް ބުންޏެވެ.
މަރަދޫ އެފްސީ ކޯޗު އިބްރާޙީމް ނަސީމު ބުނީ، އަދި ދެމެޗުން ބަލިވިއަސް އިތުރު ދެމެޗު ކުރިއަށް އޮތުމުން އަމިއްލަ ބާރުގައި މުބާރާތުގައި ކުރިއަށް ދިއުމުގެ ފުރުސަތު އެބައޮތް ކަމަށެވެ. އަދި ލިބުނު ފުރުސަތު ބޭނުން ނުކުރެނު ކަން އޭނާވެސް ފާހަގަ ކުރިއެވެ.
އަޑު 2 " ދެމެޗުން މޮޅުވެއްޖެނަމަ އަމިއްލަ ބާރުގައި ކުރިއަށް ދިއުމަށް ފުރުސަތު އެބައޮތް. ރަނގަޅު ފުރުސަތުތަކެއް ލިބިގެން ދިޔަ. އެހެން ނަމަވެސް އެ ފުރުސަތުތައް ބޭނުން ނުވުމުން މިއަދު މިހެން މިވީ. އިރާދަ ކުރެއްވިޔާ (ކުރިއަށް ހުރި މެޗުތައް) ކުޅޭނީ މޮޅުވާން. " ނަސީމު ބުންޏެވެ.
މިމެޗުގެ ނަތީޖާއާއެކު މުބާރާތުގެ ފެށުން، މެދުވަލު އެފްސީ މިވަނީ ރަނގަޅުކޮށް 3 ޕޮއިންޓު ކަށަވަރު ކޮށްފައެވެ. ނަމަވެސް މަރަދޫ ޓީމު އެންމެ ގްރޫޕް ސްޓޭޖުގައި ކުޅެން އޮތް 4 މެޗުން ދެ މެޗުން މިވަނީ ޕޮއިންޓެއް ނުލިބި ބަލިވެފައެވެ. އެޓީމުން މުބާރާތުގައި ކުރިއަށް ދިއުމަށް އޮތް ކުރިއަށް އޮތް ދެމެޗުން މޮޅުވާން މަޖުބޫރެވެ.
މުބާރާތުގައި މިއަދު ކުޅޭނީ ގްރޫޕް އޭ އިން މިދިޔަ އެފްސީ ބޭރުމަތި އާއި އެފްސީ ޒެފިޔާއެވެ.