އައްޑޫ ސިޓީ ޑެޕިއުޓީ މެޔަރު މުޙަންމަދު ޔަސްރިފް މަޤާމުން އިސްތުއުފާ ދެއްވުމަށް ނިންމަވައިފިއެވެ.
ޑެޕިއުޓީ މޭޔަރ ކަމުގެ މަޤާމުން އިސްތިއުފާ ދެއްވުމަށް ނިންމާފައިވާ ކަން އޭނާ ވަނީ ޕީއެސްއެމް ނިއުސްއަށް ޔަޤީންކޮށްދެއްވާފައެވެ. އަދި މަދަމާ އޭނާގެ އިސްތިއުފާ ހުށަހަޅުއްވާނެކަމަށްވެސް އޭނާ ވަނީ ވިދާޅުވެފައެވެ. ނަމަވެސް އިސްތިއުފާ ދެއްވާ ސީދާ ސަބަބެއް ހާމަކުރައްވާފައެއް ނުވެއެވެ.
މަޢުލޫމާތު ލިބިފައިވާ ގޮތުގައި، ޑެޕިއުޓީ މޭޔަރުކަމުން އިސްތިއުފާ ދެއްވަނީ، ސިވިލް ސަރވިސްގެ މަޤާމަކަށް ކުރިމަތިލައި އެމަޤާމަށް ހޮވުމާ ގުޅިގެންނެވެ. ނަމަވެސް މިކަން ޔަސްރިފް ޔަޤީންކޮށްދެއްވާފައެއް ނުވެއެވެ.
އައްޑޫސިޓީގެ ކައުންސިލަރެއްގެ ގޮތުގައި ޔަސްރިފް މަސައްކަތް ކުރައްވާތާ މިއީ ދެވަނަ ދައުރެވެ. ހިތަދޫ ދެކުނު ދައިރާގެ ކައުންސިލަރެއްގެ ގޮތުގައި ފުރަތަމަ ދައުރު އަދާ ކުރެއްވުމަށްފަހު، ދެވަނަ ދައުރަކަށް އިންތިޚާބުވެވަޑައިގެން އައްޑޫގެ ޑެޕިއުޓީ މޭޔަރކަށް ވަނީ ހޮވިފައެވެ. އޭނާ މިމަޤާމާއި ހަވާލުވެވަޑައިގަތީ 2017ވަނަ އަހަރު ޖޫން މަހުގެ ތެރޭގައެވެ. އޭނާ ވަނީ މިފަހަރުގެ ލޯކަލް ކައުންސިލް އިންތިޚާބުގައިވެސް އެމްޑީޕީ ޕްރައިމަރީގައި ވާދަކޮށްފައެވެ.
ޔަސްރިފް އިސްތިއުފާދެއްވުމުން، އައްޑޫ ސިޓީ ކައުންސިލުގައި ދެން ތިބޭނީ މޭޔަރާއެކު 6 މެންބަރުންނެވެ.