ކޯވިޑް-19ގެ ކޭސްތައް އިތުރުވުމާއެކު ބޭންކް އޮފް މޯލްޑިވްސްގެ ޙިދުމަތްދޭ ގޮތްތަކަށް ބަދަލުތަކެއް ގެނެސްފައިވާކަމަށް ބީއެމްއެލްއިން ހާމަކޮށްފިއެވެ.
ބީއެމްއެލްއިން ވިދާޅުވީ، ކޯވިޑް-19 އިން މުވައްޒަފުންނާޢި ކަސްޓަމަރުން ރައްކާތެރި ކުރުމަށްޓަކައި، އެޗްޕީއޭގެ ގައިޑްލައިންތަކާއި އެއްގޮތަށް ފިޔަވަޅުތަކެއް އަޅާފައިވާ ކަމަށެވެ. އެގޮތުން ބޭންކުގެ މުވައްޒަފުން ޝިފްޓުތަކަށް ބަހާލައި، ޓީމުތަކުގައި ތިބެގެން އަދި ގޭގައި ތިބެގެން މަސައްކަތް ކުރެވޭނެ އިންތިޒާމު މިހާރު ހަމަޖައްސާފައިވާ ކަމަށެވެ. ބީއެމްއެލްއިން ވިދާޅުވީ މިބަދަލާއެކު މެދުކެނޑުމެއްނެތި ރައްކާތެރިކަމާއެކު ޙިދުމަތް ފޯރުކޮށްދެވޭނެ ކަމަށެވެ.
މިގޮތަށް ބަދަލު ގެނެސްފައިވާއިރު، ބޭންކުންދޭ ބައެއް ޙިދުމަތްތަކުގައި ލަސްތަކެއްވެދާނެ ކަމަށް ބޭންކުން ބުނެއެވެ. އެގޮތުން ފައިސާ ފޮނުވުމާއި ކާޑް ޕްރޮސެސްކުރުމާއި، ޗެކް ޕްރޮސެސްކުރުމާއި ކަސްޓަމަރުންނަށް މައުލޫމާތު ދިނުމާއި ޖަވާބު ދިނުމުގެ ކަންކަމުގައި ލަސްތަކަކާއި ކުރިމަތިލާން ޖެހިދާނެ ކަމަށެވެ.
ބޭންކުން މިކަންކަމަށް ރިއާޔަތްކޮށް އަންނަ އާދިއްތަ ދުވަހުން ފެށިގެން އިތުރު ބަދަލުތަކެއް ގެނެއުމަށް ވަނީ ނިންމާފައެވެ. އެގޮތުން ރާއްޖެއިން ބޭރަށް ފައިސާ ފޮނުވުމާއި އެހެން ބޭންކުތައް މެދުވެރިކޮށް ޗެކް ޕްރޮސެސް ކުރުމުގެ ޙިދުމަތް ހެނދުނު 11:00ގެ ކުރިން ޕްރޮސެސް ކުރުމަށް ލިބޭނަމަ އެދުވަހުން އެދުވަހަށް ފޯރުކޮށްދޭނެ ކަމަށާއި، އަދި 11:00 ފަހުން ލިބޭ ރިކުއެސްޓުތައް ޕްރޮސެސްވާނީ އަނެއް ދުވަހު ކަމަށް ބީއެމްއެލް އިން ބުނެއެވެ. މީގެ އިތުރުން، ޕޭރޯލް އަދި ބީއެމްއެލްގެ ޗެކުތައް ޕްރޮސެސް ކުރުން 12:00ގެ ކުރިން ހުށަހެޅިއްޖެ ނަމަ އެދުވަހު ކުރާނެކަމަށާއި އަދި 12:00 ފަހުން ހުށަހާޅާ ރިކުއެސްޓު ދެން އަންނަ ރަސްމީ ދުވަހެއްގައި ކުރާނެ ކަމަށް ބޭންކުން މައުލޫމާތުދެއެވެ.
ރާއްޖޭގެ ކޯވިޑް-19 ކޭސްތައް އިތުރުވުމާއެލި އެޗްޕީއޭއިން ވަނީ އިތުރު ފިޔަވަޅުތައް އަޅާފައެވެ. ބީއެއެމްއެލްއިން ވިދާޅުވީ، މާލޭ ސަރަހައްދުގައި ޙިދުމަތް ދިނުމަށް ހަމަޖެހިފައިވަނީ ކިއުބީ އެޕްލިކޭޝަން މެދުވެރިކޮށް ޓޯކެން ދޫކޮށްގެން ކަމަށާއި، އެކައުންޓު ހުޅުވުން ފަދަ ޙިދުމަތްތައް އެޕޮއިންޓްމެންޓް ހޯދައިގެން ކުރިއަށް ގެންދެވޭނެ ކަމަށް ބީއެމްއެލްއިން ބުނެއެވެ.