އައްޑޫސިޓީ ހުޅުމީދޫ އެމްޓީސީސީ ސައިޓުން އިތުރު 10 ބިދޭސީއަކު ޕޮޒިޓިވް ވެފައިވާ ކަމަށް އައްޑޫސިޓީ ކައުންސިލުން ވިދާޅުވެއްޖެއެވެ.
އައްޑޫސިޓީ ހުޅުމީދޫ އެމްޓީސީސީ ސައިޓުން ބިދޭންސީންތަކެއް ޕޮޒިޓިވް ވުމާއި ގުޅިގެން އެރަށް ވަނީ މޮނިޓަރިންއަށް ލާފައެވެ. އެރަށުން މިހާތަނަށް ނެގި ސާމްޕަލު ތަކުން 22 މީހަކު ޕޮޒިޓިވް ވެފައިވާ ކަމަށް ސިޓީ ކައުންސިލުން ވަނީ ވިދާޅުވެފައެވެ. އަދި މީގެ ތެރޭގައި އެއްވެސް ދިވެއްސަކު ނުހިމެނޭ ކަމަށްވެސް ސިޓީ ކައުންސިލުން ވިދާޅުވެއެވެ.
ހުޅުމީދޫ މޮނިޓަރިންގެ ޙާލަތަށް ގެނެސްފައިވަނީ ސ.ހުޅުދޫއަށް ފުރަބަންދު ކަރަންޓީީނަށް ދިޔަ 2 މީހަކު ޕޮޒިޓިވް ވުމާއި ގުޅިގެންނެވެ. އެޗްއީއޯސީން ވިދާޅުވީ، އެ ދެމީހެއް ޕޮޒިޓިވްވި ނަމަވެސް އޭރު އެނގިފައިވަނީ އެއްވެސް އިތުރު ކޮންޓެކްޓެއް ނެތް ކަމަށެވެ. ނަމަވެސް ފަހުން އިތުރު ބަޔަކު ޕޮޒިޓިވްވެފައިވާކަން އެނގުނީ އެމީހުން ތިބި ސައިޓުގައި ތިބި ބައެއްގެ ފުށުން އަލާމާތް ފެނުމާއި ގުޅިގެން ޓެސްޓު ކުރުމުން ކަމަށެވެ.
އެޗްއީއޯސީން ވިދާޅުވީ މިހާރުވެސް ކޮންޓެކްޓް ޓްރޭސިން މަސައްކަތް ކުރިއަށްދާ ކަމަށެވެ. އަދި ޕޮޒިޓިވްވި މީހުން ތިބި ސައިޓުގައި ޖުމްލަ 60 މީހުން ތިބި ކަމަށް ވެސް އެޗްއީއޯސީން ވިދާޅުވެއެވެ.
އައްޑޫސިޓީ ކައުންސިލުން ވިދާޅުވީ، މިވަގުތު ހުޅުދޫމީދޫ ފުރަބަނދު ވުމާއި އެކު އެރަށައް އަރައި ފޭބުން މަނާވާނެ ކަމަށާއި، އަދި އައްޑޫ ފިޝަރީޒް ކޮމްޕްލެކްސްއަށް މަސްކިރުވުން ވެސް މެދު ކަނޑާލެވޭނެ ކަމަށެވެ. އަދި މިވަގުތު ރަށުގެ ހާލަތު ގާތުން ބަލަމުންދާ ކަމަށް ވެސް ސިޓީ ކައުންސިލުން ވިދާޅުވެއެވެ.